(តូក្យូ)៖ ទីភ្នាក់ងារអវកាសជប៉ុន JAXA បានឲ្យដឹងថា ខ្លួននឹងពន្យារពេលនៃការចុះចតយាន Hayabusa-2 នៅលើអាចម៍ផ្កាយ Ryugu យ៉ាងឆាប់រហូតទាល់តែដល់ខែមករាឆ្នាំក្រោយ គឺមិនមែននៅខែតុលានេះតាមការគ្រោងទុកឡើយ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៉ីនហួរ នៅរសៀលថ្ងៃសុក្រ ទី១២ ខែតុលា ឆ្នាំ២០១៨។
ទីភ្នាក់ងារអវកាស JAXA បានបញ្ជាក់ថា ខ្លួនបានរកឃើញថា ផ្ទៃរបស់ Ryugu ដែលកំពុងស្ថិតនៅចម្ងាយប្រហែល ៣០០លានគីឡូម៉ែត្រពីផែនដី និងមានមុខកាត់៩០០ម៉ែត្រនោះ មានភាពរដិបរដុបខ្លាំងជាងអ្វីដែលធ្លាប់បានគិតកាលពីមុនមក ហើយ JAXA ត្រូវការពេលបន្ថែមទៀត ដើម្បីធានាថាការចុះចតនៃយាន Hayabusa-2 នឹងប្រព្រឹត្តទៅដោយសុវត្ថិភាព។
កាលពីថ្ងៃទី០៣ ខែតុលា យាន Hayabusa-2 បានបញ្ជូនយានតូចមួយឈ្មោះថា MASCOT ដែលអភិវឌ្ឍន៍ឡើងរួមគ្នាដោយទីភ្នាក់ងារអវកាសអាល្លឺម៉ង់ និងបារាំង ឲ្យទៅចុះចតនៅលើអាចម៍ផ្កាយ Ryugu ដោយជោគជ័យ ហើយនៅមុននោះ យានខ្នាតតូចពីរគ្រឿងទៀត ក៏ត្រូវបានទម្លាក់ចេញពី Hayabusa-2 ឲ្យទៅជាន់លើ Ryugu ដោយជោគជ័យផងដែរកាលពីថ្ងៃទី២២ ខែកញ្ញា។
យោងតាមរូបភាពនៃ Ryugu ដែលយានរ៉ូបូតទាំងនោះថតយកបាន ទីភ្នាក់ងារអវកាស JAXA បានឲ្យដឹងថា អាចម៍ផ្កាយនេះពុំសូវមានផ្ទៃដែលរាបស្មើ ហើយវាបែរជាសំបូរទៅដោយបណ្តុំថ្មរដិបរដុបច្រើន។ យាន Hayabusa-2 បានទៅដល់គោលដៅរបស់វាកាលពីថ្ងៃទី២៧ ខែមិថុនា នៅក្បែរអាចម៍ផ្កាយខាងលើ ក្រោយពីចំណាយជាងបីឆ្នាំក្នុងការធ្វើដំណើរឆ្លងកាត់ទីអវកាស។ បើតាម JAXA មកទល់ពេលនេះ Hayabusa-2 ពុំមានជួបបញ្ហាអ្វីទាំងអស់ នាអំឡុងការធ្វើដំណើរសរុបចម្ងាយ ៣.២ពាន់លានគីឡូម៉ែត្ររបស់វា។
យាន Hayabusa-2 ត្រូវគេកំណត់ថា នឹងធ្វើការចុះចតចំនួន ០៣លើកនៅលើអាចម៍ផ្កាយ Ryugu ដើម្បីប្រមូលយកគំរូតាងពីទីនោះ ហើយនឹងបន្តនៅក្បែរ Ryugu សម្រាប់រយៈពេលមួយឆ្នាំកន្លះទៀត។ នាអំឡុងពេលនោះ Hayabusa-2 នឹងធ្វើសកម្មភាពស្រាវជ្រាវរុករកជាច្រើន ដើម្បីព្យាយាមស្វែងរកតំរុយអំពីដំណើរវិវត្តន៍នៃប្រព័ន្ធព្រះអាទិត្យ ព្រមទាំងការកកើតដំបូងនៃទម្រង់ជីវិតជាដើម។
គួរជម្រាបថា បេសកកម្មរបស់ Hayabusa-2 នឹងបញ្ចប់ជាស្ថាពរ នៅពេលដែលវាវិលត្រឡប់មកផែនដីវិញនៅឆ្នាំ២០២០ ជាមួយនិងគំរូតាងដែលវាប្រមូលយកបានពី Ryugu ដោយគំរូតាងទាំងនោះ ត្រូវគេជឿជាក់ថា អាចមានផ្ទុកទឹក និងរូបធាតុនានា ដែលអាចមានលទ្ធភាពទ្រទ្រង់ជីវិតបាន និងអំណោយផលខ្លាំងបំផុត សម្រាប់ការសិក្សារកប្រភពដើមនៃទឹក និងជីវិតលើផែនដី៕
