(ពិភពលោក)៖ នៅថ្ងៃចន្ទ ទី០៥ ខែវិច្ឆិកា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ កងម៉ារីនកូរ៉េខាងត្បូង និងអាមេរិក ៥០០នាក់ បានចាប់ផ្ដើមធ្វើសមយុទ្ធយោធា ទ្រង់ទ្រាយតូចមួយនៅថ្ងៃចន្ទនេះតែប៉ុន្មាន ថ្ងៃប៉ុណ្ណោះមុននឹងរដ្ឋមន្ត្រីការបរទេសអាមេរិក លោក ម៉ៃក៍ ប៉ុមប៉េអូ ត្រូវចូលរួមក្នុងកិច្ចប្រជុំជាមួយសមភាគីកូរ៉េខាងជើងស្ដីពី ការំសាយអាវុធនុយក្លេអ៊ែរ និងការរៀបចំជំនួបកំពូលជាលើកទី ២ រវាងលោក ដូណាល់ ត្រាំ និងលោក គីម ជុងអ៊ុន៕
២៖ ប្រធានាធិបតីកូរ៉េខាងត្បូង លោក មូន ជែអ៉ីន នាថ្ងៃចន្ទនេះបានឲ្យដឹងថា ប្រទេសរបស់លោក កំពុងត្រៀមរៀបចំសម្រាប់ដំណើរទស្សនកិច្ចជាប្រវត្តិសាស្ត្ររបស់ប្រមុខដឹកនាំកូរ៉េខាងជើង មកកាន់រដ្ឋធានីសេអ៊ូល ដែលអាចនឹងកើតមានឡើងនៅចុងឆ្នាំ២០១៨៕
៣៖ ប្រទេសឥណ្ឌាត្រូវគេរាយការណ៍ថា នឹងទិញប្រេងពីអ៉ីរ៉ង់ដោយប្រើប្រាស់លុយរូពី ដើម្បីកុំឲ្យមានការជាប់គាំងក្នុងករណី ដែលអ៉ីរង់ត្រូវកាត់ផ្តាច់ចេញពីបណ្តាញទូទាត់សាច់ប្រាក់អន្តរជាតិ SWIFT ដោយសារកញ្ចប់ទណ្ឌកម្មខ្នាតធំរបស់អាមេរិក ដែលបានចូលជាធរមាននាថ្ងៃចន្ទនេះ៕
៤៖ ប្រជាជនអ៉ីរ៉ង់ បាននាំគ្នាធ្វើបាតុកម្មតវ៉ានៅទូទាំងប្រទេសប្រឆាំងនឹងសហរដ្ឋអាមេរិក ខណៈទណ្ឌកម្មដ៏សម្បើមមួយ មិនធ្លាប់មានរបស់រដ្ឋបាលលោក ដូណាល់ ត្រាំ លើទីក្រុងតេហេរ៉ង់ នឹងត្រូវចូលជាធរមាននៅថ្ងៃចន្ទនេះ (ម៉ោងនៅអាមេរិក)៕
៥៖ ប្រធានាធិបតីចិនលោក ស៊ី ជិនពីង បាននិយាយថា ការនាំចូលផលិតផល និងសេវាកម្មមកកាន់ប្រទេសចិនត្រូវបាន
វាយតម្លៃថា នឹងកើនឡើងរហូតដល់ ៤០ទ្រីលានដុល្លារ (៤០លានលានដុល្លារ) ក្នុងរយៈពេល ១៥ឆ្នាំ ខាងមុខនេះ៕
៦៖ ក្រុមសកម្មប្រយុទ្ធ ១២នាក់ និងកងកម្លាំងរដ្ឋាភិបាល ០៨នាក់ ត្រូវបានគេរាយការណ៍ថា បានស្លាប់បាត់បង់ជីវិតនៅក្នុង ការប្រយុទ្ធគ្នាយ៉ាងក្តៅគគុក នៅក្នុងខេត្ត ហ្គាសនី (Ghazni) នៃតំបន់ចុងភាគខាងកើតប្រទេសអាហ្វហ្គានីស្ថាន៕
