(ហែលស៊ីងគី)៖ អាកាយានិក​មួយរូបនៃអាកាសចរណ៍​ន័រវែស ត្រូវបានអាជ្ញាធរ​នាំខ្លួនចុះ​ពីលើយន្តហោះ​ក្នុងអាកាសយានដ្ឋានទីក្រុង ហែលស៊ីងគី (Helsinki) នៃប្រទេស​ហ្វាំងឡង់ បន្ទាប់ពីមាន​សេចក្តីរាយការណ៍​ថា រូបលោកមាន​អការៈស្រវឹង​ស្រា។ នេះបើតាមការ​ចេញផ្សាយ​ដោយទីភ្នាក់ងារព័ត៌មានចិន ស៊ីនហួរ នារសៀល​ថ្ងៃសៅរ៍ ទី០៣ ខែវិច្ឆិកា ឆ្នាំ២០១៨។

បន្ទាប់ពីការពិនិត្យរួចរាល់ អាជ្ញាធរនៃអាកាសយានដ្ឋានខាងលើនេះបានប្រាប់ឲ្យដឹងថា ពីឡុតនៅលើយន្តហោះន័រវែសរូបនោះ គឺមានផ្ទុកជាតិអាល់កុលក្នុងខ្លួនកម្រិតទាបបំផុត គឺពី ០ រហូត ០.៥ ប៉ុណ្ណោះ (ស្ទើរតែគ្មា)។ ការធ្វើបែបនេះក៏ព្រោះតែប៉ូលិស​នៃអាជ្ញាធរ​គ្រប់គ្រងវិស័យអាកាសចរណ៍ហ្វាំងឡង់ កំពុងតែអនុវត្តន៍​​បទបញ្ជាយ៉ាងតឹងរ៉ឹង ដោយមិន​អនុញ្ញាតឲ្យមានសារធាតុស្រវឹង​បន្តិចនោះឡើយ នៅក្នុងខ្លួន​អាកាសយានិក​គ្រប់ៗ​រូបតែម្តង។

ទោះជាបែបនេះក្តី ប៉ូលិសផ្នែកស៊ើបអង្កេត​របស់ហ្វាំងឡង់ឈ្មោះ មីកា ឡេណេ (Mika Laine) បានប្រាប់​​សារព័ត៌មានក្នុងតំបន់ថា «ការនាំយក​ពីឡុតខាងលើនេះចេញ​ពីយន្តហោះ គឺត្រូវបាន​ធ្វើឡើងដោយ​សមរម្យ ហើយក្រោយ​ការធ្វើតេស្តរួចរាល់​នោះ រូបលោក​គឺមិន​មានជាតិអាល់កុល​ដែលអាចបង្កជា​បញ្ហានោះឡើយ»។

គួរបញ្ជាក់ថា ក្រោយការពិនិត្យរួចពីឡុតរូបនោះត្រូវបានដោះលែង ហើយ​អាកាសចរណ៍​ន័រវែសដែលមានជើង​ហោះហើរ D8772 បាន​ធ្វើការ​ហោះហើរ​ពីទីក្រុង Helsinki ទៅកាន់ទីក្រុងឌូបៃ នៃប្រទេសអេមីរ៉ាត់អារ៉ាប់រួម នៅវេលា​ម៉ោង ២២៖៣០នាទីយប់​ថ្ងៃសុក្រ (ម៉ោងនៅតំបន់អឺរ៉ុប) ដោយសុវត្ថិភាព៕