(ឡុងដ៍)៖ អ្នកចាត់ការទូទៅ Mikel Arteta របស់ក្លិបកាំភ្លើងធំ Arsenal មានជំនឿចិត្តថា ខ្សែប្រយុទ្ធ Gabriel Jesus នឹងមិនខកខានការប្រកួតច្រើននោះទេ នៃរដូវកាលថ្មី ខណៈលោកបានផ្តល់ការព្យាករណ៍ដំបូងជាវិជ្ជមានទៅលើការវះកាត់ជង្គង់របស់គេ។ នេះបើយោងតាមសារព័ត៌មាន Live Score ចេញផ្សាយនៅថ្ងៃទី០៥ ខែសីហា ឆ្នាំ២០២៣។
កីឡាករអន្តរជាតិប្រេស៊ីលរូបនេះបានទទួលការវះកាត់កាលពីថ្ងៃពុធ បន្ទាប់ពីមានប្រតិកម្មរលាក ក្រោយពីការវះកាត់កម្រិតធ្ងន់ធ្ងរជាងនេះ ដើម្បីព្យាបាលរបួស ដែលបានកើតឡើងនៅក្នុងព្រឹត្តិការណ៍ World Cup 2022។
Jesus បានចំណាយពេល ៣ខែ អវត្តមានពីការប្រកួត ដើម្បីវះកាត់នារដូវកាលមុន ខណៈក្លិបកាំភ្លើងធំបានបាត់បង់តំណែងកំពូលតារាង ក្នុងការដណ្តើមពានរង្វាន់ Premier League របស់ពួកគេដែរ។
ដោយបានអវត្តមានក្នុងការប្រជែងពាន Emirates Cup កាលពីយប់ថ្ងៃពុធ ប៉ះក្រុម Monaco កីឡាករ Jesus ក៏នឹងអវត្តមាននៅក្នុងការចាប់ផ្តើមយុទ្ធនាការថ្មី ក្នុងនោះរួមទាំងការប្រកួតដណ្តើមពានបើករដូវកាល FA Community Shield ទល់នឹងក្រុម Manchester City នារាត្រីថ្ងៃអាទិត្យផងដែរ៕