(សៀមរាប)៖ សិល្បករ-សិល្បការិនីជាច្រើនដួង បានបង្ហាញខ្លួនជាមួយឈុតសម្លៀកបំពាក់បុរាណប្រពៃណីខ្មែរច្នៃមកសម័យបច្ចុប្បន្នយ៉ាងស្រស់ស្អាតក្នុងព្រឹត្តិការណ៍ «រាត្រីចងចាំ» លើកទី៤ ឆ្នាំ២០២៣ រៀបចំនៅបរិវេណព្រះលានជល់ដំរី ខេត្តសៀមរាប កាលពីរាត្រីថ្ងៃទី១៤ ខែធ្នូ ឆ្នាំ២០២៣ ដែលសម្លៀកបំពាក់របស់ខ្មែរមើលទៅពិតជាគូរឲ្យទាក់ទាញហើយស័ក្ដិសម ជាមួយកម្មវិធីដ៏អស្ចារ្យនោះខ្លាំងណាស់ ព្រោះឆ្លុះបញ្ចាំងពីភាពដ៏ស្រស់ស្អាតរបស់ឈុតបុរាណរបស់ខ្មែរច្នៃរនាសម័យបច្ចុប្បន្ន បន្ដមកដល់កូនចៅបច្ចុប្បន្ន និងតទៅជំនាន់ក្រោយ ដែលមហាព្រឹត្តិការណ៍នេះរៀបចំដោយក្រសួងវប្បធម៌ និងវិចិត្រសិល្បៈគោលបំណងបំផុសស្មារតីជូនដល់កុលបុត្រកុលធីតា គ្រប់រូបចូលរួមចងចាំពីអត្តសញ្ញាណជាតិ និងអបអរសាទរខួប៣១ឆ្នាំ នៃការដាក់បញ្ចូលតំបន់រមនីយដ្ឋានអង្គរជាបេតិកភណ្ឌពិភពលោក។
តើនរណាជាអ្នកនៅពីក្រោយខ្នងនៃឈុតបុរាណរបស់ខ្មែរច្នៃមកសម័យបច្ចុប្បន្ននូវព្រឹត្តិការណ៍ «រាត្រីចងចាំ» លើកទី៤ ឆ្នាំ២០២៣? ពិតហើយទស្សនិកជនពិតជាបានស្គាល់តារាសម្ដែងលោក ស៊ីនឌី ដែលជាម្ចាស់ហាងសំអាងការស៊ីនឌី ព្រោះរូបលោកនេះហើយដែលជាអ្នកដឹកនាំរៀបចំ និងសម្រិតសម្រាំងឈុតសម្លៀកបំពាក់បុរាណរបស់ខ្មែរច្នៃមកសម័យបច្ចុបន្នគ្រងនៅលើដងខ្លួនតារាប្រុសស្រីជាច្រើនដួង បង្អួតបង្ហាញសម្រស់ក្នុងរាត្រីនោះ ហើយមើលទៅពិតជាលេចត្រដែត និងទាក់ទាញបំផុតក្នុងព្រឹត្តិការណ៍ដ៏អស្ចារ្យនេះ។
តារាសម្ដែង ស៊ីនឌី បានថ្លែងប្រាប់ឲ្យដឹងថា លោកមានមោទនភាពខ្លាំងដែលបានធ្វើការជាមួយក្រសួងវប្បធម៌ និងវិចិត្រសិល្បៈ ក្នុងកម្មវិធីថ្នាក់ជាតិដ៏ធំនេះ ព្រោះលោកជាអ្នកស្រលាញ់នូវឈុតបុរាណខ្មែរច្នៃមកបច្ចុប្បន្ន និងចង់អភិរក្សសម្លៀកបំពាក់ប្រពៃណីខ្មែរ ក៏ដូចជាបំផុសឲ្យយុវជនយើងចងចាំ និងជួយថែរក្សា ហេតុនេះហើយលោកបានធ្វើការមួយនេះដោយរីករាយបំផុត បើទោះជាមានការហត់នឿយយ៉ាងណា ក៏មិនធុញទ្រាន់ដែរ គឺមានតែកំលាំងចិត្ត ព្រោះធ្វើការដោយបេះដូង។
តារាសម្ដែងរូបនេះ បានបន្ថែមថាសំអាងការស៊ីនឌី របស់លោកមានឈុតបុរាណខ្មែរជាច្រើនឈុតសម័យកាល និងច្នៃមកសម័យបច្ចបុបន្ន និងគ្រឿងអលង្ការបុរាណចម្រុះ ព្រោះការដែលលោកបានបើកសម្អាងការស៊ីនឌីនេះឡើង ដោយសារតែលោកស្រលាញ់សម្លៀកបុរាណរបស់ខ្មែរ និងចង់ឲ្យកូនខ្មែរចេះស្រលាញ់សម្លៀកបំពាក់ខ្មែរដូចរូបលោកដែរ។
តារាសម្ដែង ស៊ីនឌី បន្ថែមទៀតថាសិល្បករដែលគ្រងឈុតបុរាណខ្មែរច្នៃមកបច្ចុប្បន្នទាំងអស់ក្នុងព្រឹត្តិការណ៍ «រាត្រីចងចាំ» លើកទី៤ ឆ្នាំ២០២៣ នោះពិតជាលើកសម្រស់ពួកគេកាន់តែស្រស់ស្អាតបំផុតស័ក្ដិសមជាមួយកម្មវិធីដ៏អស្ចារ្យនោះខ្លាំងណាស់។ នៅពេលតារាម៉ូដែលរបស់ខ្មែរគ្រងឈុតប្រពៃណីខ្មែរបែបនេះ គឺស្អាតបែបខ្មែរ ហើយបរទេសគេបានឃើញសរសើរគ្រប់គ្នាថា «ខ្មែរអស្ចារ្យ!»។ ហេតុនេះលោកគាំទ្រចំពោះការដែលក្រសួងវប្បធម៌បង្កើតព្រឹត្តិការណ៍នេះឡើង ក៏ដូចជាបន្ដធ្វើកម្មវិធីបែបនេះឲ្យបានជាញឹកញាប់ថែមទៀត ដើម្បីជាការដឹងគុណដល់បុព្វបុរសខ្មែរដែលសាងអង្គរវត្ត ក៏ដូចជាបំផុសម្លៀកបំពាក់បុរាណខ្មែរច្នៃមកបច្ចុប្បន្នភាពនេះឡើងឲ្យទាំងភ្ញៀវជាតិ និងអន្ដរជាតិបានទស្សនា។
លោក ស៊ីនឌី សង្កត់ថា សូមឲ្យកូនខ្មែរគ្រប់រូបស្រលាញ់អ្វីដែលខ្មែរមាន និងចូលរួមអភិរក្សទាំងប្រាសាទខ្មែរ និងឈុតសម្លៀកបំពាក់បុរណខ្មែរទាំងអស់គ្នាឲ្យបានគង់វង្សតទៅ៕
