(ភ្នំពេញ)៖ លោក ពៅ គីសាន ហៅនាយ ឆើត ដែលអំឡុងមួយរយៈពេលចុងក្រោយនេះ នាយហាក់ដូចជាមានយីអ៊ុន មិនល្អសោះ ខណៈដែលស្ថានភាពជំងឺ មិនទាន់មានសភាពធូស្រាលផង ក៏ស្រាប់តែមកជួបគ្រោះថ្នាក់ចរាចរណ៍ បណ្តាលឲ្យរងរបួសធ្ងន់ ត្រូវបញ្ជូនចូលសង្គ្រោះនៅមន្ទីរពេទ្យ។
លោក ហេង ឡុង ដែលជាគូស្នេហ៍អ្នកនាង ចន ច័ន្ទលក្ខិណា បានបង្ហើបព័ត៌មានមកថា ពិតជាអាណិតខ្លាំងណាស់ លោក ពៅ គីសាន (នាយ ឆើត) មិនទាន់ជាពីជំងឺផង ឥឡូវក៏ត្រូវចូលសម្រាកពេទ្យ ដោយសារគ្រោះថ្នាក់ចរាចរណ៍ កាលពីយប់ថ្ងៃទី០៧ ខែកញ្ញា ឆ្នាំ២០១៨។ គាត់បានបាក់ឆ្អឹងដងកាំបិត និងឆ្អឹងជំនីចំនួន៥។
លោក ហេង ឡុង បញ្ជាក់ថា គ្រាន់តែឮដំណឹងភ្លាម សមាគមសិល្បករខ្មែរ បានចាត់តំណាងយកថវិកា ដែលជាមូលនិធិសិល្បករចាស់ជរា យកប្រគល់ជូនគ្រួសាររបស់គាត់ ដើម្បីសម្រាលក្នុងការចំណាយ។ រាល់ការចំណាយសមាគមសិល្បករខ្មែរ និងសមាគមគ្រូពេទ្យស្ម័គ្រចិត្តសម្ដេចតេជោ TYDA ជាអ្នករ៉ាប់រង។ បច្ចុប្បន្ននាយ ឆើត កំពុងសម្រាកព្យាបាល នៅមន្ទីរពេទ្យ ខណៈមានការយកចិត្តទុក្ខជួយសង្គ្រោះ ផងដែរ។
លោក ហេង ឡុង បានលើកឡើងទៀតថា «សមាគមក៏សូមគោរពថ្លែងអំណរគុណ ដល់សប្បុរសជនទាំងអស់ ដែលបានជួយឧបត្ថម្ភដល់ មូលនិធិសិល្បករចាស់ជរា ជាពិសេសសូមគោរពថ្លែងអំណរគុណ ដល់សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ដែលបានឧបត្ថម្ភថវិកា ដើម្បីទ្រទ្រង់ដល់សិល្បករចាស់ជរា ក្នុងរយ:ពេល ៥ឆ្នាំ»។
បន្ថែមពីលើនេះលោក ហេង ឡុង និយាយថា សមាគមសិល្បករខ្មែរ សូមគោរពជូនពរសម្តេចទាំងពីរ និងសប្បុរសជនទាំងអស់ ឲ្យមានសុខភាពល្អបរិបូរណ៌ កម្លាំងខ្លាំងក្លា ប្រាជ្ញាវាងវៃ អាយុយឺនយូរ ដើម្បីដឹកនាំកសាង និងអភិវឌ្ឍន៍ប្រទេសជាតិ ឲ្យកាន់តែរីកចម្រើន ថ្កុំថ្កើងរុងរឿងតទៅមុខទៀត៕