(ភ្នំពេញ)៖ ដូចដែលបានសន្យាជាមួយមហាជនមែន! ស្រីស្រស់ជុំ រចនាពេជ្រ ហៅបេប៊ី ធ្លាប់បញ្ជាក់ថា នាងនឹងវិលមកកាន់ក្បាលមីក្រូឡើងវិញ នៅដើមខែវិច្ឆិកា ឆ្នាំ២០២៣ ឥឡូវអតីតតារាចម្រៀងក្នុងផលិតកម្ម ថោន រូបនេះពិតជាមិនទៅណាចោលអាជីពចាស់ ហើយការត្រឡប់មកជាថ្មីនេះ នាងពិតជាប្លែក និងប្រែប្រួលខុសពីមុនដាច់។ បេប៊ី បានច្រៀងសម្ដែងបើកឆាកជាថ្មីនៅទូរទស្សន៍ CNC កាលពីល្ងាចថ្ងៃទី០៥ ខែវិច្ឆិកា ដែលមានបទនាងទើបចេញ «ថ្នម» បទនាងល្បីពីមុន «អំណាចលុយ», ច្រៀង Cover បទមរតកដើម «ប្រុសកំពូលស្នេហ៍» និង Cover បទមាស សុខសោភា «ម្នាក់ឯងមិនស្លាប់ទ» ជាដើម ហើយហាក់នៅតែមានទីផ្សារគាំទ្រច្រើនដដែល។
ថ្លែងប្រាប់ Fresh News Plus ស្រីស្អាត បេប៊ី បានឲ្យដឹងថា នាងមានអារម្មណ៍ហាក់ប្លែកបន្ដិចដែរ ពេលចាប់ផ្ដើមវិលមករកអាជីពចម្រៀងម្ដងទៀត ព្រោះដូចចាប់អាជីពនេះជាលើកទី២។ យ៉ាងណានាងថាបានត្រៀម និងហាត់សមរួចជាស្រេចជាច្រើនថ្ងៃ ហេតុនេះគ្មានឧបសគ្គឡើយ ហើយក្រោយពីឡើងឆាកទី១នេះ នាងត្រៀមឡើងប៉ុស្ដិ៍ផ្សេងៗទៀត ក្នុងនោះក៏ត្រៀមចេញច្រៀងសម្ដែងឲ្យការប្រគំតន្រ្ដីរបស់ស្រាបៀរ Ganzberg តាមបណ្ដាខេត្តមួយចំនួន នៅថ្ងៃបុណ្យអុំទូកនាពេលខាងមុខនេះផងដែរ។
បេប៊ី បន្តថា ជាអារម្មណ៍រីករាយមួយ ព្រោះនាងបានផ្អាកជាច្រើនឆ្នាំ ពោលគឺតាំងពីផ្ទុះកូវីដ ហើយទើបមានពេលវេលាគ្រប់គ្រាន់វិលមកជាថ្មីម្ដងទៀតនាពេលនេះ ហើយមាន Fan នៅតែគាំទ្រ ស្រលាញ់ចូលចិត្តនាងដូចមុនដដែល។ ប៉ុន្ដែយ៉ាងណា នាងគ្មានបំណងវិលទៅចាប់អាជីពជាពិធីការិនីវិញឡើយ គឺផ្ដោតតែលើការពង្រឹងអាជីពចម្រៀងប៉ុណ្ណោះ បើទោះជានាងធ្លាប់ធ្វើជា MC ដល់ទៅជាង១០ឆ្នាំក្ដី។
បេប៊ី បញ្ជាក់ទៀតថា ការចាប់អាជីពចម្រៀងម្ដងទៀតនាពេលនេះ នាងផ្ដោតលើការផលិតបទបែបយុវវ័យច្រើនជាងបទបែបមនោសញ្ចេតនា តែក៏នៅបន្ដការច្រៀង Cover បទមរតកដើមដែរ ដោយរក្សារប៉ារ៉ូលឲ្យនៅដដែល និងបទខ្លះកែភ្លេងថ្មី។ ដោយសារតែផ្ដោតទៅលើការពង្រឹងគុណភាពជាចម្បងនោះ ហេតុនេះក្នុង១ខែ នាងអាចចេញបទថ្មីតែ១ទៅ២ បទប៉ុណ្ណោះ មិនចង់ចេញច្រើនយកបរិមាណនោះទេ តែចង់ចេញមួយដឹងមួយ។ ដោយឡែកទាក់ទងរឿងក្រុមរាំអមវិញនាងថា លើកនេះនាងមានសមាជិកក្រុមរាំផ្ទាល់ខ្លួនចំនួន៨នាក់ ខណៈដែលកាលពីឆ្នាំមុនពេល ខ្លះមានរហូតដល់ទៅជាង១០នាក់ក៏មានដែរ។
បេប៊ី បានផ្អាកពីអាជីពចម្រៀងនៅថោន កាលពីដើមឆ្នាំ២០២១ ពោលគឺពេលកូវីដផ្ទុះខ្លាំង ហើយអំឡុងពេលនោះ នាងបានឆក់ឱកាសបើកមុខជំនួញក្រៅពីសិល្បៈនោះ គឺហាងកាហ្វេដែលពង្រីកសាខាជាបន្ដបន្ទាប់ ហើយពេលដែលនាងវិលចូលច្រៀងវិញនេះ បងប្រុសរបស់នាងជាអ្នកមើលគ្រប់គ្រងហាងដែលដំណើរការជាធម្មតា។
ឆ្លើយតបនឹងសំណួរថា តើបេប៊ីផ្អាកច្រៀងជាង២ឆ្នាំបែបនេះ នាងពិបាកក្នុងការប្រជែងទីផ្សារចម្រៀងឬអត់ ព្រោះបច្ចុប្បន្នតារារីកដូចផ្សិតនោះ? ស្រីស្រស់ រចនាពេជ្រ ទទួលស្គាល់ថា គឺទីផ្សារចម្រៀងពិតជាមានការប្រែប្រួលមែន ព្រោះតារាឥឡូវមានច្រើន។ ប៉ុន្ដែនាងថាសម្រាប់រូបនាងវិញ គឺអត់បញ្ហាចោទទេ ដោយសារមានគេស្គាល់នាងច្បាស់ទៅហើយ ហេតុនេះគ្រាន់តែនាងមានអ្វីដែលថ្មី ប្លែកនោះទស្សនិកជននៅតែគាំទ្រនាងដូចមុន។ មកម្ដងនេះទាំងការស្លៀកពាក់ ,ក្បាច់រាំ គឺនាងបាន Update ថ្មីទាំងអស់ អ៊ីចឹងនៅពេលដែលនាងប្លែកពីមុនទស្សនិកជន នឹងចាប់អារម្មណ៍នាងម្ដងទៀត ជាមួយបទចម្រៀងថ្មីៗដែលនាងនឹងបញ្ចេញទៅតាមគម្រោង។ ប៉ុន្ដែនាងថា គ្មានបំណងប្រជែងទីផ្សារចម្រៀងជាមួយអ្នកណាទាំងអស់ គឺខំប្រឹងពង្រឹងតែសម្ថភាពខ្លួនឯងប៉ុណ្ណោះ៕