(តេហេរ៉ង់)៖ កងកម្លាំងឆ្មាំការពារបដិវត្តន៍នៃប្រទេសអ៉ីរ៉ង់ (IRGC) បានប្រកាសថា ទីបំផុតមេខ្លោងនៅពីក្រោយការវាយប្រហារ ដោយភេរវកម្មដ៏អាក្រក់កាលពីខែមុន នៅទីក្រុង អាវ៉ាស (Ahvaz) ភាគនិរតីអ៉ីរ៉ង់ ត្រូវបានកម្ចាត់ចោលហើយ នៅឯប្រទេសអ៉ីរ៉ាក់។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៉ីនហួរ នៅល្ងាចថ្ងៃពុធ ទី១៧ ខែតុលា ឆ្នាំ២០១៨។
យោងតាមសេចក្តីប្រកាសរបស់កងកម្លាំង IRGC អ៉ីរ៉ង់បានបើកប្រតិបត្តិការនៅក្នុងខេត្ត ឌីយ៉ាឡា (Diyala) នៃប្រទេសអ៉ីរ៉ាក់ កាលពីវេលាព្រឹកថ្ងៃអង្គារសប្តាហ៍នេះ ហើយបានសម្លាប់មេខ្លោងឈ្មោះ អាប៊ូ ដូហា (Abu Dhoha) ដែលជាអ្នករៀបចំផែនការភេរវកម្មដ៏ខ្មៅងងឹតនៅក្រុង Ahvaz រួមជាមួយគ្នីគ្នា ០៤នាក់ ទៀតរបស់ជននោះ។
គួរជម្រាបថា កាលពីថ្ងៃទី២២ ខែកញ្ញាកន្លងទៅ ខ្មាន់កាំភ្លើង០៤នាក់ក្នុងឯសណ្ឋានជាកងកម្លាំង IRGC បានធ្វើសកម្មភាពបាញ់រះទៅលើក្បួនព្យុហយាត្រាយោធាមួយនៅក្រុង Ahvaz នៃខេត្ត ឃូហ្សេស្ថាន (Khuzestan) ដើម្បីរំលឹកខួបនៃសង្រ្គាមអ៉ីរ៉ាក់-អ៉ីរ៉ង់ឆ្នាំកាលពី១៩៨០ ដល់ឆ្នាំ១៩៨៨។ ក្នុងហេតុការណ៍នោះមនុស្ស ២៥នាក់ បានបាត់បង់ជីវិត និងជាង ៦០នាក់បានរងរបួស៕
