(បរទេស)​៖ ថ្មីៗនេះអ្នកវិភាគដ៏ល្បីរបស់ Apple លោក Ming-Chi Kuo បានចែករំលែកថា ម៉ូដែល iPhone 17 Air ជំនាន់ថ្មីដែលរំពឹងថា នឹងចេញលក់នៅចុងឆ្នាំនេះនឹងមានរូបរាងឌីហ្សាញស្តើងបំផុតមិនធ្លាប់មាន ជាមួយនឹងកម្រាស់ត្រឹមតែ ៥.៥មីលីម៉ែត្រប៉ុណ្ណោះ។ នេះបើយោងតាមការចេញផ្សាយដោយ 9To5Mac។

គ្រាន់តែឈានចូលឆ្នាំថ្មីភ្លាម មានរបាយការណ៍ជាច្រើនបានចុះផ្សាយអំពី iPhone ជំនាន់ថ្មី ពោលគឺត្រកូល iPhone 17 ដែលត្រៀមនឹងបង្ហាញខ្លួននៅលើទីផ្សារនៅក្នុងខែកញ្ញា ចុងឆ្នាំនេះ។ ដោយឡែកនៅក្នុងរបាយការណ៍នេះ គឺនិយាយអំ​ពី iPhone 17 Air។ ដូចដែលប្រិយមិត្តបានជ្រាបរួចមកហើយថា Apple មានគម្រោងប្តូរ iPhone 17 Plus ទៅជា iPhone 17 Air ប៉ុន្តែតម្លៃវិញអាចថាថ្លៃជាងមុនគួរសម។

ទន្ទឹមនឹងនេះ មានរបាយការណ៍ជាច្រើនបា​ននិយាយអំពីរូបរាងរបស់​ iPhone 17 Air ដោយរបាយការណ៍ខ្លះបានលើកឡើងថា ម៉ូដែលនេះនឹងមានកម្រាស់ ៦.២៥មីលីម៉ែត្រ។ បើទោះជាកម្រាស់ប៉ុណ្ណឹងក៏ពិតមែន ប៉ុន្តែវានៅតែស្តើងខ្លាំងផងដែលបើធៀបនឹងកម្រាស់ iPhone 6 ជំនាន់មុនដែលមានកម្រាស់ប្រមាណ ៦.៩មីលីម៉ែត្រ។ តែយ៉ាងណា លោក Ming-Chi Kou បានបង្ហោះសារនៅថ្ងៃទី១០ ខែមករា នេះថា «iPhone 17 Air ដែលនឹងមកដល់របស់ Apple នឹងស្តើងជាងអ្វីដែលយើងធ្លាប់បានរំពឹងទុក»។ លោកបានបញ្ជាក់ថា «វានឹងមានកម្រាស់ស្តើងបំផុតត្រឹមតែ ៥.៥មីលីម៉ែត្រ» ប៉ុណ្ណោះ។ ខណៈកម្រាស់នេះត្រូវបានគេមើលឃើញថា វាស្រដៀងនឹងត្រកូល M4 iPad Pro ដោយក្នុងនោះ iPad Pro ទំហំ ១១អ៊ីញ មានកម្រាស់ ៥.៣មីលីម៉ែត្រ និង​ iPad Pro ទំហំ ១៣អ៊ីញវិញ មានកម្រាស់ស្តើងបំផុត ៥.១អ៊ីញ។

តែយ៉ាងណា អ្វីដែលគេបារម្មណ៍នោះគឺ​ កន្លែងដាក់កាមេរ៉ាព្រោះការឌីហ្សាញរូបរាងស្តើងបំផុតនេះអាចប៉ះទង្គិចដល់ទីតាំងកាមេរ៉ាខ្លាំងជាងគេ។

គួរជម្រាបថា លោក Kuo ក៏បានកត់សម្គាល់ផងដែរថា iPhone 17 Air ដែលជាឧបករណ៍ស្តើងបំផុតនេះនឹងមិនមែនកន្លែងដាក់ស៊ីមនោះទេ មានន័យថាម៉ូដែលនេះនឹងប្រើ eSIM សុទ្ធតែម្តង៕