(ភ្នំពេញ)៖ ពិធីការិនី និងជាតារាសម្ដែងល្បីឈ្មោះមួយរូប ក្នុងវិស័យសិល្បៈ ឌួង ហ្សូរីដា បានលើកពានជាអគ្គនាយិកាឆ្នើម ប្រចាំឆ្នាំ២០២៣ (Outstanding CEO Award 2023) ពី Ceo Master Club បន្ទាប់ពីរូបនាងបានតស៊ីស្វែងយល់ និងបញ្ចប់ការសិក្សាតាំងពីឆ្នាំ២០១៨ ខណៈដែលពានមួយនេះ គឺជាកិតិ្តយសមួយសម្រាប់រូបនាង ជាថ្នាក់ដឹកនាំរបស់ក្រុមហ៊ុន ព្រោះមិនមែននរណាចង់បាន ត្រូវតែបាននោះទេ គឺមានក្រុមហ៊ុនដល់ទៅ១០០ ឯណោះ ដែលចូលរួមប្រកួត តែសម្រាប់ពាន Outstanding Ceo Award 2023 ឆ្នាំនេះ ទទួលបានតែ១០នាក់ប៉ុណ្ណោះ។ ពិធីប្រគល់ពានរង្វាន់ដល់អគ្គនាយិកាឆ្នើមនេះ ត្រូវបានរៀបចំកាលពីថ្ងៃទី១៤ ខែធ្នូ ឆ្នាំ២០២៣ នៅវិមានដឺព្រេមៀសេនធ័រ សែនសុខ ក្រោមអធិបតីភាពលោក ហ៊ុន ម៉ានី រដ្ឋមន្រ្ដីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា, លោកគ្រូធំ បណ្ឌិត អោម សេងបូរ៉ា ស្ថាបនិក CEO Master Club និងម្ចាស់អាជីវកម្មកម្ពុជាជាច្រើននាក់ទៀត។
តារាសម្ដែង ឌួង ហ្សូរីដា បានថ្លែងប្រាប់ Fresh News Plus ឲ្យដឹងថា ពាន Outstanding Ceo Award 2023 គឺគេផ្ដោតលើអគ្គនាយក ឬអគ្គនាយិកាឆ្នើមប្រចាំឆ្នាំ ហើយខាង Ceo Master Club មានគណៈកម្មការវាយតម្លៃច្បាស់លាស់ ពោលគឺទាល់តែក្រុមហ៊ុនមានស្ដង់ដាគ្រប់គ្រាន់ ទើបអាចប្រឡងយកពានមួយនេះបាន។ កាលពីឆ្នាំ២០១៨ នាងបានបញ្ចប់ការសិក្សាទាំង១៣វគ្គ ពី Ceo Master Club ហើយពានមួយនេះជាលើកទី១ សម្រាប់ក្រុមហ៊ុនរបស់នាងដែលទទួលបាន ព្រោះទាល់តែយើងមានសមត្ថភាព ហើយក្រុមហ៊ុនសមស្របតាមស្ដង់ដា ក្នុងនាមជាសហគ្រិន ទើបមេប្រយោគផ្ដល់ឲ្យយើងបានឈ្នះពានមួយនេះ។
នាងរំឭកថា កាលពីឆ្នាំ២០១៦ នាងមានក្រុមហ៊ុនតែ២ទេគឺ Cambodia Super Model និងដាណាម៉ាកាត់ដេរ តែប៉ុន្មានឆ្នាំចុងក្រោយនេះ នាងបានពង្រីកក្រុមហ៊ុនជាបន្ដបន្ទាប់ ហើយពាននេះបើយើងរកស៊ីខាតក៏គេមិនឲ្យឈ្នះពានដែរ។ នាងថា ក្រោយទទួលបានពានមួយនេះហើយក្រុមហ៊ុន ក៏អាចវិនិយោគជាមួយក្រុមហ៊ុនបរទេសបានដែរ ព្រោះអ្នករកស៊ីធំៗគេត្រូវការក្រុមហ៊ុនស្ដង់ដា មានការបង់ពន្ធត្រឹមត្រូវ និងទទួលស្គាល់ពីរដ្ឋាភិបាល ដូចជាការទទួលបានពានមួយនេះដែរ។
គិតត្រឹមឆ្នាំ២០២៣ នេះ ពិធីការិនី ឌួង ហ្សូរីដា មានក្រុមហ៊ុនដូចជារៀបចំក្រុមម៉ូដែល (Agency) ហាងកាត់ដេដាណាម៉ា, Mudhita Tranding Co.Ltd ជាក្រុមហ៊ុននាំចូលគ្រឿងសម្អាង និងផលិតគ្រឿងសម្អាងខ្លួនឯង, ហាង Tube Coffee និងសាខាហាង Coffee Amazone ផងដែរ។ ហ្សូរីដា បង្ហើបថាសម្រាប់ឆ្នាំ២០២៤ នេះដោយសារតែពិភពលោក ប្រឈមនឹងវិបត្តិសេដ្ឋកិច្ចជាសាកល ហេតុនេះនាងផ្អាកគម្រោងពង្រីកអាជីវកម្ម គឺធ្វើយ៉ាងណាទប់លំនឹងក្រុមហ៊ុនឲ្យដំណើរការធម្មតា និងមិនចំណាយអត់ប្រយោជន៍ ទៅលើអ្វីដែលមិនចាំបាច់ និយាយទៅមិនចាយវាយផ្ដេសផ្ដាសនោះទេ គឺមិនធ្វើអ្វីដែលល្អតែមុខឡើយ តែត្រូវពង្រឹងទៅលើការផលិត និងនាំចូលផលិតផលដែលមានគុណភាព។ ក្រៅពីពាន Outstanding Ceo Award 2023 ក្រុមហ៊ុនរបស់នាងធ្លាប់ទទួលបានពាន នៅក្រៅស្រុក ៥ទៅ៦ដងរួចមកហើយ។
ក្នុងស្ថានភាពទឹកភ្នែករលីងរលោង រំភើបពេកក្រៃនោះ ឌួង ហ្សូរីដា បានថ្លែងបន្តថា «ជោគជ័យទាំងអស់នេះ គឺជាអ្វីដែលម្ដាយខ្ញុំចង់ឃើញ កូនស្រីម្នាក់នេះទទួលបាន ហើយថាសមិទ្ធផលទាំងអស់នេះ គឺជារបស់គាត់ (ម្ដាយ) អ្នកបង្កើតខ្ញុំមកក្លាយទៅជាស្រ្ដីដ៏រឹងមាំនៅថ្ងៃនេះ។ ពានដែលខ្ញុំទទួលបាននេះ ខ្ញុំសូមឧទ្ទិសកុសលជូនដល់ម្ដាយរបស់ខ្ញុំ ព្រោះទោះជាលោកបានចាកចេញពីខ្ញុំទៅហើយក្ដី ប៉ុន្ដែអារម្មណ៍ខ្ញុំនៅតែគិតថា អ្នកម្ដាយនៅក្បែរៗ និងតាមថែរក្សាកូនជានិច្ច..!»។
ជាមួយគ្នានេះតារាសម្ដែង ឌួង ហ្សូរីដា ក៏មិនភ្លេចពីការចូលរួមចំណែក យ៉ាងសកម្មរហូតទទួលបានពាននៅពេលនេះថា បុគ្គលិគរបស់នាងគ្រប់ផ្នែកទាំងអស់ ជាអ្នកនៅពីក្រោយខ្នងនៃភាពជោគជ័យរបស់នាង ពិសេសគឺអតិថិជនទាំងអស់ ជាអ្នកគាំទ្រក្រុមហ៊ុន Mudhita Tranding Co.Ltd ដែលដំណើរការដោយរលូន អស់រយៈពេល៦ឆ្នាំមកហើយ។
គួរបញ្ជាក់ថា ឌួង ហ្សូរីដា ជាសមាជិកពេញមួយជីវិតរបស់ Ceo Master Club លេខរៀងទី១៥១ ហើយក្រុមហ៊ុនដែលនាង យកទៅប្រកួតឆ្នាំ២០២៣ នេះគឺក្រុមហ៊ុន Mudhita Tranding Co.Ltd រហូតទទួលបានពានជាអគ្គនាយិកាឆ្នើមប្រចាំឆ្នាំ២០២៣ (Outstanding Ceo Award 2023 )៕