(កាប៊ុល)៖ អាជ្ញាធរ​អាហ្វហ្កានីស្ថាន បានអះអាងថា គ្មានមនុស្សណាម្នាក់​នៅមានជីវិតនោះឡើយ ក្នុងគ្រោះថ្នាក់ធ្លាក់​ឧទ្ធម្ភាគចក្រ​យោធាផ្ទុកមនុស្ស ២០នាក់ នៅឯ​ស្រុក អាណាដារ៉ា (Anar Dara) នៃខេត្ត ហ្វារ៉ាហ៍ (Farah) ប្រទេស​អាហ្វហ្កានីស្ថាន​នៅថ្ងៃពុធនេះ។ នេះបើតាម​ការចេញ​ផ្សាយ​ដោយសារព័ត៌មាន Sputnik នៅរសៀលថ្ងៃពុធ ទី៣១ ខែតុលា ឆ្នាំ២០១៨។

យោងតាមអាជ្ញាធរ​អាហ្វហ្កានីស្ថាន សមាជិកក្រុមប្រឹក្សាខេត្ត និងមន្ត្រីយោធា​ជាច្រើននាក់ គឺស្ថិតនៅក្នុងអ្នក​ដែលជិះនោះ លើឧទ្ធម្ភាគចក្រ​យោធាខាងលើ។ ដោយឡែក បើតាមប្រព័ន្ធផ្សព្វផ្សាយ​នៅក្នុងស្រុក មានឧទ្ធម្ភាគចក្រពីរគ្រឿង​បានធ្វើដំណើរ ហោះហើរអមជាមួយគ្នា តែមានមួយគ្រឿង​បានធ្លាក់ដោយមិនទាន់ដឹង​ពីមូលហេតុ។

គួររំលឹកថា កាលពី​ថ្ងៃទី១៥ ខែកញ្ញា ឧទ្ធម្ភាគចក្រយោធា​មួយគ្រឿង​បានធ្លាក់​នៅឯខេត្ត Farah ភាគខាង​លិចប្រទេស​អាហ្វហ្កានីស្ថាន ដោយផ្ដាច់ជីវិតមនុស្ស ០៥នាក់ ហើយកាលពី​ដើម​ខែកញ្ញា ឧទ្ធម្ភាគចក្រ Moldovan MI-8 ក៏បានធ្លាក់នៅក្នុងខេត្ត បាល់ (Balkh) ភាគខាងជើងប្រទេសអាហ្វហ្កានីស្ថានផងដែរ ដោយបង្កឱ្យពីឡុត ០២នាក់ និងអ្នករួមដំណើរ ១០នាក់ស្លាប់៕