(ប៊ែរឡាំង)៖ ប្រធានក្រុមជម្រើសជាតិអង់គ្លេស Harry Kane បានជាសះស្បើយពីរបួសខ្នង ហើយកំពុងទន្ទឹងរង់ចាំប្រកួតក្នុងព្រឹត្តិការណ៍ European Championship ដែលនឹងមកដល់នាពេលខាងមុខ។ នេះបើយោងតាមសម្តីអ្នកចាត់ការក្រុមបាល់ទាត់ជម្រើសជាតិអង់គ្លេស Gareth Southgate ហើយត្រូវបានចុះផ្សាយដោយសារព័ត៌មាន CNA នៅថ្ងៃទី២៣ ខែឧសភា ឆ្នាំ២០២៤។
ខ្សែប្រយុទ្ធ Bayern Munich រូបនេះ បានខកខានការប្រកួត ២លើកចុងក្រោយរបស់ក្លិប ក្នុងលីគ Bundesliga ដោយសារមានរបួសខ្នង ដែលបានកើតឡើង ចាប់តាំងពីមុនការប្រកួតវគ្គពាក់កណ្តាលផ្តាច់ព្រ័ត្រ UEFA Champions League របស់ពួកគេចាញ់ Real Madrid កាលពី ២សប្តាហ៍មុន។
អ្នកចាត់ការ Southgate បានដាក់បញ្ចូលខ្សែប្រយុទ្ធវ័យ ៣០ឆ្នាំរូបនេះ ចូលក្នុងក្រុមបណ្តោះអាសន្នរបស់លោកសម្រាប់ព្រឹត្តិការណ៍ European Championship ដែលនឹងលេងចាប់ពីថ្ងៃទី១៤ ខែមិថុនា ដល់ថ្ងៃទី១៤ ខែកក្កដាខាងមុខ។
Kane រកបាន៤៤គ្រាប់ ក្នុងការបង្ហាញខ្លួន ៤៥លើក ក្នុងការប្រកួតទាំងអស់នារដូវកាលដំបូងរបស់លោក នៅឯក្លិបអាល្លឺម៉ង់ ក្នុងនោះរួមទាំងការរកបាន Hat-tricks ៤លើកក្នុងលីគ Bundesliga ផងដែរ។
សូមជម្រាបថា អង់គ្លេសនឹងប្រកួតមិត្តភាព ២លើក ទល់នឹងក្រុមបូស្នៀនៅថ្ងៃទី០៣ ខែមិថុនា នៅកីឡដ្ឋាន St. James' Park និងក្រុមអ៊ីស្លង់ នៅថ្ងៃទី០៧ ខែមិថុនា នៅកីឡដ្ឋាន Wembley មុនពេលចាប់ផ្តើមយុទ្ធនាការ Euro ដែលពួកគេស្ថិតក្នុងពូលជាមួយស៊ែប៊ី, ដាណឺម៉ាក និងស្លូវេនី៕