(ភ្នំពេញ)៖ កាលពីពេលថ្មីៗនេះមានការចាប់អារម្មណ៌ជាខ្លាំង ពេញបណ្ដាញសង្គម ក្រោយពីបានឃើញយុវជន២រូប ដែលបានតុបតែងខ្លួនគ្រងនូវឈុតយក្ស និងស្វា នៅក្នុងទម្រង់សិល្បៈល្ខោនខោល ជិះស៊ីក្លូ និងដើរផ្សព្វផ្សាយល្ខោនខោល ស្ទើរតែជុំវិញទីក្រុងភ្នំពេញ។ យ៉ាងណាមិញ យុវជន២រូបដែលបានគ្រងនូវឈុតយក្ស និងស្វា នេះការពិត គឺជាលោក តាន់ គឹមសួរ និងឌីជេអាចារ្យធំ ដែលបានផ្សព្វផ្សាយនូវល្ខោនខោល ដើម្បីឲ្យពលរដ្ឋខ្មែរទាំងឡាយ កុំបំភ្លេចនូវសិល្បៈបុរាណខ្មែរមួយនេះ។
ខណៈដែលមានការកោតសរសើរ រូបថតមួយសន្លឹកដែល លោក តាន់ គឹមសួរ និងឌីជេអាចារ្យធំ បានលុតជង្គង់ក្នុងឈុតល្ខោនខោល នៅមុខព្រះបរមរាជវាំង ព្រមទាំងមានផ្ទាំងមួយសន្លឹក ដោយបានសរសេរថា «សូមរក្សាពួកយើងផង ពួកយើងមិនចង់ឃ្លាតឆ្ងាយពីអ្នកទេ ល្ខោនខោលជារបស់កម្ពុជា»។ ជាការពិត រូបថតមួយសន្លឹកនេះ ធ្វើឲ្យមហាជនជាច្រើន ដែលនិយមលេង នៅលើបណ្តាញសង្គមហ្វសប៊ុក បានសម្តែងការមិនពេញចិត្ត ចំពោះការគ្រងនូវឈុតយក្ស និងស្វាហនុមាន ហើយបែរជាលុតជង្គង់ អង្វរនៅមុខសាធារណជន។
យ៉ាងណាមិញ ក្រោយពីមានការរិះគន់ ពីសំណាក់មហាជន ពេញបណ្តាញសង្គម ហ្វេសប៊ុក ស្រាប់តែលោក តាន់ គីមសួរ ក៏បានធ្វើការឆ្លើយតបភ្លាមៗ តែម្ដង ទៅនឹងពាក្យរិះគន់របស់មហាជន ដែលចោទថា ខ្លួននិងលោកអាចារ្យធំ កំពុងបន្ទាបបន្ថោកសិល្បៈល្ខោនខោលខ្មែរ។
ជាក់ស្ដែងដោយយោងតាមគណនីហ្វេសប៊ុកផ្លូវការ របស់លោក តាន់ គីមសួរ បានសរសេរសារបង្ហោះ ដោយរៀបរាប់យ៉ាងដូច្នេះថា «សំអាងទៅលើរូបភាពប៉ុន្មានសន្លឹក ដែលបានបង្ហោះ នៅលើបណ្តាញសង្គម កុំទាន់អាលរិះគន់ជេរប្រមាថ ដោយមិនសំចៃមាត់ និងកុំទាន់អាលវាយតម្លៃថា ពួកយើងកំពុងតែបន្ទាបបន្ថោក វប្បធម៌ដ៏ល្អប្រពៃ ដែលបន្សល់ទុកសម្រាប់កូនចៅ ជំនាន់ក្រោយរបស់ដូនតាអី។ អ្វីគ្រប់យ៉ាងនឹងធ្វើការបង្ហាញក្នុងវីដេអូឆាប់ៗនេះ សូមចាំទស្សនាទាំងអស់គ្នា (ខ្មែរមួយចំនួនចូលចិត្តធ្វើខ្លួន ជាអ្នកចេះដឹងខុសរបៀប)»៕
