(ពិភពលោក)៖ នៅថ្ងៃសៅរ៍ ទី១៧ ខែវិច្ឆិកា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ ទីបំផុតក្រុមតារាវិទូបានរកឃើញ ភពផែនដីយក្ស ឬ Super Earth មួយទៀតហើយ ដែលកំពុងតែធ្វើគោចរនៅជុំវិញផ្កាយមួយ ស្ថិតនៅក្បែរព្រះអាទិត្យរបស់យើង ក្នុងរយៈចម្ងាយប្រហែលតែ ៦ឆ្នាំពន្លឺប៉ុណ្ណោះ៕
២៖ អ្នកនាំពាក្យក្រសួងការបរទេសរុស្ស៉ីបានឱ្យដឹងថា នាវាដឹកជញ្ជូនជាច្រើនគ្រឿងមានផ្ទុកទៅដោយឧស្ម័ន LNG មកពីរោងចក្រផលិតឧស្ម័ន LNG របស់រុស្ស៊ី បានធ្វើដំណើរទៅដល់សហរដ្ឋអាមេរិកហើយ នៅក្នុងបរិបទដែលទីក្រុងវ៉ាស៊ីនតោនទទូចឱ្យសហភាពអឺរ៉ុបបញ្ឈប់ការទិញឧស្ម័នពីទីក្រុងម៉ូស្គូ៕
៣៖ ក្រោយរយៈពេលមួយឆ្នាំគត់ នៅទីបំផុតនាវាមុជទឹក ARA San Juan ត្រូវបានក្រុមអ្នករុករកអាហ្សង់ទីន រកឃើញកន្លែងដែលវាកំពុងស្ថិតនៅហើយ និងត្រៀមកម្លាំងដើម្បីចុះទៅកាន់ទីនោះ ដើម្បីពិនិត្យស្ថានភាពជាក់ស្តែង៕
៤៖ អនុប្រធានាធិបតីអាមេរិកលោក ម៉ៃក៍ ភែន (Mike Pence) នៅថ្ងៃសៅរ៍នេះ បាននិយាយថា សហរដ្ឋអាមេរិកនឹងមិនបញ្ឈប់សង្រ្គាមពាណិជ្ជកម្មជាមួយចិនឡើយ រហូតទាល់តែទីក្រុងប៉េកាំង ផ្លាស់ប្ដូរគោលនយោបាយពាណិជ្ជកម្មរបស់ខ្លួនក្នុងពេលបច្ចុប្បន្នជាមុនសិន។
៥៖ ចំនួនសាកសពជនរងគ្រោះដែលត្រូវបានរកឃើញ គឺកើនឡើងដល់៧១នាក់ហើយ ដោយសារតែភ្លើងឆេះព្រៃនៅភាគខាងជើងរដ្ឋកាលីហ្វរញ៉ា ខណៈមនុស្ស១០១១នាក់ទៀតបានបាត់ខ្លួន៕
៦៖ គ្រោះធម្មជាតិរញ្ជួយដីបន្ថែមក្នុងកម្រិត ៥.១រ៉ិចទ័រ និង ៥.៥រ៉ិចទ័រ បានកើតមានឡើងនារយៈពេលប៉ុន្មានថ្ងៃចុងក្រោយនេះ ទៅលើស្រុកម៉ាម៉ាសា (Mamasa) នៃខេត្តស៊ូឡាវ៉េស៊ីខាងលិច នៃប្រទេសឥណ្ឌូណេស៊ី និងបានផ្តាច់ជីវិតមនុស្ស ០៧នាក់ ខណៈមនុស្សជាង ៨,០០០នាក់ កំពុងស្នាក់នៅជម្រកបណ្តោះអាសន្ន ក្រោយតំបន់ដែលពួកគេរស់នៅ មួយភាគត្រូវបានដីបាក់រលំសង្កត់ពីលើ៕
