(វ៉ាស៉ីនតោន)៖ ប្រភពពីសមត្ថកិច្ចអាមេរិកបានឲ្យដឹងថា ក្រុមភ្នាក់ងារស៉ើបអង្កេត FBI បានចាប់និងឃុំខ្លួន​ជនសង្ស័យម្នាក់ ដែល​អាច​​មានជាប់ពាក់ព័ន្ធនឹងករណីផ្ញើកញ្ចប់គួរឲ្យសង្ស័យជាបន្តបន្ទាប់ ដែលមានផ្ទុះគ្រឿងផ្ទុះកែច្នៃ ទៅកាន់​អ្នកនយោបាយ​ល្បីៗ​​នៃ​បក្ស​​ប្រជាធិបតេយ្យ ក៏ដូចជាបុគ្គលដែលមានទំនោររិះគន់ប្រឆាំងប្រធានាធិបតីអាមេរិក លោក ដូណាល់ ត្រាំ។ នេះបើតាមការដក​ស្រង់ការផ្សាយចេញពីសារព័ត៌មានអាមេរិក Fox News នៅយប់ថ្ងៃសុក្រ ទី២៦ ខែតុលា ឆ្នាំ២០១៨។

ខណៈពេលនេះមិនទាន់មានព័ត៌មានលម្អិតបន្ថែមឡើយ ហើយជនសង្ស័យខាងលើ មិនទាន់ត្រូវបានបញ្ជាក់អត្តសញ្ញាណនោះទេ ប៉ុន្តែប្រភពពីអាជ្ញាធរអាមេរិក បានបង្ហើបឲ្យដឹងជននោះថាជាបុរស ហើយ​ការចាប់ខ្លួនត្រូវបានធ្វើឡើងក្នុងរដ្ឋផ្លូរីដា ជា​​តំបន់​ដែល​ទីភ្នាក់​ងារ FBI សង្ស័យថាអាចជាប្រភពដើមនៃការផ្ញើ​កញ្ចប់​គ្រាប់​បែក​ជាច្រើន​​​នាអំឡុងសប្តាហ៍នេះ។

គួរជម្រាបថា មកទល់ថ្ងៃសុក្រនេះ កញ្ចប់គ្រាប់បែកគួរឲ្យសង្ស័យសរុបចំនួន១២កញ្ចប់ ត្រូវបានប៉ូលិសអាមេរិករកឃើញ។ សម្រាប់​បុគ្គលដែលជាគោល​ដៅ​នៃកញ្ចប់គ្រាប់បែកទាំងនោះ រួមមានដូចជា៖

១៖ មហាសេដ្ឋី​លោក ចច សូរ៉ូស (George Soros) (១កញ្ចប់)
២៖ អតីតរដ្ឋមន្ត្រី​ការបរទេស​អាមេរិក លោកស្រី ហ៊ីលឡារី គ្លីនតុន (Hillary Clinton) (១កញ្ចប់)
៣៖ អតីតប្រធានាធិបតី​អាមេរិក​លោក បារ៉ាក់ អូបាម៉ា (Barack Obama) (១កញ្ចប់)
៤៖ អតីតអនុប្រធានាធិបតី​អាមេរិក​លោក ចូ បៃដិន (Joe Biden) (២កញ្ចប់)
៥៖ អតីតនាយក CIA​ លោក ចន ប្រេនណិន (John Brennan) (១កញ្ចប់)
៦៖ អតីតអគ្គរដ្ឋអាជ្ញា​លោក អេរិច ហូលដឺ (Eric Holder) (១កញ្ចប់)
៧៖ សមាជិកសភាបក្ស​ប្រជាធិបតេយ្យ​មកពីរដ្ឋកាលីហ្វរញ៉ា លោកស្រី ម៉ាស៊ីន វ៉តធើស៍ (Maxine Waters) (២កញ្ចប់)
៨៖ តារាសម្ដែង Robert De Niro (១កញ្ចប់)
៩៖ ព្រឹទ្ធិសមាជិកបក្សប្រជាធិបតេយ្យ លោក ខូរី ប៊ុកឃើ (Cory Booker) (១កញ្ចប់)
១០៖ ​អតីត​នាយកស្ថាប័នស៉ើបការណ៍សម្ងាត់ជាតិ (DNI) លោក ជែម ឃ្លែបពើ (James Clapper) (១កញ្ចប់)៕