(ប្រាក)៖ សាធារណរដ្ឋឆេក បានសម្រេចតែងតាំងលោក Ivan Hasek ជាលើកទី២ ក្នុងនាមជាគ្រូបង្វឹកក្រុមបាល់ទាត់ជម្រើសជាតិ នៅថ្ងៃព្រហស្បតិ៍ ដើម្បីដឹកនាំក្រុមដើម្បីប្រជែងពានរង្វាន់ European Championship ក្នុងឆ្នាំនេះ។ នេះបើយោងតាមសារព័ត៌មាន CNA ចេញផ្សាយនៅថ្ងៃទី០៥ ខែមករា ឆ្នាំ២០២៤។
បុរសវ័យ ៦០ឆ្នាំខាងលើនេះ បានបន្តតំណែងពីលោក Jaroslav Silhavy ដើម្បីដឹកនាំក្រុមឆេក ទៅចូលរួមប្រកួតក្នុងព្រឹត្តិការណ៍ជើងឯកអឺរ៉ុប European Championship នៅប្រទេសអាល្លឺម៉ង់។
លោក Silhavy បានលាលែងចេញពីតំណែង បន្ទាប់ពីមានការរិះគន់ទៅលើទម្រង់លេងមួយចំនួនរបស់ក្រុម ក្នុងពេលប្រកួតជម្រុះ។
លោក Hasek ដែលធ្លាប់ជាប្រធានក្រុមជម្រើសជាតិឆេកូស្លូវ៉ាគី អំឡុងពេលពួកគេ ឡើងដល់វគ្គ ៨ក្រុមចុងក្រោយ World Cup ក្នុងឆ្នាំ១៩៩០ នោះ ធ្លាប់បានដឹកនាំក្លិប Sparta Prague ដណ្តើមបានពានរង្វាន់លីគចំនួន ២លើក ក្នុងនាមជាគ្រូបង្វឹក និងធ្លាប់ធ្វើជាគ្រូបង្វឹករយៈពេលខ្លី ដឹកនាំក្រុមជម្រើសជាតិឆេក ក្នុងឆ្នាំ២០០៩ ផងដែរ។
អតីតខ្សែបម្រើក្លិប Sparta Prague ដែលបានចំណាយពេលវេលាភាគច្រើន នៃការងារជាអ្នកចាត់ការរបស់លោក នៅក្រៅប្រទេសនោះ បានចុះកិច្ចសន្យាដឹកនាំឆេករហូតដល់យុទ្ធនាការ ប្រកួតជម្រុះ World Cup ឆ្នាំ២០២៦។
សូមជម្រាបថា Euro 2024 នឹងចាប់ផ្តើមនៅទីក្រុង Munich នាថ្ងៃទី១៤ ខែមិថុនា ហើយនឹងបញ្ចប់ទៅវិញនៅទីក្រុង Berlin នាថ្ងៃទី១៤ ខែកក្កដាខាងមុខ៕