(ភ្នំពេញ)៖ កំពូលតារាចម្រៀងល្បីឈ្មោះ ប្រចាំផលិតកម្មថោន មាស សុខសោភា កាលពីពេលថ្មីៗនេះ ពោលគឺកាលពីថ្ងៃទី ១៨ ខែមេសា កន្លងទៅនេះ នាងបានចេញដំណើរទៅធ្វើការសម្ដែង នៅឯក្រៅប្រទេស គឺទៅសម្ដែងនៅលើទឹកដី នៃប្រទេសកាណាដា ក្នុងទីក្រុងចំនួន៧ ខណៈការប្រគំតន្រ្តី ដែលធ្វើឡើងកន្លងមកនេះ គឺទទួលបានការគាំទ្រយ៉ាងខ្លាំង ដោយសំបុត្រចូលទស្សនាការ ប្រគំតន្ត្រីនៅទីក្រុង Montreal ត្រូវបានលក់អស់គ្មានសល់ តាំងពីជិត៣ខែមុនមកម៉្លេះ។
ដោយឡែក អ្វីដែលគួរឲ្យធ្វើការចាប់អារម្មណ៍ និងកត់សម្គាល់ខ្លាំងជាងនេះទៅទៀត ចំពោះការដាក់លក់បុត្រសម្រាប់ការប្រគំតន្ត្រីបន្ទាប់នៅ Edmonton គឺលក់អស់ក្នុងរយៈពេលត្រឹមតែ២ម៉ោងប៉ុណ្ណោះ។ នេះគឺជាជោគជ័យយ៉ាងធំធេង និងបង្ហាញពីទឹកចិត្តស្រឡាញ់រាប់អាន យ៉ាងជ្រាលជ្រៅអំពីសំណាក់ បងប្អូនខ្មែរដែលរស់នៅប្រទេសកាណាដា ចំពោះអ្នកនាង មាស សុខសោភា។
គួរបញ្ជាក់ថា កាលចេញទៅសម្ដែងនេះ គឺតារាចម្រៀងស្រីរូបនេះត្រូវទៅសម្ដែងនៅក្នុងទីក្រុងធំៗ ៧ផ្សេងៗគ្នា ដែលការសម្ដែងគឺចាប់ពីចុងខែមេសារហូតដល់ដើមខែមិថុនា ដែលមានដូចជាទីក្រុង Montreal នៅថ្ងៃទី ២០ខែមេសា ទីក្រុង Edmonton ថ្ងៃទី៤ ខែឧសភា ទីក្រុង Hamilton ថ្ងៃទី ១១ ខែឧសភា ទីក្រុង Toronto ថ្ងៃទី ២៥ ខែឧសភា ទីក្រុង Montreal នៅថ្ងៃទី ១ ខែមិថុនា ទីក្រុង Winnipeg ថ្ងៃទី៨ ខែមិថុនា ទីក្រុង Calgary ថ្ងៃទី១៥ ខែមិថុនា និងទីក្រុង Vancouver ថ្ងៃ៦ ខែមិថុនា ឆ្នាំ២០១៩៕
