(ហ្សាការតា)៖ ទីភ្នាក់ងារ​ភូគព្ភសាស្ត្រនៃប្រទេសឥណ្ឌូណេស៊ី បានបញ្ជាក់ថា រលកយក្សដែលបង្កឡើងដោយ​​​គ្រោះរញ្ជួយដី​​៧.៧រ៉ិច​ទ័រ​ ដែលកើតឡើងនៅក្បែរកោះ Sulawesi ភាគកណ្តាល បានវាយប្រហារទៅលើ​ទីក្រុង Palu និងបង្កការបំផ្លិចបំផ្លាញមួយចំនួន។ នេះបើ​តាមការដកស្រង់ការផ្សាយចេញពីសារព័ត៌មានរុស្ស៊ី Russia Today (RT) នៅយប់ថ្ងៃសុក្រ ទី២៨ ខែកញ្ញា ឆ្នាំ២០១៨។

ការបញ្ជាក់ពីទីភ្នាក់ងារភូគព្ភសាស្ត្រឥណ្ឌូណេស៊ី ត្រូវបានធ្វើឡើង ក្រោយមានការបង្ហោះឃ្លីបវីដេអូ​មួយនៅលើបណ្តាញអ៊ីនធើណែត ​បង្ហាញឲ្យឃើញពីរលកដ៏ធំកម្ពស់​ប្រហែលពីរម៉ែត្រ បានបោកបក់សង្រ្គប់ទៅលើឆ្នេរនៃទីក្រុង Palu បន្ទាប់ពីមានហេតុការណ៍​រញ្ជួយ​ដី​យ៉ាងកក្រើក។ ទន្ទឹមនឹងនេះ បើតាមអាជ្ញាធរក្នុងតំបន់ ទឹករលកដែលបានជន់ជោរមកនោះ ហាក់បានថមថយទៅវិញហើយ ខណៈមិនទាន់​មានការបញ្ជាក់ថា មានមនុស្សរងគ្រោះ ដោយសារការវាយប្រហារពីរលកយក្សនេះនៅឡើយទេ។

គួរជម្រាបថា នៅមុនរញ្ជួយដីកម្រិត៧.៧រ៉ិចទ័រខាងលើ ក៏មានគ្រោះរញ្ជួយដី​មួយផ្សេងទៀតកម្រិត​៦.១រ៉ិចទ័រ ផងដែរ ដែលបាន​វាយ​​អង្រួនភាគកណ្តាលប្រទេសឥណ្ឌូណេស៊ី និងបានបណ្តាលឲ្យមនុស្សម្នាក់ស្លាប់ និងយ៉ាងតិច១០នាក់របួស៕