(អាមេរិកឡាទីន)៖ យន្តហោះដឹកអ្នកដំណើរមួយគ្រឿង​ផ្ទុកមនុស្សសរុប​១២៦នាក់ បានធ្វើការចុះចតខុសបច្ចេកទេសនៅឯ​អាកាស​យានដ្ឋាននៃរដ្ឋធានី Georgetown នៅប្រទេស​អាមេរិកឡាទីន Guyuna ជាប់វេណេស៊ុយអេឡា ដោយជាលទ្ធផលមនុស្ស០៦នាក់​បានរងរបួស តែពុំមានការបង្កគ្រោះថ្នាក់ធ្ងន់ធ្ងរជាងនេះឡើយ។ នេះបើតាមការដកស្រង់ការផ្សាយចេញពីសារព័ត៌មាន NDTV នៅ​យប់ថ្ងៃសុក្រ ទី០៩ ខែវិច្ឆិកា ឆ្នាំ២០១៨។

យន្តហោះ Boeing នោះជារបស់ក្រុមហ៊ុនអាកាសចរណ៍ Fly Jamaica Airways មានគោលដៅធ្វើដំណើរឆ្ពោះទៅកាន់​ទីក្រុង Toronto នៃប្រទេសកាណាដា នៅពេលវាជួបបញ្ហាបច្ចេកទេសបន្ទាប់ពីហោះឡើងចេញពីព្រលានយន្តហោះខាងលើបានត្រឹម​ប៉ុន្មាន​នាទី​ប៉ុណ្ណោះ​ ហើយបកក្រោយ​មកចុះចតជាបន្ទាន់វិញ រួចក៏ស្រាប់តែរអិលហួសចេញពីផ្លូវ ហើយជ្រុលទៅបុកនឹង​របងអាកាសយានដ្ឋានតែម្តង។

គួរជម្រាបថា បើតាមការបញ្ជាក់ពីអាជ្ញាធរក្នុងតំបន់ អ្នករងរបួសពុំមានស្ថានភាពធ្ងន់ធ្ងរដល់ថ្នាក់គំរាមកំហែងអាយុជីវិតឡើយ។ ​យន្ត​ហោះខាងលើមានផ្ទុកអ្នកដំណើរ​ចំនួន១១៨នាក់ ព្រមទាំងអាកាសយានិកនិងបុគ្គលិក​សរុប០៨នាក់ទៀត៕