(វ៉ាស៉ីនតោន)៖ ប្រធានាធិបតីអាមេរិកលោក ដូណាល់ ត្រាំ ត្រូវគេរាយការណ៍ថា គ្រោងនឹងចុះហត្ថលេខាលើបទបញ្ជាប្រតិបត្តិមួយ ដែលនឹងលុបចោលសិទ្ធិទទួលបានសញ្ជាតិដោយស្វ័យប្រវត្តិ សម្រាប់ទារករបស់ជនមិនមែនជាពលរដ្ឋអាមេរិក ឬជនអន្តោប្រវេសន៍ខុសច្បាប់ ដែលកើតនៅលើទឹកដីសហរដ្ឋអាមេរិក។ នេះបើតាមការដកស្រង់ការផ្សាយចេញពីសារព័ត៌មាន Bloomberg នៅល្ងាចថ្ងៃអង្គារ ទី៣០ ខែតុលា ឆ្នាំ២០១៨។
បើតាម Bloomberg លោក ដូណាល់ ត្រាំ បានថ្លែងក្នុងបទសម្ភាសន៍មួយជាមួយកម្មវិធី Axios នៃប៉ុស្តិ៍ទូរទស្សន៍អាមេរិក HBO យ៉ាងដូច្នេះថា «យើងគឺជាប្រទេសតែមួយគត់លើពិភពលោក ដែលបុគ្គលណាក៏ដោយឲ្យតែមកដល់ ហើយមានកូន កូននោះនឹងទទួលបានសញ្ជាតិជាពលរដ្ឋអាមេរិកដោយស្វ័យប្រវត្តិ។ វាគឺជារឿងគួរឲ្យអស់សំណើចខ្លាំងណាស់ ហើយរឿងនេះត្រូវតែបញ្ចប់»។
គួរជម្រាបថា ការគូសបញ្ជាក់បែបនេះ គឺជាការបង្ហាញពីជំហរកាន់តែតឹងរ៉ឹងរបស់លោក ត្រាំ ជុំវិញបញ្ហាអន្តោប្រវេសន៍ នៅចំពោះមុខការបោះឆ្នោតសភាពាក់កណ្តាលអាណត្តិ ដែលនឹងប្រព្រឹត្តទៅនាថ្ងៃទី០៦ ខែវិច្ឆិកាខាងមុខ ដោយវាគឺជាការបោះឆ្នោតយ៉ាងសំខាន់ក្នុងការសម្រេចអំណាចនៅក្នុងសភាអាមេរិក។ ដើមសប្តាហ៍នេះរដ្ឋបាល លោក ត្រាំ ក៏បានប្រកាសបញ្ជូនទ័ព ៥,២០០នាក់ ទៅកាន់ព្រំដែនភាគខាងត្បូង នាចុងសប្តាហ៍នេះផងដែរ នៅចំពោះមុខលំហូរចូលនៃជនភៀសខ្លួនពីព្រំដែនម៉ិចស៉ីកូ៕
\
