(ភ្នំពេញ)៖ លោកបណ្ឌិត ថោង ខុន ទេសរដ្ឋមន្ដ្រី និងជាប្រធានគណៈកម្មាធិការជាតិអូឡាំពិកកម្ពុជា(NOCC) នៅថ្ងៃទី២៨ ខែសីហានេះ បានជួបប្រជុំជាមួយថ្នាក់ដឹកនាំ មន្ដ្រី និងបុគ្គលិករបស់ខ្លួន ដើម្បីផ្សព្វផ្សាយពីគោលនយោបាយកីឡា ពិសេសចលនាអូឡាំពិក ដោយផ្សាភ្ជាប់ជាមួយគោលការណ៍អាទិភាពពាក់ព័ន្ធនឹងវិស័យកីឡា ក្នុងយុទ្ធសាស្ដ្របញ្ចកោណរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ។
ក្រៅពីក្រើនរំឮកអំពីតួនាទីភារកិច្ច និងទំនួលខុសត្រូវ ដែលថ្នាក់ដឹកនាំ និងមន្ដ្រី NOCC ទាំងអស់ ត្រូវអនុវត្តឲ្យបានខ្ជាប់ខ្ជួន និងមានប្រសិទ្ធភាព ដើម្បីបំផុសសកម្មភាពចលនាអូឡាំពិកកម្ពុជា លោកទេសរដ្ឋមន្ដ្រី ថោង ខុន បានរំលេចពីយុទ្ធសាស្ដ្របញ្ចកោណ ក្នុងរាជរដ្ឋាភិបាល អាណត្ដិថ្មី ដែលដឹកនាំដោយឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ដ្រីនៃកម្ពុជា ដើម្បីជំរុញការអភិវឌ្ឍន៍វិស័យកីឡាជាតិ ។
លោក វ៉ាត់ ចំរើន អគ្គលេខាធិការ NOCC មានប្រសាសន៍ថា «ឯកឧត្តមបណ្ឌិតទេសរដ្ឋមន្ដ្រី បានផ្សព្វផ្សាយជូនដល់ថ្នាក់ដឹកនាំ និងមន្ដ្រី NOCC ទាំងអស់ ដើម្បីជ្រូតជ្រាបទាំងអស់គ្នា ហើយដើរឲ្យស្របគ្នា ទាំងចលនាអូឡាំពិក ទាំងគោលការណ៍កីឡារបស់រាជរដ្ឋាភិបាល។ យើងបានផ្សព្វផ្សាយអំពីគោលការណ៍សំខាន់ៗរបស់ NOCC ដែលនឹងត្រូវត្រៀមលក្ខណៈចូលរួមជាមួយរាជរដ្ឋាភិបាល និងក្រសួងអប់រំ យុវជន និងកីឡា ក្នុងការត្រៀមរៀបចំការប្រកួតកីឡាយុវជនអាស៊ី លើកទី៥ ឆ្នាំ២០២៩ ដែលកម្ពុជាធ្វើម្ចាស់ផ្ទះ» ។
លោកបន្ដថា ដោយបានការយកចិត្តទុកដាក់ខ្ពស់ពីលោកទេសរដ្ឋមន្ដ្រី ថោង ខុន បានធ្វើឲ្យឲ្យសុខដុមនីយកម្មក្នុងការងាររៀបចំសកម្មភាព និងការងាររបស់ NOCC ឡើងវិញ ។ នេះគឺជាចំណុចសំខាន់ ដែលគណៈកម្មាធិការជាតិអូឡាំពិក នឹងមានកិច្ចប្រជុំជាបន្ដបន្ទាប់ទៀត ដើម្បីណែនាំបន្ថែម បន្ទាប់ពី NOCC បានបើកកិច្ចប្រជុំគណៈកម្មាធិការប្រតិបត្តិឡើងវិញ កាលពីដើមខែសីហាកន្លងទៅ ក្រោយរួមចំណែករៀបចំព្រឹត្តិការណ៍ប្រវត្តិសាស្ដ្រស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ប្រកបដោយភាពជោគជ័យ ។
រដ្ឋលេខាធិការក្រសួងអប់រំ យុវជន និងកីឡា និងជាប្រតិបត្ដិករកីឡាឆ្នើមដដែល បានបង្ហាញការជឿជាក់ និងការប្ដេជ្ញាចិត្តថា «ពួកយើងទាំងអស់ នឹងខិតខំប្រឹងប្រែងបន្ដទៀត ដើម្បីជួយជ្រោមជ្រែងក្នុងការរៀបចំដំណើរការនៃការអភិវឌ្ឍន៍វិស័យកីឡាជាតិ តាមរយៈការដឹកនាំដ៏ខ្ពង់ខ្ពស់របស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា គឺយើងសង្ឃឹមថា វិស័យកីឡានឹងមានការប្រែប្រួលថ្មីថែមទៀត ហើយនឹងទទួលបានជោគជ័យថ្មីៗថែមទៀត» ៕