(ហាណូយ)៖ ​ក្រុមហ៊ុនអាកាសចរណ៍​វៀតណាមថ្មីមួយផ្សេង​ទៀតឈ្មោះថា អាកាសចរណ៍ឫស្សី (Bamboo Airways) ទើបតែទទួលបានអាជ្ញា​ប័ណ្ណហើយនឹងត្រូវចាប់ផ្តើមធ្វើប្រតិបត្តិការ​ជាផ្លូវការនាចុងឆ្នាំនេះ។ នេះបើតាមការ​ដកស្រង់ការផ្សាយចេញ​ពី ទីភ្នាក់​ងារ​ព័ត៌មានចិន ស៊ីនហួរ នៅរសៀល​ថ្ងៃអង្គារ ទី១៣ ខែវិច្ឆិកា ឆ្នាំ២០១៨។

ជាមួយទុន​ប្រមាណ​ ៧០០ពាន់លានដុង ដែលស្មើនឹង​ ៣០.៤លានដុល្លារ អាកាសចរណ៍ Bamboo Airways នឹង​បម្រើការហោះហើរថ្នាក់ជាតិ និងអន្តរជាតិចំនួន ១០០ជើង ដោយផ្តោត​សំខាន់លើការធ្វើដំណើរ​ត្រង់ រវាងទីក្រុងជាច្រើននៅ​លើពិភពលោក និង​​ទីតាំងទេសចរណ៍​ល្បីៗ​នៅក្នុងប្រទេស​វៀតណាម។

ក្រុមហ៊ុន​អាកាសចរណ៍ថ្មីនេះ បានចុះកិច្ចព្រមព្រៀង​​​ដែលមាន​ទំហំទឹកប្រាក់​ ៨.៦ពាន់លានដុល្លារ ដើម្បីទិញយក​យន្តហោះ Boeing និង Airbus ចំនួន ៤៤គ្រឿង។

គួរជម្រាបថា សព្វថ្ងៃវៀតណាម​មាន​ក្រុមហ៊ុនអាកាសចរណ៍ចំនួន ០៤ កំពុងដំណើរការ ស្រាប់រួមមាន Vietnam Airlines, Vietjet Air, Jetstar Pacific, និង Vietnam Air Servives Campany៕