(ហ្សាការតា)៖ បំណែកសាកសព​មួយចំនួន ត្រូវបានគេរកឃើញ​ជាបណ្តើរៗហើយ នៅក្នុងផ្ទៃ​សមុទ្រក្បែរកោះជ្វាខាងលិច​ នៃប្រទេស​​​ឥណ្ឌូណេស៉ី ជាទីដែលយន្តហោះ​របស់អាកាសចរណ៍ Lion Air ដែលមានផ្ទុកមនុស្ស​សរុប ១៨៩នាក់ បានធ្លាក់នា​ព្រឹកថ្ងៃចន្ទនេះ។​​ នេះបើតាម​ការ​បញ្ជាក់ពីអាជ្ញាធរ​ឥណ្ឌូណេស៉ី ដកស្រង់សម្តី​ដោយទីភ្នាក់ងារព័ត៌មានចិន ស៉ីនហួរ នៅរសៀល​ថ្ងៃចន្ទ ទី២៩ ខែតុលា ឆ្នាំ២០១៨។

ទន្ទឹងនឹងនេះ អាជ្ញាធរ​​ឥណ្ឌូណេស៊ី​នៅរសៀលនេះ ក៏បានកំណត់ទីតាំង​ប្រអប់ខ្មៅទាំងពីរ​របស់​យន្ដហោះ Boeing 737 MAX 8 នៃ​ក្រុមហ៊ុន​អាកាសចរណ៍ Lion Air ផងដែរ ខណៈប្រតិបត្តិការ​ស្វែងរក និងជួយសង្រ្គោះ អាចនឹង​ត្រូវចំណាយពេលដល់ទៅ ០៧ថ្ងៃ ឬអាចបន្ថែម ០៣ថ្ងៃ​ទៀតក្នុងករណី​ចាំបាច់ ។

យន្ដហោះ Boeing 737 MAX 8 មានជើង​ហោះ​ហើរលេខ Flight JT-610 របស់​ក្រុមហ៊ុន Lion Air មានគោលដៅធ្វើដំណើរ​ពីរដ្ឋធានីហ្សាការតា ទៅកាន់ទីក្រុង​ផាងកាល ភីណាង (Pangkal Pinang), នៃកោះ បាងកា ប៊ែលីទុង (Bangka Belitung) នៃចង្កោម កោះស៊ូម៉ាត្រា​ជាមួយអ្នកដំណើរ និងក្រុមពីឡុត ១៨៩នាក់ ក្នុងនោះមាន​មនុស្ស​វ័យជំទង់ ១៧៨នាក់, កុមារម្នាក់, ទារក ០២នាក់, ពីឡុត ០២នាក់ និងក្រុមសហសេវិក ០៦នាក់ផ្សេងទៀត៕