(ក្រុងឡុងដ៍)៖ ក្លឹប Wolverhamton Wanderer បានប្រកាសពីការទិញកីឡាករ Raul Jimenez ពីក្លឹប Benfica របស់ព័រទុយហ្គាល់ ក្នុងតម្លៃខ្លួន ៣០លានផោន ស្មើនឹង ៣៩.២៣លានដុល្លារ បំបែកកំណត់ត្រាក្នុងនាមកីឡាករថ្លៃជាងគេ។

កីឡាករជនជាតិមិចស៊ិក វ័យ២៧ឆ្នាំ Jimenez ត្រូវបាន Benfica សម្រេចឲ្យក្លឹបដែលទើបឡើងមកលេងនៅ Premier League រដូវកាលឆ្នាំ២០១៨-២០១៩ មួយនេះខ្ចីជើងរយៈពេលវែងកាលពីចុងឆ្នាំ២០១៨ កន្លងទៅ និងរហូតដល់ពេលនេះ ភាគីទាំងពីរបានសម្រេចទិញ-លក់ជាផ្លូវការតែម្តង។

កីឡាករក្នុងក្រុមជម្រើសជាតិមិចស៊ិក Raul Jimenez ជាតួអង្គសំខាន់មួយរូបដែលបានជួយឲ្យ Wolves កំពុងឈរនៅ លេខរៀងទី៧ ក្នុង Premier League បច្ចុប្បន្ន និងបានជួយឲ្យក្រុមថ្មីនេះឡើងដល់វគ្គពាក់កណ្តាលផ្តាច់ព្រ័ត្រនៃពាន FA Cup ដោយត្រូវប៉ះ Watford នាថ្ងៃអាទិត្យចុងសប្តាហ៍នេះផងដែរ។

Raul Jimenez រកបាន១៥គ្រាប់ ពីការចូលលេងបាន ៣៧ប្រកួតឲ្យ Wolves នារដូវកាលនេះ និងជាកីឡាករដែល ស៊ុតគ្រាប់ជ័យជម្នះ ២-១ ទៅលើ Manchester United ក្នុងវគ្គ ៨ក្រុមនៃ FA Cup ទៀតផង៕