(អាមេរិក)៖ សាកសពជន​រងគ្រោះ​ចំនួន​​ ០៦នាក់ថែមទៀត ក្នុងករណី​ភ្លើងឆេះព្រៃ​នៅភាគខាងជើង​​រដ្ឋកាលីហ្វរញ៉ា ត្រូវ​បានរកឃើញ​ដោយ​​ក្រុមអ្នករុករក ហើយប្រការនេះ​បានធ្វើឲ្យចំនួនមនុស្ស​ស្លាប់​សរុប ដោយសារតែភ្លើងឆេះព្រៃ​ឈ្មោះ​ថា Camp Fire កើនឡើងដល់ ៤៨នាក់ហើយ និងជាចំនួនច្រើន​បំផុត​មិនធ្លាប់​មាននោះ​ឡើយក្នុង​ប្រវត្តិសាស្ត្រ។ នេះបើតាម​ការដកស្រង់​ការផ្សាយចេញពី​សារព័ត៌មាន NBC News នៅព្រឹក​ថ្ងៃពុធ ទី១៤ ខែវិច្ឆិកា ឆ្នាំ២០១៨។

សាកសព​មនុស្ស ០៦នាក់បន្ថែមខាងលើ ត្រូវបានរកឃើញ​នៅក្នុងលំនៅឋាន ក្នុងបរិវេណ​នៃទីក្រុង ផារ៉ាដាយស៍ (Paradise) ដែលបានរង​ការបំផ្លិចបំផ្លាញ​យ៉ាងធ្ងន់ធ្ងរ​ពីភ្លើង​ឆេះព្រៃ Camp Fire ដែលបានរីករាលដាល​ឡើង កាលពីថ្ងៃព្រហស្បតិ៍​សប្តាហ៍​​មុន ​ហើយឥឡូវនេះ​វាត្រូវគេចាត់ទុកថា​ ជាភ្លើងឆេះព្រៃ​​​ដែលការខូចខាត​ខ្លាំង និងសម្លាប់​មនុស្សច្រើន​ជាងគេប​ង្អស់ នៅ​ក្នុង​ប្រវត្តិសាស្រ្ត​ភ្លើងឆេះព្រៃ​របស់រដ្ឋ​កាលីហ្វរញ៉ា។ គិតត្រឹមយប់​ថ្ងៃអង្គារសប្តាហ៍​នេះ Camp Fire បានដុតបំផ្លាញ​ផ្ទៃដី​​ទំហំ​ជាង ៥២,០០០ហិកតា និងត្រូវគ្រប់គ្រងបានតែ ៣៥ភាគរយ​ប៉ុណ្ណោះ។

ទន្ទឹមនឹងនេះនៅ​ភាគខាងត្បូងរដ្ឋកាលីហ្វរញ៉ា​ក្បែរទីក្រុង ឡូសអាន់ជែឡេស (Los Angeles) ក៏មានការវាយប្រហារ​ពីសំណាក់ភ្លើង​ឆេះព្រៃ​​ចំនួន ០២ផងដែរ គឺ Woolsey Fire និង Hill Fire។ Woolsey Fire បានផ្តាច់ជីវិតមនុស្ស ០២នាក់ និង​បាន​បំផ្លាញផ្ទៃដីទំហំ​​ជិត ៤០,០០០ម៉ឺនហិកតា ព្រមទាំងលំនៅឋាននិងសំណង់អគារផ្សេងៗ​យ៉ាងតិច​ ៤៣៥ខ្នង ហើយវាកំពុង​នៅតែបន្ត​ឆាប​ឆេះដដែល។ ចំណែក Hill Fire ​បន្ទាប់ពីឆាបឆេះផ្ទៃដីជិត ២,០០០ហិកតា ​និងបំផ្លាញសំណង់​អគារមួយចំនួនតូច ចាប់​តាំងពីថ្ងៃព្រហស្បតិ៍​សប្តាហ៍មុនមក វាត្រូវភ្នាក់ងារពន្លត់អគ្គីភ័យ​គ្រប់គ្រងបាន​ ៩០ភាគរយ។

គួរជម្រាបថា ​Camp Fire បានក្លាយជាភ្លើងឆេះ​ព្រៃផ្តាច់ជីវិតមនុស្សច្រើនបំផុត​ក្នុងប្រវត្តិសាស្រ្ត​រដ្ឋកាលីហ្វរញ៉ា ខណៈ​កាលពីមុនគឺភ្លើងឆេះ​ព្រៃឈ្មោះថា Griffith Park Fire ដែលបានសម្លាប់មនុស្ស ២៩នាក់ កាលពីឆ្នាំ១៩៣៣។ សម្រាប់​​​ភ្លើងឆេះព្រៃដែល​សម្លាប់មនុស្សច្រើនបំផុត​នៅសហរដ្ឋអាមេរិកទាំងមូល​វិញនោះ គឺ Peshtigo Fire ដែលបានកើត​​ឡើង​កាលពីថ្ងៃទី០៨ ខែតុលា ឆ្នាំ១៨៧១ នៅរដ្ឋ Wisconsin ដោយមាន​មនុស្សបាត់បង់ជីវិត​តិច​បំផុត​ប្រហែល​១,៥០០នាក់ និងច្រើនបំផុតរហូតដល់ ២,៥០០នាក់៕