(កូរ៉េ)៖ បន្ទាប់ពីធ្វើការបដិសេធនូវរាល់ការចោទប្រកាន់នានា ទាក់ទិននឹងរឿងប្រើប្រាស់គ្រឿងខុសច្បាស់ តារាច្រៀង និងសម្តែងដ៏ល្បីរបស់កូរ៉េ Park Yoochun សមាជិកក្រុម JYJ បានសារភាព និងទទួលស្គាល់ថា គាត់ពិតជាប្រព្រឹត្តខុសច្បាប់។ ក្រុមប៉ូលិសស៊ើបអង្កេតថ្នាំញៀននៃសង្កាត់ Gyeonggi បានប្រកាសថា Yoochun បានសារភាពថា ពិតជាបានប្រើប្រាស់គ្រឿងញៀនប្រាកដមែន។

សូមបញ្ជាក់ថា Park Yoochun ត្រូវបានចោទប្រកាន់លើ ការទិញគ្រឿងញៀនមេតំហ្វេតាមីន​ (Methamphetamine) ចំនួន​ ១.៥ក្រាម និងការប្រើប្រាស់ថ្នាំញៀនខុសច្បាប់​ជាមួយ Hwang Hana ដែលជាអតីតគូដណ្តឹងរបស់លោក ហើយលទ្ធផល​នៃការធ្វើតេសរកសារធាតុញៀនរបស់លោក គឺវិជ្ជមាន។ កាលពីដំបូងឡើយលោកបានបដិសេធនូវការប្រើប្រាស់គ្រឿងញៀន និងអះអាងថា លោកគ្រាន់់តែបានទិញរបស់ម្យ៉ាងឱ្យ Hwang Hana ដោយមិនដឹងថា វាជាគ្រឿងញៀននោះទេ។

ទោះបីជាយ៉ាងណាក៏ដោយ ទីបំផុត Park Yoochun បានសារភាពថា គាត់ពិតជាបានប្រើប្រាស់គ្រឿងញៀនខុសច្បាប់ ក្នុងពេលការសួរចម្លើយកាលពីព្រឹកព្រលឹមថ្ងៃម្សិលមិញ ហើយលោកបានបញ្ជាក់ថា លោកខ្លាចបែកធ្លាយរឿងអាម៉ាសរបស់ខ្លួន ប៉ុន្តែចុងក្រោយក៏សម្រេចចិត្តបញ្ជាក់ការពិត។

Park Yoochun បាននិយាយថា «ខ្ញុំពិតជាខ្លាចនូវការទទួលស្គាល់ការពិត ប៉ុន្តែខ្ញុំគិតថា ខ្ញុំត្រូវតែទទួលស្គាល់នូវអ្វីដែលត្រូវតែទទួលស្គាល់ និងស្នើសុំការអភ័យទោសនូវរាល់រឿងរ៉ាវដែលត្រូវសុំអភ័យទោស»៕