(ប៉េកាំង)៖ នាយករដ្ឋមន្ត្រីជប៉ុនលោក ស៊ីនហ្សូ អាបេ បានធ្វើដំណើរទៅដល់ទីក្រុងប៉េកាំងហើយ នៅរសៀលថ្ងៃព្រហស្បតិ៍នេះ ដើម្បីបំពេញដំណើរទស្សនកិច្ចផ្លូវរដ្ឋនៅក្នុងប្រទេសចិន តបតាមការអញ្ជើញពីនាយករដ្ឋមន្ត្រីចិនលោក លី ខឺជាំង (Li Keqiang)។ នេះបើ តាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅរសៀលថ្ងៃព្រហស្បតិ៍ ទី២៥ ខែតុលា ឆ្នាំ២០១៨។
ជាមួយគ្នានោះដែរ បើតាមការគ្រោងទុកលោក អាបេ នឹងស្ថិតនៅក្នុងប្រទេសចិនពីថ្ងៃទី២៥ រហូតដល់ថ្ងៃទី២៧ ខែតុលានេះ ហើយនេះគឺជាដំណើរទស្សនកិច្ចផ្លូវរដ្ឋជាលើកដំបូងបំផុតរបស់លោកមកកាន់ទីក្រុងប៉េកាំង ក្នុងរយៈពេលជាង ០៧ឆ្នាំមកនេះ។ ដោយឡែកនៅក្នុងដំណើរទស្សនកិច្ចនេះលោក អាបេ ត្រូវបានគេរំពឹងថា នឹងផ្លាស់ប្ដូរយោបល់ក៏ដូចជាពិភាក្សាការងារជាមួយមេដឹកនាំទីក្រុងប៉េកាំង ជុំវិញការលើកកម្ពស់ការអភិវឌ្ឍទំនាក់ទំនងទ្វេភាគី និងក្ដីកង្វល់រួមពីបញ្ហានៅក្នុងតំបន់។
ក៏ប៉ុន្តែគួរឱ្យកត់សម្គាល់ ដំណើរទស្សនកិច្ចនេះធ្វើឡើងនៅចំពេលជប៉ុន និងចិន សុទ្ធតែកំពុងមានភាពតានតឹងផ្នែកពាណិជ្ជកម្មជាមួយសហរដ្ឋអាមេរិក ជាពិសេសគឺសង្រ្គាមដំឡើងពន្ធរបស់លោក ដូណាល់ ត្រាំ ដែលត្រូវបានអ្នកជំនាញខ្លះយល់ថា អាចនឹងក្លាយជាមូលហេតុមួយធ្វើឱ្យទីក្រុងតូក្យូ និងទីក្រុងប៉េកាំង មានទំនាក់ទំនងកាន់តែល្អនឹងគ្នា៕
