(ដាម៉ាស់)៖ សាកសពជាង១,៥០០នាក់ ត្រូវបានរកឃើញ នៅក្នុងកន្លែងកប់សពធំថ្មីមួយទៀតនៅខេត្ត Raqqa ភាគខាងជើងស៉ីរី ដែលធ្លាប់ជាមូលដ្ឋានស្នូលរបស់ក្រុមភេរវករ ISIS។ នេះបើតាមសេចក្តីរាយការណ៍របស់កាសែតគាំទ្ររដ្ឋាភិបាលស៉ីរី al-Watan ដកស្រង់ការផ្សាយដោយទីភ្នាក់ងារព័ត៌មានចិន ស៉ីនហួរ នៅថ្ងៃពុធ ទី៣១ ខែតុលា ឆ្នាំ២០១៨។
ដោយយោងលើប្រភពព័ត៌មានពីផ្នែកសុខាភិបាល កាសែត al-Watan បានឲ្យដឹងថាសាកសពទាំងនោះសុទ្ធតែជាជនស៉ីវិលស្លូតត្រង់ ដែលបានបាត់បង់អាយុជីវិត ក្នុងការវាយប្រហារតាមផ្លូវអាកាស របស់ក្រុមយោធាចម្រុះអន្តរជាតិ ដែលដឹកនាំដោយអាមេរិក ទៅលើទីក្រុង Raqqa ខណៈគិតមកទល់ពេលនេះសាកសពប្រជាជនស៊ីវិលប្រហែល៤,០០០នាក់ហើយ ត្រូវបានរកឃើញនៅតាមកន្លែងកប់សាកសពធំៗនៅ Raqqa។
គួរជម្រាបថា យោធាចម្រុះអន្តរជាតិដឹកនាំដោយសហរដ្ឋអាមេរិក បានជួយគាំទ្រក្រុមសកម្មប្រយុទ្ធប្រជាធិបតេយ្យស៉ីរី (SDF) ដែលភាគច្រើនជាពួកឃើដ ក្នុងការដណ្តើមកាន់កាប់ទីក្រុង Raqqa យកមកវិញកាលពីឆ្នាំ២០១៧៕
