(ញូយ៉ក)៖ ពិតជាគ្រោះថ្នាក់ចរាចរណ៍ដ៏រន្ធត់ និងកម្រកើតមានបំផុតនៅរដ្ឋញូយ៉ក ភាគឦសា​សហរដ្ឋអាមេរិក ដោយរថយន្តប្រភេទវែង Limousine មួយគ្រឿង បានរេចង្កូតបុករះគេ​ឯងពេញ​ផ្លូវក្នុងទីក្រុងញូយ៉កសហរដ្ឋសហរដ្ឋអាមេរិក ដោយបានផ្តាច់ជីវិតមនុស្ស ២០នាក់ និងជាច្រើននាក់ទៀតរងរបួស។ នេះបើតាមការចេញផ្សាយដោយសារព័ត៌មានចិន ស៊ីនហួរ នាព្រឹកថ្ងៃចន្ទ ទី០៨ ខែតុលា ឆ្នាំ២០១៨។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីរសៀលថ្ងៃអាទិត្យ​ម្សិលមិញ ហើយរថយន្ត Limousine បានធ្វើដំណើរនៅលើដងផ្លូវ Route 30 នៅក្នុងសង្កាត់ Schoharie ដែលមានចម្ងាយ ២៥០គីឡូម៉ែត្រ នៃភាគខាងជើងទីក្រុងញូយ៉ក ប៉ុន្តែរថយន្តនេះ​មិនអាចបញ្ឈប់ខ្លួនឯងបានឡើង នៅពេលមកដល់ចំណុចបត់នៃផ្លូវ Route 30 ហើយវាក៏បាន​ជ្រុលទៅបុករថយន្ត SUV ដែលចតនៅក្បែរខាងផ្លូវតែម្តង។

ប៉ូលិសនៅតំបន់កើត​ហេតុបានអះអាងទៀតថា រថយន្តខាងលើនេះ​បានរេចង្កូត និងក្រឡាប់ចូលទៅក្នុង​ប្រឡាយក្បែរដងផ្លូវ ​ដោយសារតែមិនអាច​គ្រប់គ្រងលំនឹងទៀតបាន។ ដោយឡែក​មនុស្សស្លាប់ទាំង ២០នាក់ គឺសុទ្ធសឹងតែ​យុវវ័យ ហើយក្នុង​នោះ ១៨នាក់​ជាអ្នកជិះនៅក្នុងរថយន្ត Limousine ទាំងអស់​តែម្តង និងពីរនាក់ទៀត​ជាអ្នកឈរនៅ​ចិញ្ចើមផ្លូវ។

គួរបញ្ជាក់ថា អត្តសញ្ញាណ​នៃជនរងគ្រោះទាំងអស់ មិនទាន់ត្រូវបានប៉ូលិស​បញ្ជាក់នោះឡើយ ដោយគេត្រូវរង់ចាំស្វែងរកក្រុមគ្រួសារពួកគេជាមុនសិន ខណៈការស៊ើបអង្កេតកំពុងធ្វើឡើង ចំពោះគ្រោះ​ថ្នាក់ចរាចរណ៍ដ៏អាក្រក់​មួយនេះ ដែលមិនធ្លាប់​កើតមានឡើយ ចាប់​តាំងពី​ឆ្នាំ២០០៩ មក៕