(ម៉ូស្គូ)៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន និងប្រធានាធិបតីអាមេរិកលោក ដូណាល់ ត្រាំ នឹងជួបមុខគ្នាជាថ្មីម្តងទៀតនៅក្នុងទីក្រុងប៉ារីស ប្រទេសបារាំង បន្ទាប់ពីមេដឹកនាំទាំងពីរបានជួបពិភាក្សាជាផ្លូវការនៅទីក្រុងហ៊ែលស៊ីងគី ប្រទេសហ្វាំងឡង់ កាលពីប៉ុន្មានខែមុន។ នេះបើតាមការចេញផ្សាយដោយសារព័ត៌មានចិន ស៊ីនហួរ ដកស្រង់សម្តីរបស់ជំនួយការប្រធានាធិបតីរុស្ស៊ីលោក យូរី យូសាកូវ (Yuri Ushakov) នាព្រឹកថ្ងៃពុធ ទី២៤ ខែតុលា ឆ្នាំ២០១៨។
ការជួបមុខគ្នាខាងលើនេះត្រូវបានគេរំពឹងថា នឹងកើតឡើងនៅថ្ងៃទី១១ ខែវិច្ឆិកា នៅពេលដែលប្រធានាធិបតីទាំងពីររូប និងថ្នាក់ដឹកនាំបណ្តាប្រទេសធំៗផ្សេងទៀត ត្រូវចូលរួមនៅក្នុងកិច្ចប្រជុំសំខាន់មួយ ដើម្បីរំលឹកដល់ការបញ្ចប់សង្គ្រាមលោកលើកទី ១ នៅទីក្រុងប៉ារីស ប្រទេសបារាំង។ វាក៏នឹងក្លាយជាចំណាប់អារម្មណ៍ខ្លាំងផងដែរសម្រាប់អន្តរជាតិ ព្រោះតែសហរដ្ឋអាមេរិកទើបតែបានប្រកាសដកខ្លួន ចេញពីសន្ធិសញ្ញាកំណត់ការដាក់ពង្រាយអាវុធនុយក្លេអ៊ែរ INF ជាមួយអតីតសហភាពសូវៀត (រុស្ស៊ីបច្ចុប្បន្ន) ដោយបានចោទប្រកាន់រុស្ស៊ីថា ជាអ្នករំលោភកិច្ចព្រមព្រៀងនេះមុន។
គួរបញ្ជាក់តាមលោក Ushakov ថា កិច្ចពិភាក្សាគ្នារវាងលោក ពូទីន និងលោក ត្រាំ ក៏នឹងត្រូវចូលរួមដោយមន្ត្រីកំពូលៗ មកពីប្រទេសទាំងសងខាងផងដែរ ខណៈដែលលោក ពូទីន ទើបតែបានទទួលស្វាគមន៍លោក ចន បូលតុន (John Bolton) ទីប្រឹក្សាសន្តិសុខជាតិអាមេរិក មកបំពេញទស្សនកិច្ចនៅទីក្រុងម៉ូស្គូ កាលពីដើមសប្តាហ៍នេះផងដែរ។ ដោយឡែកសម្រាប់ជំនួបនៅថ្ងៃទី១១ ខែវិច្ឆិកា នោះគឺមិនទាន់មានការបញ្ជាក់ពីប្រធានបទធំៗ ដែលមេដឹកនាំកំពូលទាំងពីរ អាចនឹងលើកយកទៅពិភាក្សាគ្នានោះឡើយ៕
