(បរទេស)៖ ក្រុមហ៊ុន Hyundai Motors បានប្រកាសនៅថ្ងៃនេះថា ខ្លួនបានចាប់ផ្តើមការសាងសង់រោងចក្រផលិតរថយន្តអគ្គិសនី (EV) ថ្មីសន្លាងមួយនៅទីក្រុង Ulsan ប្រទេសកូរ៉េខាងត្បូង ជាមួយនឹងទំហំនៃការវិនិយោគចំនួន ១.៥២ពាន់លានដុល្លារ ខណៈដែលរោងចក្រនេះអាចសាងសង់រួចរាល់នៅឆ្នាំ ២០២៥ ព្រមទាំងអាចចាប់ផ្តើមផលិតរថយន្ត EV ផ្តាច់មុខនៅឆ្នាំ ២០២៦។
យោងតាមការបញ្ជាក់ពី Hyundai បានឱ្យដឹងថា រោងចក្រនេះអាចផលិតរថយន្ត EV បានរហូតដល់ទៅ ២០០,០០០គ្រឿងក្នុងមួយឆ្នាំ ដោយក្នុងនោះរថយន្ត SUV ម៉ាក Genesis ដំបូងគេនឹងបង្ហាញខ្លួននៅក្នុងឆ្នាំ២០២៦ ខណៈដែលរោងចក្រដែលមានស្រាប់នៅក្នុងតំបន់ Ulsan របស់ក្រុមហ៊ុន Hyundai បាននិងកំពុងផលិតរថយន្តបាន ១,៤ លានគ្រឿងក្នុងមួយឆ្នាំ ព្រមទាំងបាននាំចេញ ១,១លានគ្រឿងថែមទៀតផង។
នាយកប្រតិបត្តិរបស់ក្រុមហ៊ុនបាននិយាយថា ក្រុមហ៊ុន Hyundai កំពុងផ្តោតលើមជ្ឈមណ្ឌលផលិតក្នុងស្រុក និងនៅសហរដ្ឋអាមេរិកសម្រាប់ពេលនេះ ហើយមិនមានផែនការណាមួយក្នុងការបន្ថយល្បឿនផលិតកម្ម EV របស់ខ្លួននោះទេ មិនដូចគូប្រជែងមួយចំនួនរបស់ខ្លួនដែលកំពុងភ័យខ្លាចដោយសារតែតម្រូវការរថយន្ត EV ធ្លាក់ចុះ។ តាមពិតទៅ Hyundai Motor Group កំពុងត្រៀងមបង្ហាញរថយន្ត EV ចំនួន ៣១ម៉ូដែល រហូតដល់ឆ្នាំ ២០៣០ ពីគ្រប់សាខាទាំងអស់របស់ខ្លួន៕