(ភ្នំពេញ)៖ មួយរយៈពេលចុងក្រោយនេះ សង្កេតឃើញថា នៅលើបណ្តាញសង្គម មានការបង្ហោះច្រើនទាក់ទងទៅនិងស្នេហាបែកបាក់ មានអ្នកទី៣ជ្រែកស្នេហ៍ និងរឿងជាច្រើន ទៀត ទាក់ទងទៅនឹងជីវិតប្តីប្រពន្ធ។ ក្រោយពីមានរឿងរ៉ាវជាច្រើន ទាក់ទងរឿងគ្រួសារបែបនេះ អ្នកនាង Theara Leang ម្ចាស់ហាង TOPS BRAND បានសរសេរសារវែងអន្លាយមួយ រៀបរាប់ពីជីវិត «ប្តី-ប្រពន្ធ» ដើម្បីជំនួយស្មារតី ដល់អ្នកមានជីវិត គូជាច្រើនទៀត។
ថៅកែស្រីរូបស្រស់ រួសរាយរាក់ទាក់ ហាង TOPS BRAND និងជាម្ចាស់ក្រុមហ៊ុនផលិតផល ម៉ាក T&L Natural អ្នកនាង Theara Leang បានប្រាប់ឲ្យដឹងថា «ពេលស្រលាញ់គ្នា អ្វីក៏ស្រស់បំព្រង ពិភពលោកមានតែបងនិងអូន អ្នកកំពុងអានធ្លាប់ឆ្លងកាត់ទេ? បច្ចុប្បន្ននេះ មានមនុស្សនិយាយតៗគ្នាថា គ្រួសារខ្លះរស់នៅមានសុភមង្គលណាស់ ខ្លះល្អដែរ គ្រួសារខ្លះអត់សោះ? តើមូលហេតុអ្វី? ជីវិតគូហេតុអ្វីចាំបាច់ជូរចត់ ហេតុអ្វីមិនល្អដូចម្នាក់នេះ ដូចម្នាក់នោះ? តើលើលោកនេះ ពិតជាមានគ្រួសារអច្ឆរិយ: ដែលមិនចេះមានបញ្ហាសោះឬយ៉ាងណា? គ្មានទេ គ្រប់គ្រួសារ សុទ្ធតែមានបញ្ហា តូចឬធំ មានទាំងអស់ តាមទំហំនៃទង្វើ គ្មាននរណាមួយល្អឥតខ្ចោះ ប៉ុន្តែគឺមនុស្ស ជាអ្នករៀបចំជីវិតរៀងខ្លួន តើចាំបាច់អីមើលគេរហូតនោះ....?»។
អ្នកនាងបានសរសេរ ក្នុងសារនោះទៀតថា «ចាស់ៗពោលថា សំណាបយោងដី ស្រីយោងប្រុស ខ្ញុំគាំទ្រមែនទែន។ ប៉ុន្តែ ពាក្យ១ទៀត សម្លរឆ្ងាញ់ដោយសារគ្រឿង គ្រួសាររុងរឿងដោយសារភរិយា។ ខ្ញុំយល់ថាវាជាសម្ពាធដែលពិបាករើបំរាស់ ឥឡូវនេះយើងចាប់ផ្ដើមវិភាគរឿងម្ហូបបន្តិចនាងធ្វើម្ហូបលើកណា ក៏ប្ដីនិយាយថា «អត់ឆ្ងាញ់» ជារឿយៗ ហើយភាគច្រើន ប្ដីទៅញ៉ាំបាយក្រៅ ជុំមិត្តភក្តិ ផឹក លើកណាក៏ថាញ៉ាំមិនកើត អាងអីបាយក្រៅ។ ប្រពន្ធបានត្រឹមលួចយំ អត់ហ៊ាននិយាយច្រើន ព្រោះគេជាអ្នកផ្គត់ផ្គង់គ្រួសារ មិនអាចស្រែកជេរ ឬឈ្លោះគ្នា កុំអោយខ្មាស់គេ ព្រោះចាស់ៗនិយាយថា «ខឹងប្ដីអោយទ្រាំអត់ ប្ដីសង្កត់កុំអោយរើ»។ ហេតុអ្វីប្ដីមិនដែលនិយាយថា «អូន សម្លរនឹងដូចដាក់គ្រឿងខុស អូនសាកភ្លក់មើល ប្រៃផ្អែមមិចទេ បងញ៉ាំទៅដូចអត់សូវឆ្ងាញ់ លើកក្រោយកុំដាក់ប្រៃពេក កុំដាក់ផ្អែមពេក បងចូលចិត្តរស់ជាតិស្រាលៗ» wow... នេះជាប្ដីគួរអោយគោរព និងមានសុជីវធម៌ ជាមនុស្សប្រុសមែន។ ហើយនិយាយក្នុងនាម ជាបុរសមានសុជីវធម៌ មិនមែនហាស្រែកៗ អត់ចេះដោះស្រាយ អត់ចេះណែនាំ គ្មានភាពជាអ្នកដឹកនាំក្នុងគ្រួសារ ហើយគ្មានស៉ីវធម៌មែនទែន។ តាមការពិត ទោះជាប្រពន្ធធ្វើឆ្ងាញ់ ឬមិនឆ្ងាញ់ ប្ដីនៅតែចូលចិត្តញ៉ាំក្រៅដដែល រឿងនឹងជាចរឹកមនុស្សប្រុសខូច»។
អ្នកនាងសរសេរបន្តទៀតថា «ប្រពន្ធបន្ទោសប្ដីដើរលេងអត់ចូលផ្ទះ មានស្រី ដាច់យប់រហូត ចំណែកប្ដី បន្ទោសប្រពន្ធអត់ចេះធ្វើការងារអីទេ ផ្ទះចូលមកលើកណាក៏មិនស្អាត មើលខោអាវកូនប្រឡាក់បាយម្ហូប តែម៉ោងបាយជួនបាយមិនទាន់ឆ្អិន រវល់ធ្វើអីម្ងៃៗ? ( So sad..! ថាប្រពន្ធទៅ ខឹងនិយាយរករឿងប្ដីនៅតែក្រៅ តែប្ដីរះប្រពន្ធខ្លាំងដែរនឹង តើមានដែលចេះយកគ្នាដាក់ក្នុងចិត្ត ក្នុងបេះដូងទេ? ស្គាល់ខ្លួនអែងជាអ្នកណាទេ? ) តើសុភមង្គលនៅត្រង់ណា? ប្ដីប្រពន្ធឈ្លោះទាស់ទែងគ្នា ស្មើនឹងគ្មានដំណោះស្រាយ បើនៅតែស្រែកយកឈ្នះរៀងខ្លួនបែបនេះ? ប្រពន្ធ ដឹងតែប្ដីមិនសូវនៅផ្ទះ ខឹងប្ដី តែប្ដី ដែលជាជំហររបស់គ្រួសារទាំងមូល ដែលគិតដឹងទេថា គួរធ្វើអ្វី?កុំអោយមានបន្ទុកលើប្រពន្ធពេក (និយាយដូចជាកាន់ជើងខាងស្រី) ប៉ុន្តែគួរពិចារណា។
តើ....ប្ដីល្អគួរធ្វើបែបណាចំពោះគ្រួសារ?
រាល់បញ្ហាបន្តិចបន្តួចក្នុងផ្ទះ ត្រូវគិតដោះស្រាយបញ្ចប់បញ្ហា។ ការងារខាងក្រៅហត់ខ្លាំង មិនហ៊ានស្រែកដាក់គេ ហើយប្រពន្ធកាន់តែមិនគួរស្រែកដាក់ប្រពន្ធ, ត្រូវទេបង? ចិត្តធ្ងន់ជានិច្ច កូនប្រុសដើមទ្រូង២ចង្អាម កុំអោយទន់ទ្រាយ ត្រូវដឹងថា គ្រួសារសំខាន់ខ្លាំងបំផុត។ ផិតប្រពន្ធ ខុសឬត្រូវ? កុំសួរ..ស្រីផិតក៏ខុស ប្រុសផិតក៏ខុស បើដរាបណានៅជាប្ដីប្រពន្ធ ខុសហើយថោកទៀត សួរថាពេលផិតទៅ ស្រួលទេ..? អ្នកផិតជួយបកស្រាយបន្តិច ចង់ដឹងណាស់ និយាយមែនទែន ហាមធ្វើមុខភ្លើ។ ប្រុសដែលស្រលាញ់ប្រពន្ធពិត ទោះនាងនោះលួងលោមប៉ុណ្ណា ក៏អត់ដែរ តិចអត់ជឿ។
អ្នកនាងបានបន្ថែមចុងក្រោយថា «ខ្ញុំសូមនិយាយថា គ្រួសារ មានតម្លៃធំធេងណាស់ អាចនិយាយបានថា ខ្ញុំបានជួបប្ដីល្អម្នាក់ ខ្ញុំស្កប់ស្កល់ណាស់ ប៉ុន្តែសួរថាអនាគតមើលឃើញទេ អត់ទេ...! ប៉ុន្តែថ្ងៃនេះ ពួកយើងត្រូវតែល្អ ហើយត្រៀមខ្លួនល្អសម្រាប់ថ្ងៃស្អែក ស្អែករហូត១ឆ្នាំ ទាក់ពាក្យគ្នា ៤-៥ដងបានហើយ ប៉ុន្តែកុំបែកគ្នា រឿងអ្វីក៏ខ្ញុំលើកលែង ប៉ុន្តែអត់មានអាដែងនែក ទៅខារ៉ាអូខេ អោបស្រី លួចមានស្រី មានប្រពន្ធចុងអីនឹងហេ ស្រលាញ់ប្ដីមែន តែមានដែលថាអោយប្ដីមានស្រីទេ? កុំថាឡើយលួចលាក់ជួបស្រី សូម្បីតែឆាតលេងជាមួយស្រីក៏សូមអត់ដែរប្រាប់អោយហើយ ហើយខ្ញុំក្លាហានណាស់ ខ្ញុំបាននិយាយពាក្យទាំងនេះរួចហើយ»៕
