(បន្ទាយមានជ័យ)៖ ធនាគារ ខេប៊ីប្រាសាក់ ប្រកាសដាក់ឱ្យដំណើរការជាបឋមនូវបណ្ណាល័យទី៤៦ របស់ខ្លួននៅសាលាបឋមសិក្សាទឹកជោរ ស្ថិតក្នុងភូមិទឹកជោ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ នាថ្ងៃទី០៩ ខែ ធ្នូ ឆ្នាំ២០២៤។ សកម្មភាពនេះឆ្លុះបញ្ចាំងពីកិច្ចខិតខំប្រឹងប្រែងផ្នែកទំនួលខុសត្រូវសង្គមឥតឈប់ឈររបស់ធនាគារក្នុងការបណ្ដុះសេចក្ដីស្រឡាញ់ក្នុងការអានក្នុងចំណោមយុវជនកម្ពុជា និងគាំទ្រដល់ការអភិវឌ្ឍការអប់រំនៅក្នុងសហគមន៍មូលដ្ឋាន។
បណ្ណាល័យដែលទើបកសាងថ្មីនេះ ត្រូវបានបំពាក់ដោយសៀវភៅ និងសម្ភារៈអប់រំប្រកបដោយគុណភាពជាច្រើន ដើម្បីបំផុសទឹកចិត្តសិស្សក្នុងការខិតខំប្រឹងប្រែងសិក្សា និងលើកកម្ពស់ទម្លាប់សិក្សាពេញមួយជីវិត។ ធនាគារ ខេប៊ីប្រាសាក់ ប្តេជ្ញាផ្តល់សម្ភារៈធនធានដែលជំរុញឱកាសសិក្សា ដែលរួមចំណែកដល់ការរីកលូតលាស់ និងការបង្កើនសមត្ថភាពដល់មនុស្សជំនាន់ក្រោយ។
សូមបញ្ជាក់ថា គិតត្រឹមខែធ្នូ ឆ្នាំ២០២៤ នេះ គម្រោងបណ្ណាល័យខេប៊ីប្រាសាក់ដាក់ឱ្យប្រើប្រាស់ ចំនួន៤៦ អគារគ្របដណ្តប់លើភូមិចំនួន៤៩៩ ភូមិ ដែលមានចំនួនគ្រួសារសរុប ១០៨,៨១០ គ្រួសារ មានប្រជាជនសរុបចំនួន៤៤៦,៤២៧នាក់ នៅក្នុង១៤ ខេត្តរួមមាន កំពង់ស្ពឺ កំពង់ចាម កណ្ដាល ព្រៃវែង កំពង់ធំ សៀមរាប តាកែវ ព្រះវិហារ បាត់ដំបង ស្វាយរៀង បន្ទាយមានជ័យ កែប ពោធិ៍សាត់ និងត្បូងឃ្មុំ ហើយមានសិស្សានុសិស្សដែលទទួលផលផ្ទាល់ពីគម្រោងបណ្ណាល័យនេះចំនួន ១៧១,៤៨៥ នាក់៕
