(ពិភពលោក)៖ នៅថ្ងៃអង្គារ ទី២៣ ខែតុលា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ ថ្លែងនៅចំពោះមុខសភាក្នុងរដ្ឋធានីអង់ការ៉ានាថ្ងៃអង្គារនេះ ប្រធានាធិបតីតួកគី លោក អឺដូហ្គាន់ បានលើកឡើងជុំវិញការបាត់បង់ជិវិតរបស់លោក Jamal Khashoggi ថា អារ៉ាប៊ីសាអូឌីត បានរៀបចំផែនការទុកមុនជាច្រើនថ្ងៃដើម្បីធ្វើឃាត អ្នកកាសែតរូបនេះ ពោលវាពុំមែនជាការបាត់បង់ជីវិតដោយចៃដន្យតាមការអះអាងរបស់ទីក្រុងរីយ៉ាដឡើយ៕
២៖ ទីបំផុតអគ្គលេខាធិការបក្សកុម្មុយនិស្តវៀតណាម លោក ង្វៀន ភូត្រុង (Nguyen Phu Trong) បានស្បថឡើងកាន់តំណែងជាប្រធានាធិបតីថ្មី របស់ប្រទេសវៀតណាមហើយ ក្រោយពីលោក ត្រាន ដៃហ្គ័ង (Tran Dai Quang) ប្រធានាធិបតីមុនបានទទួលមរណភាព កាលពីថ្ងៃទី២១ ខែកញ្ញា៕
៣៖ ប្រទេសចិន នាថ្ងៃអង្គារនេះ បានបើកសម្ពោធស្ពានឆ្លងសមុទ្រប្រវែងជាងគេបំផុតលើលោក ដែលតភ្ជាប់រវាងទីក្រុងហុងកុង ទីក្រុងហ្ស៊ូហៃ និងតំបន់ស្វយ័តម៉ាកាវ៕
៤៖ អ្នកនាំពាក្យយោធាអាមេរិក លោកវរសេនីយ៍ឯក រ៉ូប មែននីង (Rob Manning) បានឱ្យដឹងថា នាវាចម្បាំងអាមេរិក ០២គ្រឿង បានធ្វើដំណើរឆ្លងកាត់ច្រកសមុទ្រតៃវ៉ាន់ នៅថ្ងៃចន្ទសប្ដាហ៍នេះ ហើយនេះគឺជាសកម្មភាព ដែលតែងតែបង្កឱ្យមានភាពតានតឹងជាមួយចិន៕
៥៖ គ្រោះរញ្ជួយដីដែលមានកម្រិត ៦.១រ៉ិចទ័រ បានវាយប្រហារដែនសមុទ្រនៃកោះ យ៉ូណាគុនីជីម៉ា (Yonagunijima) ក្នុងខេត្តអូគីណាវ៉ា (Okinawa) ភាគខាងត្បូងប្រទេសជប៉ុន៕
៦៖ ក្រុមហ៊ុនលក់ដេញថ្លៃនៅអង់គ្លេស គ្រីស្ទី (Christie's) បានប្រកាសដាក់លក់របស់របរចំនួន ២២មុខ ដែលបានបន្សល់ទុកដោយអ្នកវិទ្យាសាស្រ្តដ៏ល្បីឈ្មោះលើពិភពលោក គឺលោក ស្ទេហ្វិន ហរឃីង (Stephen Hawking)៕
