(អឺរ៉ុប)៖ ដូចបងប្អូនដឹងហើយថា ព្រឹត្តិការណ៍បាល់ទាត់ពានរង្វាន់ជើងឯកប្រចាំទ្វីបអឺរ៉ុប UEFA European Championship ឬហៅកាត់ថា យូរ៉ូ (Euro) ត្រូវបានបង្កើតឡើងដំបូងនៅឆ្នាំ១៩៦០ ពោលគឺនៅក្រោយ World Cup ៣០ឆ្នាំដែលមានប្រទេសទូទាំងទ្វីប ធ្វើការប្រជែងគ្នារៀងរាល់៤ឆ្នាំម្តង។

សម្រាប់ការប្រកួតពានរង្វាន់បាល់ទាត់យូរ៉ូ ២០២០ ដែលលើកយកមកប្រកួតនៅឆ្នាំ២០២១ ដោយសារវិបត្តិកូវីដ១៩ នឹងត្រូវចាប់ផ្តើមនៅយប់ថ្ងៃទី១១ ខែមិថុនា នេះហើយ។ ប៉ុន្តែតើលោកអ្នកដឹងទេថា ប្រទេសណាខ្លះដែលធ្លាប់ឈ្នះពានរង្វាន់យូរ៉ូ? ប្រទេសណាខ្លះដែលធ្លាប់ឈ្នះច្រើនដងជាងគេ?

Fresh News Plus សូមបង្ហាញបញ្ជីឈ្មោះប្រទេសដែលធ្លាប់ឈ្នះពានយូរ៉ូដូចខាងក្រោមនេះ៖

* ១៖ ឆ្នាំ១៩៦០ បានទៅលើសហភាពសហព័ន្ធសង្គមនិយមសូវៀត (SOVIET UNION)
ការប្រកួតផ្តាច់ព្រ័ត្រ គឺសូវៀតយកឈ្នះយូហ្គោលស្លាវី ២ទល់នឹង១ ក្នុងម៉ោងបន្ថែម។ ការប្រកួតបានធ្វើឡើងនៅទីក្រុងប៉ារីស ប្រទេសបារាំង ហើយវគ្គផ្តាច់ព្រ័ត្រនេះដែរ បានធ្វើឡើងក្រោមវត្តមានអ្នកគាំទ្រ ១៧,៩៦៦នាក់។

* ២៖ ឆ្នាំ១៩៦៤ បានទៅលើអេស្ប៉ាញ (SPAIN)
អេស្ប៉ាញបានលើកពានយូរ៉ូ ក្រោយយកឈ្នះក្រុមការពារជើងឯកសូវៀត ២ទល់នឹង១។ ការប្រកួតនេះបានធ្វើឡើងនៅកីឡដ្ឋាន Santiago Bernabeu ទីក្រុងម៉ាឌ្រីដ ប្រទេសអេស្ប៉ាញ ក្រោមវត្តមានអ្នកគាំទ្រដ៏ច្រើនលើសលប់ ត្រូវបានចារទុកក្នុងប្រវត្តិសាស្ត្រ គឺប្រមាណ ៧៩,១១៥នាក់។

* ៣៖ ឆ្នាំ១៩៦៨ បានទៅលើអ៉ីតាលី (ITALY)
អ៉ីតាលីបានយកឈ្នះយូហ្គោស្លាវី ២ទល់នឹង០ នៅថ្ងៃប្រកួតចុងក្រោយដែលបានធ្វើឡើងនៅទីក្រុងរ៉ូម ប្រទេសអ៉ីតាលី។ គួរបញ្ជាក់ថា ការប្រកួតផ្តាច់ព្រ័ត្រនៅឆ្នាំនោះ បានធ្វើឡើង ២ដង គឺលើកទី១ ក្នុងលទ្ធផល ១ទល់នឹង១ ហើយការប្រកួតលើកទី២ ដែលជាពេលអ៉ីតាលីឈ្នះ ២ទល់នឹង០ មានអ្នកទស្សនា ៣២,៨៨៦នាក់។

* ៤៖ ឆ្នាំ១៩៧២ បានទៅលើអាល្លឺម៉ង់ខាងលិច (WEST GERMANY)
នៅវគ្គផ្តាច់ព្រ័ត្រ អាល្លឺម៉ង់ខាងលិចបានយកឈ្នះសូវៀត ៣ទល់នឹង០។ ការប្រកួតនេះធ្វើឡើងនៅទីក្រុងប្រ៊ុសសែល ប្រទេសប៊ែលហ្ស៉ិក ក្រោមវត្តមានអ្នកចូលទស្សនា ៤៣,០៦៦នាក់។

* ៥៖ ឆ្នាំ១៩៧៦ បានទៅលើឆេកូស្លូវ៉ាគី (ZECHOSLOVAKIA)
ក្នុងការប្រកួតផ្តាច់ព្រ័ត្រនៃពានរង្វាន់យូរ៉ូ ឆ្នាំ១៩៧៦ ដែលមានការថែមម៉ោងផង និងឈានដល់ទាត់បាល់ ១១ម៉ែត្រផង ក្រោយលទ្ធផលស្មើគ្នា ២ទល់នឹង២នោះ ឆេកូស្លូវ៉ាគី បានយកឈ្នះម្ចាស់ការពារជើងឯក គឺអាល្លឺម៉ង់ខាងកើតក្នុងលទ្ធផល ៥-៣។ នោះគឺជាការប្រកួតដ៏អស្ចារ្យ ដែលបានប្រព្រឹត្តទៅនៅទីក្រុងប៊ែលហ្ក្រាដ ប្រទេសឆេកូស្លូវ៉ាគី។

* ៦៖ ឆ្នាំ១៩៨០ បានទៅលើអាល្លឺម៉ង់ខាងលិចម្តងទៀត (WEST GERMANY)
អាល្លឺម៉ង់ខាងលិច បានក្លាយជាម្ចាស់ពានរង្វាន់យូរ៉ូ លើកទី២ ក្រោយយកឈ្នះប៊ែលហ្ស៉ិក ២ទល់នឹង១។ ការប្រកួតនេះបានធ្វើឡើងនៅកីឡដ្ឋាន Stadio Olimpiaco នាទីក្រុងរ៉ូម ប្រទេសអ៉ីតាលី ក្រោមវត្តមានអ្នកចូលទស្សនា ៤៧,៨៦០នាក់។

* ៧៖ ឆ្នាំ១៩៨៤ បានទៅលើបារាំង (FRANCE)
បារាំងបានលើកពានយូរ៉ូ ក្រោយវាយបំបាក់អេស្ប៉ាញ ២ទល់នឹង០។ ការប្រកួតបានធ្វើឡើងនៅកីឡដ្ឋាន Parc de Princes ក្នុងទីក្រុងប៉ារីស ប្រទេសបារាំង ក្រោមវត្តមានទស្សនិកជន ៤៧,៣៦៨នាក់។

* ៨៖ ឆ្នាំ១៩៨៨ បានទៅលើប្រទេសហូឡង់ (NETHERLANDS)
ដែលបានយកឈ្នះសូវៀត ក្នុងលទ្ធផល ២ទល់នឹង០ និងបានក្លាយជាជើងឯកយូរ៉ូ ឆ្នាំ១៩៨៨។ ការប្រកួតនេះបានធ្វើឡើងនៅកីឡដ្ឋាន Olympiastadion នាទីក្រុងម៉ូនិក ប្រទេសអាល្លឺម៉ង់ ក្រោមអ្នកគាំទ្រ ៦២,៧៧០នាក់។

* ៩៖ ឆ្នាំ១៩៩២ បានទៅលើដាណឺម៉ាក (DENMARK)
ដាណឺម៉ាក បានធ្វើរឿងមិនគួរឲ្យទៅរួច គឺវាយបំបាក់អាល្លឺម៉ង់ ២ទល់នឹង០ ក្នុងទីក្រុងហ្កូថែនបឺគ ប្រទេសស៊ុយអ៊ែត ដើម្បីក្លាយជាជើងឯកយូរ៉ូ ឆ្នាំ១៩៩២។ គួរជម្រាបថា ដាណឺម៉ាក ទទួលបានការអញ្ជើញឲ្យចូលរួមប្រកួត ក្រោយយូហ្គោស្លាវី ត្រូវបានគេបណ្តេញចេញ។

* ១០៖ ឆ្នាំ១៩៩៦ បានទៅលើអាល្លឺម៉ង់ (GERMANY)
ការសម្រេចបានពានលើកទី៣ ក្រោយអាល្លឺម៉ង់ បានយកឈ្នះឆែក ២ទល់នឹង១ ក្នុងម៉ោងបន្ថែម នៅកីឡដ្ឋាន Wembley ក្នុងទីក្រុងឡុង ប្រទេសអង់គ្លេស។ ការប្រកួត នៅអង់គ្លេសនេះ មានអ្នកទស្សនា ៧៣,៦១១នាក់ ត្រូវបានកត់ត្រា។

* ១១៖ ឆ្នាំ២០០០ បានទៅលើបារាំងម្តងទៀត (FRANCE)
ការប៉ះទង្គិចគ្នាដ៏ធ្ងន់ធ្ងររវាងបារាំង និងអ៉ីតាលី ក្នុងលទ្ធផល ២ទល់នឹង១ ក្នុងម៉ោងបន្ថែម ធ្វើឲ្យបារាំងឈ្នះពានយូរ៉ូ លើកទី២។ ការប្រកួតដែលបានធ្វើឡើង នៅកីឡដ្ឋាន Feijenoord ក្នុងប្រទេសណែតដឺឡែន អ៉ីតាលីបាននាំមុខបារាំង តែបែរជាឥតបានការ ខណៈនៅម៉ោងបន្ថែម ក្រុមមាន់គកប្រើខ្នាយដ៏មុតស្រួចចាក់ទម្លុះ។

* ១២៖ ឆ្នាំ២០០៤ បានទៅលើក្រិក (GREECE)
ក្រិក បានយកឈ្នះព័រទុយហ្កាល់ ក្នុងលទ្ធផល ១ទល់នឹង០ ក្នុងការប្រកួតវគ្គផ្តាច់ព្រ័ត្រ ដែលធ្វើឲ្យប្រទេសមួយនេះ ឈ្នះពានយូរ៉ូលើកដំបូង ហើយក៏ជាពានអន្តរជាតិលើកដំបូងរបស់ខ្លួនផងដែរ។ ការប្រកួតដែលធ្វើឲ្យពិភពលោកស្រឡាំងកាំងនេះ បន្ទាប់ពីក្រិកបំបាក់ម្ចាស់ទឹកដី នៅទីក្រុងលីសប៊ុង។

* ១៣៖ ឆ្នាំ២០០៨ បានទៅលើអេស្ប៉ាញម្តងទៀត (SPAIN)
ការប្រកួតទម្ងន់ធ្ងន់ រវាងអេស្ប៉ាញ និងអាល្លឺម៉ង់ បញ្ចប់ក្នុងលទ្ធផល ១ទល់នឹង០ ដោយការរកគ្រាប់បានពីកំពូលកីឡាករ Fernando Torres។ ការប្រកួតឈ្នះពានយូរ៉ូ លើកទី២នេះ បានប្រព្រឹត្តទៅនៅទីក្រុងវ្យែន ប្រទេសអូទ្រីស ក្រោយពីអេស្ប៉ាញរងចាំអស់រយៈពេល ៤៤ឆ្នាំ។

១៤៖ ឆ្នាំ២០១២ បានទៅលើអេស្ប៉ាញម្តងទៀត (SPAIN)
សម័យកាលនោះ អេស្ប៉ាញជាប់ឈ្នោះជាប្រទេស ដែលពោរពេញដោយភាពជោគជ័យលើវិស័យបាល់ទាត់ ក្រោយការពារជើងឯកយូរ៉ូ ពីអ៉ីតាលី ក្នុងលទ្ធផល ៤ទល់នឹង០ នៅទីក្រុងកៀហ្វ ប្រទេសអ៊ុយក្រែន។ ជ័យជម្នះដ៏ត្រចេះត្រចង់ បានកើតឡើងក្រោយពីអេស្ប៉ាញ ឈ្នះពានពិភពលោក World Cup 2010 ខណៈអីតាលី ជាជើងឯកពាន World Cup 2006។

* ១៥៖ ឆ្នាំ២០១៦ បានទៅលើព័រទុយហ្កាល់ (PORTUGAL)
ព័រទុយហ្កាល់ ដែលស្ថិតក្រោមសម័យកាលកំពូលកីឡាករ Cristiano Ronaldo បានយកឈ្នះម្ចាស់ទឹកដី គឺបារាំង ក្រោមថ្វីជើងកីឡាករស្បែកខ្មៅ Eder នៅម៉ោងបន្ថែម ដែលការប្រកួតបានធ្វើឡើងនៅកីឡដ្ឋាន Parc de Princes។ បារាំង ដែលកាលនោះពោរពេញដោយអំណួត ព្រោះមានកីឡាករកំពួលៗ បែរជាប្រហែស ធ្វើឲ្យបាត់បង់ឱកាសក្នុងការលើកពាន។

សរុបមក ចាប់តាំងពីបង្កើតមកនៅឆ្នាំ១៩៦០ ពានរង្វាន់យូរ៉ូបានរៀបចំ ១៥លើកមកហើយ។ ប្រទេសដែលបានលើកពាននេះច្រើនជាងគេ គឺអាល្លឺម៉ង់ និងអេស្ប៉ាញ សរុប ៣លើកដូចគ្នា៕