(គូឡាឡាំពួរ)៖ អតីតនាយករដ្ឋមន្ត្រី​ម៉ាឡេស៊ី​លោក ណាជីប រ៉ាហ្សាក់ ត្រូវបានតុលាការ​ចោទប្រកាន់បន្ថែម ជាមួយ​អតីតមន្ត្រីជាន់ខ្ពស់ពីររូបរបស់​លោក ពាក់ព័ន្ធនឹងការប្រើប្រាស់មូលនិធិរដ្ឋមិនត្រឹមត្រូវ។ នេះបើតាមការ​ចេញផ្សាយដោយ​ទីភ្នាក់ងារសារព័ត៌មាន​ចិន ស៊ីនហួរ នៅល្ងាច​ថ្ងៃព្រហស្បតិ៍ ទី២៥ ខែតុលា ឆ្នាំ២០១៨។

លោក ណាជីប និងអតីតអគ្គលេខាធិការ​រតនាគារជាតិ លោក ម៉ូដ អឺវ៉ាន សេរីហ្គា អាប់ឌុលឡាហ៍ (Mohd Irwan Serigar Abdullah) ត្រូវបានតុលាការ​ចោទប្រកាន់ រួមគ្នាពី​បទល្មើស ០៦ករណី ជុំវិញការរំលោភ​សេចក្ដីទុកចិត្ត ទាក់ទិននឹងមូលនិធិ ១.៥៨លានដុល្លារ។ ចំណែកឯ អតីតមន្ត្រីជាន់​ខ្ពស់ម្នាក់ទៀត ​មកពីអង្គភាពស៊ើបការណ៍​សំងាត់ម៉ាឡេស៊ី លោកស្រី ហាសាណាហ៍ អាប ហាមីដ (Hasanah Ab Hamid) ក៏ត្រូវបានតុលាការ​ចោទប្រកាន់ ពីបទរំលោភលើ​សេចក្ដីទុកចិត្តពាក់ព័ន្ធ​នឹងប្រាក់ ១២លានដុល្លារផងដែរ។

គួរបញ្ជាក់ថា ផ្អែកលើការចោទ​ប្រកាន់ថ្មីខាងលើដែលប្រព្រឹត្ត​នៅចន្លោះខែធ្នូ ឆ្នាំ២០១៦ និងខែធ្នូ ឆ្នាំ២០១៧ បានធ្វើឱ្យលោក ណាជីប ត្រូវប្រឈមមុខ​នឹងបទចោទចំនួន ៣២ករណី ក្នុងនោះរួមមានការរំលោភ​លើសេចក្ដីទុកចិត្ត រំលោភអំណាច លាងលុយកខ្វក់ ពាក់ព័ន្ធនឹង​មូលនិធិរដ្ឋ1MDB និង SRC International៕