(ភ្នំពេញ)៖ ក្រុមហ៊ុន លី ហួរ លីស៊ីង ភីអិលស៊ី និង ក្រុមហ៊ុន ហូថៃ ហ្វាយណែន ខូអិលធីឌី (Hotai Finance Co. Ltd) បានសហការវិនិយោគរួមគ្នា ជាដៃគូយុទ្ធសាស្រ្តអាជីវកម្ម ក្នុងវិស័យហិរញ្ញវត្តុ ដើម្បីបង្កើនការផ្តល់សេវាកម្មបង់រំលស់នៅកម្ពុជា។
កិច្ចសហការនេះនេះប្រព្រឹត្តឡើង នៅល្ងាចថ្ងៃទី ១៨ ខែតុលា ឆ្នាំ២០២៣ នៅសណ្ឋាគារ ហ្គាឌែនស៊ីធីភ្នំពេញ ដោយមានការចូលរួមពីសំណាក់ភ្ញៀវកិត្តិយស ក្រុមហ៊ុនបុត្រសម្ព័ន្ធរបស់ លី ហួរ គ្រុប និងដៃគូអាជីវកម្មក្រុមហ៊ុនច្រើននាក់ មកចូលរួមអបអរសាទរផងដែរ ។
អ្នកឧកញ្ញ៉ា លី ហួរ ប្រធាននាយកប្រតិបត្តិ លី ហួរ គ្រុប បានបង្ហាញនូវក្តីសោមនស្សរីករាយណាស់ ដែលក្រុមហ៊ុន ហូ ថៃ ហ្វាយណែន ខូអិលធីឌី ផ្តល់ទំនុកចិត្តចូលរួមវិនិយោគជាដៃគូយុទ្ធសាស្រ្តអាជីវកម្ម ក្នុងវិស័យហិរញ្ញវត្តុ ជាមួយក្រុមហ៊ុន លី ហួរ លីស៊ីង។
លោកបន្តថា «ប្រទេសកម្ពុជាយើងគឺជាប្រទេសដែលមាន សុខសន្តិភាព ស្ថិរភាព និងសក្តានុពលសេដ្ឋកិច្ចរីកចម្រើនខ្លាំងនៅក្នុងតំបន់ និងមានការអភិវឌ្ឍឥតឈប់ឈរ ព្រមទាំងមានសក្តានុពលធនធានមនុស្សខ្លាំងក្នុងវិស័យហិរញ្ញវត្ថុ ក៏ដូចជាវិស័យផ្សេងៗទៀតដែលជួយជំរុញដល់ការរីកចម្រើនសេដ្ឋកិច្ចជាតិកម្ពុជាទាំងមូល។
ឧកញ៉ា លី សុភ័ក្ត ប្រធានក្រុមប្រឹក្សាភិបាល ក្រុមហ៊ុន លី ហួរ លីស៊ីង មានប្រសាសន៍ថា ក្រុមហ៊ុន ហូថៃ ហ្វាយណែន ខូអិលធីឌី (Hotai Finance Co.,Ltd) គឺជាក្រុមហ៊ុនភតិសន្យាហិរញ្ញវត្ថុនាំមុខគេក្នុងតំបន់ ហើយក្រុមហ៊ុននេះបានបង្កើតឡើងតាំងពីឆ្នាំ១៩៩៩ ដែលផ្តោតសំខាន់ទៅលើសេវាកម្មបង់រំលស់រថយន្ត គ្រឿងចក្រ និងសម្ភារៈបរិក្ខារផ្សេងៗជាច្រើនទៀត។ ក្រុមហ៊ុននេះក៏បានចុះបញ្ជីក្នុងទីផ្សារភាគហ៊ុនក្នុងឆ្នាំ២០១៩ ផងដែរ។
លោកបន្ថែមថា«ខ្ញុំបាទពិតជាមានក្តីសោមនស្សរីករាយណាស់ចំពោះវត្តមាន ក្រុមហ៊ុន ហូថៃ ហ្វាយណែន ខូអិលធីឌី (Hotai Finance Co.,Ltd) ក្នុងពេលនេះ។ ការផ្តល់ទំនុកចិត្តចូលរួមវិនិយោគរួមគ្នាជាដៃគូយុទ្ធសាស្រ្ត ជាមួយ ក្រុមហ៊ុន លី ហួរ លីស៊ីង ភីអិលស៊ី នេះ ជាមោទនភាពមួយរបស់ខ្ញុំបាទក៏ដូចជាថ្នាក់ដឹកនាំទាំងអស់ផងដែរ ហើយវាក៏ជាកត្តាជំរុញទឹកចិត្តបន្ថែមឱ្យខ្ញុំ និងក្រុមការងាររឹតតែខិតខំប្រឹងប្រែង ដើម្បីអភិវឌ្ឍខ្លួនទទួលបានការវិនិយោគថ្មីៗបន្ថែមទៀត។»
លោក LIU YUANSHENG ប្រធានក្រុមហ៊ុន ហូថៃ ហ្វាយណែន ខូអិលធីឌី បានលើកឡើងថា «ជាការពិតណាស់ យើងខ្ញុំពោរពញដោយទំនុកចិត្តខ្ពស់លើទស្សនវិស័យនៃការអភិវឌ្ឍរបស់ប្រទេសកម្ពុជានាពេលអនាគត។ កម្ពុជាបច្ចុប្បន្នកំពុងស្ថិតក្នុងដំណាក់កាលនៃកំណើនសេដ្ឋកិច្ច ហើយសក្តានុពលនៃការប្រើប្រាស់ទីផ្សារ និងការពង្រីកអាជីវកម្មនៅទីនេះនៅតែមានទំហំធំ។ នៅពេលអនាគត ក្រុមហ៊ុន ហូថៃ ហ្វាយណែន ខូអិលធីឌីនិង ក្រុមហ៊ុន លីហួរ លីស៊ីង មានកិច្ចសហប្រតិបត្តិការួមគ្នា។
លោកបន្តថា «ខ្ញុំមានសេចក្តីសោមនស្ស និងមានកិត្តិយសខ្លាំងណាស់ដែលមានវត្តមាននៅទីនេះ ក្នុងនាមតំណាងឱ្យក្រុមហ៊ុន ហូថៃ ហ្វាយណែន ខូអិលធីឌី និងធ្វើជាសក្ខីភាពឱ្យក្រុមហ៊ុនឆ្នើមទាំងពីរ ដែលបានធ្វើកិច្ចសហការរួមគ្នាដើម្បីស្វែងរកឧត្តមភាព និងភាពច្នៃប្រឌិតថ្មីៗឥតឈប់ឈរ។ កិច្ចសហប្រតិបត្តិការនេះតំណាងឱ្យការចាប់ផ្តើមនៃសមិទ្ធិផលដែលសម្រេចបាន និងក្តីស្រមៃកាន់តែច្រើន។»
លោកបន្តថា ក្រុមហ៊ុន ហូថៃ ហ្វាយណែន ខូអិលធីឌី នឹងផ្តល់នូវបទពិសោធន៍ជោគជ័យក្នុងការអភិវឌ្ឍន៍អាជីវកម្ម រួមផ្សំជាមួយមូលដ្ឋានគ្រឹះប្រតិបត្តិការក្នុងស្រុកដ៏ស៊ីជម្រៅរបស់ក្រុមហ៊ុន លីហួរ លីស៊ីង។ នៅក្រោមសម្ព័ន្ធភាពដ៏រឹងមាំ ពិតជាអាចបង្កើតការអភិវឌ្ឍន៍ប្រកបដោយប្រសិទ្ធភាពមួយដ៏ធំទូលំទូលាយ និងនាំមកនូវភាពរីកចម្រើនយ៉ាងខ្លាំងដល់អាជីវកម្ម ហើយបន្ទាប់មកនឹងជោគជ័យនៅជំនួញថ្មីៗបន្តទៀត។
សូមបញ្ជាក់ថា ក្រុមហ៊ុន លី ហួរ លីស៊ីង ភីអិលស៊ី បានបង្កើតឡើងក្នុងឆ្នាំ២០១៥ ដោយបានចុះបញ្ជីលេខ០០០០០៦៩៤ ជាមួយក្រសួងពាណិជ្ជកម្ម ដើម្បីជំរុញឱ្យមានសេវាកម្មភតិសន្យារថយន្តនៅលើទីផ្សារកម្ពុជា។ ក្រុមហ៊ុន លី ហួរ លីស៊ីង បានបោះជំហ៊ានយ៉ាងលឿន ដោយធនាគារជាតិនៃកម្ពុជាបានផ្តល់អាជ្ញាប័ណ្ណជាផ្លូវការ នៅថ្ងៃទី ០៨ ខែមេសា ឆ្នាំ២០១៦ ព្រមទាំងបង្កើតសេវាកម្មភតិសន្យាម៉ូតូនៅឆ្នាំ២០១៧ និងសេវាកម្ម Lease-back នៅឆ្នាំជាបន្តបន្ទាប់ទៀត ដោយបង្កើនដើមទុនពីមួយឆ្នាំទៅមួយឆ្នាំផងដែរ។ ក្នុងឆ្នាំ២០២៣នេះ គឺក្រុមហ៊ុនគម្រប់ខួប៨ឆ្នាំ ហើយក្រុមហ៊ុននៅតែបន្តនិរន្តរភាព ប្រកបដោយចក្ខុវិស័យវែងឆ្ងាយ និងយូរអង្វែងដើម្បីអោយក្លាយជាមជ្ឈមណ្ឌលបង់រំលស់ឈានមុខគេនៅកម្ពុជា។ ដោយមើលឃើញពីភាពលូតលាស់ឥតឈប់ឈររបស់ក្រុមហ៊ុន មជ្ឈដា្ឋនដៃគូសហការបានចាប់អារម្មណ៍វិនិយោគរួមគ្នាដើម្បីពង្រីកសក្តានុពលក្រុមហ៊ុនកាន់តែធំទូលាយទូទាំងប្រទេស។
ចំណែកឯ ក្រុមហ៊ុន ហូថៃ ហ្វាយណែន ខូអិលធីឌី (Hotai Finance Co.,Ltd) ជាក្រុមហ៊ុនភតិសន្យាហិរញ្ញវត្ថុនាំមុខគេក្នុងតំបន់ ហើយក្រុមហ៊ុននេះបានបង្កើតឡើងតាំងពីឆ្នាំ១៩៩៩ ដែលផ្តោតសំខាន់ទៅលើសេវាកម្មបង់រំលស់រថយន្ត គ្រឿងចក្រ និងសម្ភារៈបរិក្ខារផ្សេងៗជាច្រើនទៀត។ ក្រុមហ៊ុននេះក៏បានចុះបញ្ជីក្នុងទីផ្សារភាគហ៊ុនក្នុងឆ្នាំ២០១៩ ផងដែរ។ ក្រុមហ៊ុន ហូថៃ ហ្វាយណែន ខូអិលធីឌី (Hotai Finance Co.,Ltd) គឺជាក្រុមហ៊ុនអាជីវកម្មលក់និងបង់រំលស់ និងជួលសម្រាប់យានយន្ត និងឧបករណ៍ផ្សេងៗ។ អាជីវកម្មបង់រំលស់ភាគច្រើនទាក់ទងនឹងយានយន្ត។ ការបង់រំលស់សម្រាប់អាជីវកម្មយានជំនិះគឺពាក់ព័ន្ធនឹងការផ្តល់គម្រោងបង់រំលស់សម្រាប់សាធារណជនក្នុងការទិញរថយន្តថ្មី និងប្រើរួច។
អាជីវកម្មភតិសន្យាគឺចូលរួមក្នុងការផ្តល់សេវាកម្មជួលសម្រាប់ឧបករណ៍ជាច្រើនប្រភេទ ផលិតផលពាក់កណ្តាលសម្រេច ឬវត្ថុធាតុដើមក្នុងទម្រង់នៃការជួល៕