(ប៉េកាំង)៖ អាជ្ញាធរចិន​នៅថ្ងៃសុក្រនេះ បានអះអាងថា សោកនាដកម្មរថយន្ដក្រុង​ធ្លាក់ចូល​ទឹកទន្លេ យ៉ាងសេ (Yangtze) នៃទីក្រុងចុងគីង (Chongqing) កាលពីថ្ងៃអាទិត្យ​សប្ដាហ៍មុន គឺបង្កឡើងដោយសារ​ការវាយតប់គ្នារវាង​អ្នកបើកបរ និងអ្នកដំណើរម្នាក់។ នេះបើតាម​ការចេញផ្សាយ​ដោយសារព័ត៌មាន CGTN នៅរសៀលថ្ងៃសុក្រ ទី០២ ខែវិច្ឆិកា ឆ្នាំ២០១៨។

អាជ្ញាធរចិននៅ​ក្នុងទីក្រុង Chongqing ផ្អែកវីដេអូកាមេរ៉ា​សុវត្ថិភាព​ឱ្យដឹងទៀតថា ស្ត្រីជាអ្នកដំណើរ​ម្នាក់មានឈ្មោះ លីវ (Liu) អាយុ ៤៨ឆ្នាំ បានវាយលើអ្នកបើកបរ​រថយន្ដក្រុង​ឈ្មោះ រ៉ាន (Ran) ដោយសារតែអ្នកបើកបរ​នេះ បើករថយន្ដហួស​ចំណតឈប់របស់​លោកស្រី។ លោកស្រី Liu បានយកទូរស័ព្ទ​ដៃវាយលើ លោក Ran ចំនួន ០២លើកនៅពេលកំពុងបើកបរ ហើយលោកក៏បាន​ព្យាយាម​បញ្ជាចង្កូតផងដែរ តែនៅពេលលោកតដៃ​ដើម្បីការពារខ្លួន រថយន្ដស្រាប់តែជ្រុលចង្កូច​ធ្លាក់ពីលើស្ពានចូល​ទឹកទន្លេ Yangtze តែម្ដង។

គួរបញ្ជាក់ថា វីដេអូកាម៉េរ៉ាសុវត្ថិភាព​ជាប់រថយន្ដក្រុងខាងលើ ត្រូវបានយក​ចេញពី SD card ដែលត្រូវបាន​ស្រង់ចេញពីទឹក ជាទីដែលរថយន្ដក្រុង​នេះធ្លាក់។ ចំណែកឯ បើតាមប្រព័ន្ធផ្សព្វផ្សាយ​នៅក្នុងតំបន់ មនុស្សសរុប ១៥នាក់ បានជិះនៅលើ​រថយន្ដ ក្រុងនេះដែលបាន​ធ្លាក់ចូលទឹក​ទន្លេ Yangtze ស្ថិតក្នុង​ស្រុក វ៉ានចូវ (Wanzhou) នៃទីក្រុង Chongqing ភាគនិរតីប្រទេស​ចិន ហើយ​សាកសព​មនុស្ស ១៣នាក់ ត្រូវស្រង់ចេញពីទឹក និង ០២នាក់បាត់ខ្លួន៕