(ការ៉ាស់កាស)៖ រដ្ឋមន្ត្រីទំនាក់ទំនង និងព័ត៌មានវេណេស៊ុយអេឡាលោក ហ្សក រ៉ូទ្រីហ្គែស (Jorge Rodriguez) បានប្រកាសឱ្យដឹងថា ជនសង្ស័យ ០៣នាក់បន្ថែមទៀតត្រូវបានចាប់ខ្លួនពីបទសង្ស័យថា ពួកគេមានជាប់ពាក់ព័ន្ធនឹងប៉ុនប៉ងសម្លាប់ លោកប្រធានាធិបតី នីកូឡាស់ ម៉ាឌរ៉ូ មិនបានសម្រេចកាលពីខែសីហាកន្លងទៅ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅរសៀលថ្ងៃព្រហស្បតិ៍ ទី១៨ ខែតុលា ឆ្នាំ២០១៨។
លោក Jorge Rodriguez បញ្ជាក់ដូចខាងលើនេះ នៅក្នុងសេចក្ដីថ្លែងការណ៍មួយចេញផ្សាយនៅថ្ងៃពុធ។ លោក Rodriguez បានអះអាងទៀតថា ក្នុងចំណោមជនសង្ស័យទាំង ០៣នាក់ ខាងលើដែលត្រូវបានចាប់ខ្លួននោះ ក៏មានមន្ត្រីទ័ពអាកាសចូលនិវត្តន៍មួយរូបផងដែរឈ្មោះ រ៉ាហ្វាអែល ឌីយ៉ាស (Rafael Diaz)។ បន្ថែមពីលើនេះ លោករដ្ឋមន្ត្រីក៏បានអះអាងដែរថា តាមរយៈការចាប់ខ្លួនអាចនឹងជួយឱ្យអាជ្ញាធរវេណេស៊ុយអេឡាវែកមុខអ្នកបញ្ជា និងរៀបចំគំរោងសម្លាប់លោក ម៉ាឌូរ៉ូ។
គួររលឹកថា អំឡុងពិធីរំលឹកខួបលើកទី ៨១ នៃឆ្មាំជាតិវេណេស៊ុយអេឡា កាលពីថ្ងៃទី០៤ ខែសីហា មានយន្ដហោះដ្រូនបំពាក់គ្រាប់បែកពីរគ្រឿង ត្រូវបានគេបញ្ជាឱ្យហោះទៅក្បែរលោក ម៉ាឌូ និងបំផ្ទុះវានៅពេលលោកកំពុងថ្លែងសុន្ទរកថា។ ចំណែកឯលោក ម៉ាឌូរ៉ូ បានចោទប្រកាន់ដោយមិនបានបង្ហាញភស្ដុងតាង សហរដ្ឋអាមេរិក និងកូឡុំប៊ីជាអ្នកនៅពីក្រោយការវាយប្រហារនេះ៕
