(អាមេរិក)៖ នៅទីបំផុតជនជាតិអាមេរិកពីររូប គឺលោក William Nordhaus និងលោក Paul Romer បានឈ្នះពានរង្វាន់ណូប៊ែលសេដ្ឋកិច្ចរួមគ្នាតែម្តង ដោយទើបតែបានប្រកាសចេញនៅក្នុងការបិទបញ្ចប់ការប្រគល់ពានណូប៊ែលប្រចាំឆ្នាំ២០១៨ ដើម្បីត្រៀមបន្តទៅការប្រគល់ពានរង្វាន់ណូប៊ែលនានា នៅឆ្នាំបន្ទាប់ទៀត។ នេះបើតាមការចេញផ្សាយដោយ The Guardian នាយប់ថ្ងៃចន្ទ ទី០៨ ខែតុលា ឆ្នាំ២០១៨។
សេដ្ឋវិទូទាំងពីររូបខាងលើនេះ ស្ថិតនៅលេខរៀងជួរមុខនៅក្នុងការបំពេញការងារពាក់ព័ន្ធនឹងបញ្ហាបម្រែបម្រួលអាកាសធាតុ ជាពិសេសគឺតួនាទីរបស់រដ្ឋាភិបាលនានានៅលើពិភពលោកដែលជម្រុញការអភិវឌ្ឍ ទើបបង្កើតចេញទៅជាពានរង្វាន់ណូប៊ែលសេដ្ឋកិច្ចនេះ។ លោក William Nordhaus និងលោក Paul Romer បានទទួលកិត្តិយសដូចខាងលើនេះ ដោយសារតែការស្រាវជ្រាវរបស់សេដ្ឋវិទូទាំងពីរ ទៅលើមូលដ្ឋានគ្រឹះសំខាន់ៗ របស់បញ្ហាសេដ្ឋកិច្ចក្នុងយុគសម័យនេះ។
បន្ថែមពីខាងលើនេះទៀត ការព្រមានអំពីបញ្ហាបម្រែបម្រួលអាកាសធាតុ ដោយផ្សារភ្ជាប់នឹងការអភិវឌ្ឍសេដ្ឋកិច្ច មានន័យថា បើសិនជាការអភិវឌ្ឍសេដ្ឋកិច្ចពិភពលោកប្រព្រឹត្តទៅដោយមានលក្ខណៈគិតគូរពីបរិស្ថានព្រមគ្នានោះ វានឹងមិនបង្កឲ្យមានការឡើងកម្តៅសកលនោះឡើយ។ ដូច្នេះម្ចាស់ពាន់រង្វាន់ណូប៊ែលសេដ្ឋកិច្ច គឺជាអ្នកត្រួសត្រាយផ្លូវសម្រាប់ការអភិវឌ្ឍដោយគិតគូរលើបរិស្ថាន។
គួរបញ្ជាក់ថា តាមធនាគារកណ្តាល Riksbank របស់ប្រទេសស្វីស ដែលជាអ្នកចាត់ចែងពានរង្វាន់ខាងលើនេះបានបញ្ជាក់ថា បុរសទាំងពីររូបបានឈ្នះពានរង្វាន់នេះ ដែលពិតណាស់វាមិនមែនជាពាន ដែលត្រូវបានបង្កើតឡើងដោយផ្ទាល់ ចេញពីលោក Alfred Nobel នោះឡើយ ប៉ុន្តែព្រោះតែលោកទាំងពីរបានរៀបចំវិធីសាស្រ្ត ដើម្បីដោះស្រាយបញ្ហាសំខាន់ៗ និងបន្ទាន់មួយចំនួនស្តីអំពីរបៀប ដែលយើងបង្កើតឱ្យមានកំណើនសេដ្ឋកិច្ចយូរអង្វែង ប្រកបដោយនិរន្តរភាព និងមាននិរន្តរភាព នោះទើបពាននេះត្រូវបានបង្កើតឡើង និងជូនដល់លោកទាំងពីររួមគ្នាតែម្តង៕
