(ភ្នំពេញ)៖ ការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ ឆ្នាំ២០២៣ នៅពហុកីឡដ្ឋានជាតិអូឡាំពិក រាជធានីភ្នំពេញ បានបញ្ចប់ហើយ នៅល្ងាចថ្ងៃទី០៩ ខែធ្នូ ក្រោយដំណើរការប្រកួតដ៏ស្វិតស្វាញរយៈពេល ៤ឆ្នាំ ដោយម្ចាស់ផ្ទះកម្ពុជា ដណ្ដើមបានមេដាយសរុប ៤៨គ្រឿង ឈរចំណាត់ថ្នាក់លេខ២ បន្ទាប់ពីវៀតណាម ដែលដណ្ដើមបានមេដាយច្រើនជាងគេសរុប ៨៤គ្រឿង។
ក្រោយចប់ការប្រកួត បណ្ដាប្រទេសក្នុងតំបន់អាស៊ីអាគ្នេយ៍ បានស្ងើចសរសើរ ចំពោះការទទួលបដិសណ្ឋារកិច្ច និងការរៀបចំការប្រកួតស្របតាមស្ដង់ដារអន្ដរជាតិ។ ការណ៍នេះ នាំឲ្យពួកគេសប្បាយចិត្ត និងស្នើឲ្យកម្ពុជាបន្ដធ្វើម្ចាស់ផ្ទះព្រឹត្តិការណ៍នេះជាបន្ដបន្ទាប់ទៀតនាឆ្នាំក្រោយ។ នេះបើតាមការបញ្ជាក់របស់លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា និងប្រធានសហព័ន្ធកីឡាចំបាប់អាស៊ីអាគ្នេយ៍។
លោកបន្ដថា ក្រៅពីជោគជ័យលើការងាររៀបចំ កម្ពុជាក៏ទទួលបានជោគជ័យផ្នែកបច្ចេកទេសផងដែរ ដ្បិតកីឡាករ-កីឡាការិនីកម្ពុជា កើនបច្ចេកទេសខ្ពស់ជាងមុន បើធៀបការហ្វឹកហាត់មុន និងក្រោយស៊ីហ្គេម។ លោកថា «ឆ្នាំនេះ យើងបានចូលរួមប្រកួតច្រើន ទាំងកម្រិតតំបន់ និងទ្វីប ។ ដូច្នេះការប្រកួតច្រើន បានធ្វើឲ្យកីឡាករ-កីឡាការិនីរបស់យើងរីកចម្រើន ស្របតាមផែនការ ដែលយើងចង់រក្សា និងជំរុញបច្ចេកទេសបន្ថែម ដើម្បីត្រៀមដូចជាស៊ីហ្គេម ឆ្នាំ២០២៥ នៅថៃ និងកីឡាយុវជនអាស៊ី ឆ្នាំ២០២៩ នៅកម្ពុជាជាដើម»។
ចំពោះលទ្ធផលបច្ចេកទេស នៃការប្រកួតកីឡាចំបាប់ជើងឯកអាស៊ាន ឆ្នាំ២០២៣ ដែលមានកម្រិតយុវជនអាយុក្រោម ១៧ឆ្នាំ, អាយុក្រោម ២០ឆ្នាំ និងក្រុមពេញវ័យខាងលើ គឺវៀតណាម ដណ្ដើមបានមេដាយច្រើនជាងគេសរុប ៨៤គ្រឿង (មាស ៦៩, ប្រាក់ ១៤ និងសំរឹទ្ធ ១) ខណៈកម្ពុជា ឈរលេខ២ ដណ្ដើមបានមេដាយសរុប ៤៨គ្រឿង (មាស ៤ ប្រាក់ ២៧ និងសំរឹទ្ធ ១៧)។ ចំណែកក្រុមថៃ ឈរលេខ៣ ដណ្ដើមបានមេដាយសរុប ១៨គ្រឿង (មាស ៣ ប្រាក់ ៩ និងសំរឹទ្ធ ៦)។
ក្រុមកីឡាចំបាប់ហ្វីលីពីន ដណ្ដើមបានមេដាយសរុប ២៥គ្រឿង (មាស ១ ប្រាក់ ១៤ និងសំរឹទ្ធ ១០) ឈរលេខ៤ លើក្រុមសិង្ហបុរី ដែលដណ្ដើមបានមេដាយសរុប ១៣គ្រឿង (មាស ១ ប្រាក់ ៧ និងសំរឹទ្ធ ៥) ។ រីឯឥណ្ឌូនេស៊ី គឺឈរលេខ៦ ដោយដណ្ដើមបានមេដាយប្រាក់ ៥ និងសំរឹទ្ធ ១១ សរុប ១៦គ្រឿង និងក្រុមកីឡាចំបាប់ឡាវ ឈរលេខ៧ ក្នុងតារាងមេដាយដណ្ដើមបានមេដាយ ២គ្រឿង (ប្រាក់ ១ និងសំរឹទ្ធ ១)៕
