(ពិភពលោក)៖ នៅថ្ងៃចន្ទ ទី០១ ខែតុលា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ ទីភ្នាក់ងារគ្រប់គ្រងគ្រោះមហន្តរាយជាតិ នៃប្រទេសឥណ្ឌូណេស៊ី បានឲ្យដឹងថា ចំនួនមនុស្សស្លាប់ដោយសារតែគ្រោះរញ្ជួយដី និងរលកយក្សស៊ូណាមិ នៅខេត្ត ស៊ូឡាវ៉េស៊ី (Sulawesi) ភាគកណ្តាលប្រទេសទីបំផុតបានកើនដល់ ១,២០៣នាក់ហើយ៕
២៖ អនុរដ្ឋមន្រ្តីការបរទេសអ៉ីរ៉ង់ លោក អាប់បាស់ អារ៉ាកជី (Abbas Araghchi) បានសង្កត់ធ្ងន់ថា ទណ្ឌកម្មអាមេរិកនាពេលថ្មីៗ នេះ ប្រឆាំងអ៉ីរ៉ង់នឹងប៉ះពាល់ធ្ងន់ធ្ងរទៅលើតម្លៃប្រេងសកល និងតំបន់មជ្ឈិមបូព៌ាទាំងមូល៕
៣៖ តុលាការក្នុងប្រទេសអាល្លឺម៉ង់ បានសម្រេចបង្គាប់ឲ្យធ្វើបត្យាប័នមន្រ្តីទូតអ៉ីរ៉ង់ឈ្មោះ អាស្សាដូលឡាហ៍ អាស្សាឌី (Assadollah Assadi) ដើម្បីនាំខ្លួនជនរូបនេះទៅឲ្យអាជ្ញាធរប៊ែលហ្សិក ដែលមានជាប់ក្នុងផែនការបំផ្ទុះគ្រាប់បែកនៅកន្លែងជួប ជុំគ្នានៃក្រុមគាំទ្របក្សប្រឆាំងអ៊ីរ៉ង់ ក្នុងប្រទេសបារាំងកាលពីពេលកន្លងទៅនេះ៕
៤៖ ក្រុមបុរាណវិទូអេហ្ស៉ីបបានប្រទះឃើញរូបគំនូរលើចម្លាក់ថ្ម ដ៏ចំណាស់ចំនួន ០២ផ្ទាំង នៅខេត្ត អាស្វាន (Aswan) នៅភាគអាគ្នេយ៍ប្រទេស៕
៥៖ កងកម្លាំងឆ្មាំបដិវត្តន៍អ៊ីរ៉ង់ បានបាញ់មីស៊ីលជាច្រើនគ្រាប់លើមូលដ្ឋានរបស់ក្រុមសកម្មប្រយុទ្ធនៅក្នុងប្រទេសស៊ីរី ដែលទីក្រុងតេហេរ៉ង់បានចោទប្រកាន់ថា ជាអ្នកទទួលខុសត្រូវចំពោះការវាយប្រហារភេរវកម្ម នៅក្នុងទីក្រុងអាវ៉ាស (Ahvaz) កាលពីខែកញ្ញា៕
៦៖ ព្យុះទីហ្វុងកំណាច ត្រាមី (Trami) ដែលបានចាប់ផ្តើមបោកបក់លើដែនដីជប៉ុនកាលពីថ្ងៃសៅរ៍សប្តាហ៍មុននោះ បានផ្តាច់ជីវិតមនុស្ស ០២នាក់ហើយ និងមនុស្សជាង ១០០នាក់ទៀតបានទទួលរងរបួស ខណៈមនុស្សពីរនាក់កំពុងបាត់ខ្លួន៕
