(ព្រះសីហនុ)៖ ព្រឹត្តិការណ៍បង្ហោះខ្លែងអន្តរជាតិ Skyfest ២.០ ឆ្នាំ២០២៤ បានធ្វើឡើងរយៈពេល២ថ្ងៃ ដែលកម្មពិធីបើកបានប្រកាសបើក កាលពីថ្ងៃទី២៩ ខែមីនា ឆ្នាំ២០២៤ ក្រោមអធិបតីភាព លោក នី ផល្លី រដ្ឋលេខាធិការក្រសួងទេសចរណ៍ និងលោក ឡុង ឌីម៉ង់ អភិបាលរងខេត្តព្រះសីហនុ ស្ថិតនៅភូមិអុង ឃុំរាម ស្រុកព្រៃនប់ ខេត្តព្រះសីហនុ។

លោក Edward Lee នាយកគ្រប់គ្រងនៃក្រុមហ៊ុន Belt Road Capital Management មានប្រសាសន៍ក្នុងកម្មពិធីថា ខេត្តព្រះសីហនុ គឺជាខេត្តយុទ្ធសាស្ត្រមួយរបស់កម្ពុជា ទាក់ទងនឹងសេដ្ឋកិច្ច ភស្តុភារ និងទេសចរណ៍។ ហើយជាមួយនឹងកម្មវិធីវិនិយោគ ពិសេសរបស់រដ្ឋាភិបាលនាពេលថ្មីៗនេះ ក្រោមការដឹកនាំរបស់សម្ដេចនាយករដ្ឋមន្ត្រី ហ៊ុន ម៉ាណែត យើងជឿជាក់យ៉ាងមុតមាំថា វានឹងទាក់ទាញការវិនិយោគទាំងក្នុង និងក្រៅប្រទេស មកកាន់ទីក្រុង និងនាំខេត្តព្រះសីហនុ ទៅកាន់កម្រិតបន្ទាប់ក្នុងរយៈពេលដ៏ខ្លី។ លើសពីនេះ ជាមួយនឹងការវិនិយោគលំដាប់ពិភពលោកដ៏ធំមហិមារបស់ Canopysands ទៅក្នុងគម្រោង Bay of Lights នេះនឹងមិនត្រឹមតែធ្វើឱ្យខេត្តព្រះសីហនុ ក្លាយជាទីក្រុងយុទ្ធសាស្ត្រ សម្រាប់ប្រទេសកម្ពុជាប៉ុណ្ណោះទេ ប៉ុន្តែថែមទាំងសម្រាប់តំបន់ទាំងមូល នាពេលអនាគតផងដែរ។

ក្នុងឱកាសនោះលោក ឡុង ឌីម៉ង់ បានលើកឡើងថា ដើម្បីទ្រទ្រង់ដល់វិស័យសេដ្ឋកិច្ចសង្គម និងទេសចរណ៍ ឱ្យមានការរីកចម្រើន ប្រកបដោយ គុណភាព និងនិរន្តភាព រដ្ឋបាលខេត្តព្រះសីហនុ បាននឹងកំពុងយកចិត្តទុកដាក់ ក្នុងការអភិវឌ្ឍ និងស្តារហេដ្ឋារចនាសម្ព័ន្ធរូបវ័ន្ត រៀបចំកែលម្អឆ្នេរសមុទ្រ ទឹកស្អាត អគ្គិសនី ការគ្រប់គ្រងសំណល់រឹងរាវ បន្ទប់ទឹកសាធារណៈ ការរៀបចំសួនច្បារ និងកំពង់ផែទេសចរណ៍ ស្តង់ដាសេវាកម្មទេសចរណ៍ ជាពិសេសពង្រឹងការគ្រប់គ្រងសន្តិសុខ សុវត្ថិភាព សណ្តាប់ធ្នាប់សាធារណៈ និងសេវារថយន្តក្រុង រួមទាំងជំរុញយុទ្ធនាការទីក្រុងស្អាត ឆ្នេរស្អាត ទាំងនៅក្នុងទីក្រុង ទីប្រជុំជន និងនៅតាមតំបន់ឆ្នេរឱ្យកាន់ តែមានសោភ័ណភាព បរិស្ថានល្អប្រសើរ។

លោកបានកោតសរសើរពិធីបើកព្រឹត្តិការណ៍ «ស្តាយ ហ្វេស ខេមបូឌា ២០២៤» នៅតំបន់អភិវឌ្ឍ ទេសចរណ៍នាឱកាសនេះ ស្របពេលដែលខេត្តព្រះសីហនុ បានកំពុងដំណើការរៀបចំព្រឹត្តិការណ៍ ពិព័រណ៍ទេសចរណ៍ និងពាណិជ្ជកម្ម ក្រោមប្រធានបទ «ទេសចរណ៍ ផ្តល់ឱកាស សម្រាប់ទាំងអស់គ្នា» ដែលប្រារព្ធឡើងក្នុងគោលបំណង ដើម្បីពង្រឹងកិច្ចសហប្រតិបត្តិ ការវិនិយោគ ពាណិជ្ជកម្ម ការអភិវឌ្ឍ និងផ្សព្វផ្សាយ សេវាកម្មទេសចរណ៍ នៃច្រករបៀងសេដ្ឋកិច្ចខេត្តជាប់មាត់សមុទ្ររបស់ប្រទេសទាំង៣ រួមមានកម្ពុជា វៀតណាម ថៃ។ ហើយការផ្តួចផ្តើមរៀបចំព្រឹត្តិការណ៍ នេះឡើងបង្កើតជាផលិតផលទេសចរណ៍ដ៏ទាក់ទាញ ដើម្បីផ្តល់ការកំសាន្ត និងចែករំលែកបទពិសោធន៍ថ្មីៗ ក្នុងព្រះរាជាណាចក្រកម្ពុជាជារួម និងដោយឡែកខេត្តព្រះសីហនុ។

លោក នី ផល្លី បានថ្លែងអំណរគុណចំពោះ បណ្ដាលក្រុម ហ៊ុនវិស័យឯកជន ដែលតែងតែសហការជាមួយក្រសួងទេសចរណ៍ ក៏ដូចជារដ្ឋបាលខេត្តព្រះសីហនុ ក្នុងការជំរុញផ្សព្វផ្សាយវិស័យទេសចរណ៍ ក្នុងប្រទេសកម្ពុជាជាពិសេសក្នុងខេត្តតំបន់ឆ្នេរសមុទ្រកម្ពុជា ដែលបានប្រសិទ្ធនាមថា ជាតារារះនាទិសនិរតី តាមរយៈការចូលរួមព្រឹត្តិការណ៍ ទេសចរណ៍នានាក្នុងនាមក្រសួងទេសចរណ៍ លោកបានថ្លែងអំណរគុណ ចំពោះស្ថាប័នជាតិអន្តរជាតិ ជាពិសេសរដ្ឋបាលខេត្តព្រះសីហនុ ដែលគាំទ្រនិងបន្តគាំទ្រដល់ដំណើរការ រៀបចំមានព្រឹត្តិការណ៍ថ្មីៗដ៏មានសារៈសំខាន់ ដើម្បីទាក់ទាញភ្ញៀវ ជាតិនិងអន្តរជាតិ និងធុរជនធុរកិច្ចជនទាំងអស់។

លោកបញ្ជាក់បន្ថែមថា ដោយមានការយកចិត្តទុកដាក់ពី រាជរដ្ឋាភិបាលនីតិកាលទី៧ បានបន្តកំណត់វិស័យទេសចរណ៍ ដែលជាមាសបៃតង ជាវិស័យអាទិភាពនៅក្នុង «យុទ្ធសាស្រ្តបញ្ចកោណ ដំណាក់កាលទី១»។ ក្នុងបញ្ចកោណទី២ បានរំលេចពីភាពចាំបាច់ នៃការធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែង ដោយបានបញ្ជាក់ពីគោល ដៅនៃវិស័យទេសចរណ៍កម្ពុជា ត្រង់មុំទី១ ចំណុចទី៥ គឺ «ការបន្តលើកកម្ពស់វិស័យទេសចរណ៍ ជាពិសេសការបន្តជំរុញការអភិវឌ្ឍ ទេសចរណ៍វប្បធម៌ និងធម្មជាតិ ដោយបន្ថែមទេសចរណ៍បៃតង ស្អាត និងវៃឆ្លាត ការជំរុញការបង្កើតប្រភេទផលិតផលទេសចរណ៍ថ្មីៗ ដែលមានតម្លៃបន្ថែមខ្ពស់ និងទេសចរណ៍ធុរកិច្ច តាមរយៈការលើកកម្ពស់ការអនុវត្ត ក៏ដូចជាការរៀបចំ និងការដាក់ចេញគោលនយោបាយ និងផែនការមេអភិវឌ្ឍន៍វិស័យ ទេសចរណ៍នានា»។
ក្នុងព្រឹត្តិការណ៍ដ៏ទាក់ទាញនេះផងដែរ ដោយមានបណ្ដាប្រទេសចំនួន ៦ ដែលបាន ចូលរួមបង្ហាញ និងបង្ហោះខ្លែងឯករួមមានប្រទេសកម្ពុជា វៀតណាម ចិន ថៃ សិង្ហបុរី និងឥណ្ឌូនេស៊ី។

ក្នុងឱកាសដ៏ពិសេសពិសាលនេះដែរ លោក Pongtorn Tangmanuswong ប្រធាន និងជាអ្នកគ្រប់គ្រងប្រចាំប្រទេសនៃក្រុមហ៊ុន Chevron Cambodia Limited លោកពិតជារីករាយ ដែលបានមកទីនេះ ដើម្បីធ្វើជាសាក្សីក្នុងពិធីបើកព្រឹត្តិការណ៍ Skyfest 2.0 ឆ្នាំ 2024 ហើយក្នុងពេលជាមួយគ្នានេះ ក្នុងនាមក្រុមហ៊ុន Chevron យើងមានកិត្តិយសដែលបានក្លាយជា អ្នកឧបត្ថម្ភធំមួយនៃព្រឹត្តិការណ៍នេះ ដែលនឹងទាក់ទាញអ្នកទស្សនាជាង 20,000 នាក់ និងជាច្រើនទៀតតាមរយៈអ៊ីនធឺណិត និងប្រព័ន្ធផ្សព្វផ្សាយក្រៅបណ្តាញ។

លោកបានថ្លែងអំណរគុណជាថ្មីម្តងទៀត ដល់មន្ត្រីរដ្ឋាភិបាលទាំងអស់ ក្រុម Canopysands និង Prince Holding ដៃគូអាជីវកម្មផ្សេងទៀត និងសហការី Chevron សម្រាប់ការធ្វើឱ្យព្រឹត្តិការណ៍ដ៏អស្ចារ្យនេះកើតឡើង។

លោក David នាយកក្រុមហ៊ុន បេ អហ្វ ឡៃថ៍ សម្តែងនូវអារម្មណ៍រីករាយ និងមានមោទនភាពជាខ្លាំង ដែលលោកបានពីរការបើកសម្ពោធមហោស្រពខ្លែងអន្តរជាតិលើកទី២ នៅទីនេះ។ ទើបតែជាងមួយឆ្នាំមុន កន្លែងនេះគ្រាន់តែជាសុបិន និមិត្តរង់ចាំការហោះហើរ។ យ៉ាងណាក៏ដោយ តាមរយៈកិច្ចខិតខំប្រឹងប្រែងរបស់ក្រុមរបស់យើង និងការគាំទ្រដ៏មានតម្លៃពីអ្នកឧបត្ថម្ភ និងដៃគូអាជីវកម្មរបស់យើង យើងបានប្រែក្លាយសុបិននេះ ឱ្យក្លាយជាការពិតដ៏រស់រវើក។

លោក​ថ្លែង​អំណរគុណ​យ៉ាង​ជ្រាលជ្រៅ ​ចំពោះ​អ្នក​ឧបត្ថម្ភ ដែល​ការ​ប្ដេជ្ញា​ចិត្ត និង​ចិត្ត​សប្បុរស​ឥត​ងាករេ​ របស់​គាត់​បាន​ក្លាយ​ជា​សារៈ​សំខាន់​ក្នុង​ការ​នាំ​យក​ពិធីបុណ្យ​នេះ​ទៅ​កាន់​ជីវិត។ ជំនឿលើចក្ខុវិស័យធ្វើឲ្យព្រឹត្តិការណ៍នេះ អាចទៅដោយរលូន ប៉ុន្តែថែមទាំងបានជួយយើងបង្ហាញពីភាពស្រស់ស្អាត និងសម្បូរបែបនៃវប្បធម៌នៃខេត្តព្រះសីហនុ ទៅកាន់ពិភពលោកផងដែរ។ ចំពោះដៃគូអាជីវកម្មដ៏គួរឱ្យគោរ លោកសូមថ្លែងអំណរគុណ ចំពោះការសហការ និងការចែករំលែកភាពរីករាយរ ជំនាញ ធនធាន និងកិច្ចខិតខំប្រឹងប្រែងមិនចេះនឿយហត់ របស់អ្នកបានដើរតួនាទីយ៉ាងសំខាន់ ក្នុងការរៀបចំភាពជោគជ័យរបស់ Bay of Lights ជាទិសដៅដ៏អ៊ូអរសម្រាប់ភ្ញៀវទេសចរក្នុងស្រុក និងក្រៅប្រទេស។ រួមគ្នា យើងបានបង្កើតបទពិសោធន៍មួយ ដែលទាក់ទាញការស្រមើស្រមៃ និងបន្សល់ទុកនូវចំណាប់អារម្មណ៍យូរអង្វែង ចំពោះអ្នកដែលបានទស្សនា៕