(វ៉ាស៊ីនតោន)៖ ចំនួនសាកសពជនរងគ្រោះដែលត្រូវបានរកឃើញ គឺកើនឡើងដល់៦៣នាក់ហើយ ដោយសារតែភ្លើងឆេះព្រៃនៅភាគខាងជើងរដ្ឋកាលីហ្វរញ៉ា ខណៈមនុស្ស៦០០នាក់ទៀតបានបាត់ខ្លួន។ នេះបើតាមការចេញផ្សាយដោយសារព័ត៌មាន Sputnik នៅថ្ងៃសុក្រ ទី១៦ ខែវិច្ឆិកា ឆ្នាំ២០១៨។
បើតាមបញ្ជាក់ពីអាជ្ញាធរអាមេរិក សាកសពចំនួន០៧នាក់ទៀត ត្រូវបានរកឃើញនាថ្ងៃព្រហស្បតិ៍សប្តាហ៍នេះ (ពេលវេលានៅអាមេរិក) ដែលនេះធ្វើឱ្យសាកសពមនុស្សសរុប ៦៣នាក់ ត្រូវបានប្រទះឃើញនៅក្បែរ និងក្នុងទីក្រុងផារ៉ាដាយស៍ (Paradise) ដែលបានទទួលរងការបំផ្លិចបំផ្លាញជាខ្លាំងដោយមហន្តរាយភ្លើងឆេះព្រៃខាងលើ។
គួរជម្រាបថា ភ្លើងឆេះព្រៃឈ្មោះថា Camp Fire រហូតមកទល់ពេលនេះ នៅតែត្រូវចាត់ទុកជា គ្រោះអាសន្នធំបំផុតមួយដដែល ខណៈភ្នាក់ងារពន្លត់អគ្គីភ័យជិត ៥,៥០០នាក់ កំពុងព្យាយាមពន្លត់វាឲ្យបានទាំងស្រុង។ គិតចាប់តាំងពីថ្ងៃព្រហស្បតិ៍សប្តាហ៍មុនមក ផ្ទៃដីប្រមាណ ៥៥៨.៥គីឡូម៉ែត្រក្រឡាត្រូវបានឆាបឆេះ ហើយភ្លើងឆេះព្រៃនេះទើបត្រូវគេគ្រប់គ្រងបាន ៣៥ភាគរយប៉ុណ្ណោះ៕
