(ភ្នំពេញ)៖ កញ្ញា រឿន ស៊ីណាត ដែលជាបេក្ខនារីតំណាងកម្ពុជា ក្នុងកម្មវិធី «Miss Universe» បានបញ្ចេញសកម្មភាពយ៉ាងលេចធ្លោ ជាមួយនឹងឈុតសម្លៀកបំពាក់គ្រប់ទម្រង់។ អ្វីដែលសំខាន់ កាលពីយប់មិញនេះ ឮជាកម្មវិធីដើរបង្ហាញម៉ូដ ក្នុងព្រឹត្តការណ៍ប្រកួតសម្រស់ Miss Universe 2018 ដែលមានឈុតរាត្រីសមោសរ និងឈុតហែលទឹក បង្ហាញដោយបេក្ខនារីមកពីជាង ៩០ប្រទេស លើពិភពលោក ។ ក្នុងនោះ គេសង្កេតឃើញបវកញ្ញាចក្រវាលតំណាងឲ្យកម្ពុជា កញ្ញា រឿន ណាត ធ្វើបានល្អបំផុតទាំងកាយវិការ និងទឹកមុខនៅលើឆាកដ៏ធំ ប្រកបដោយភាពជឿជាក់បំផុតកាលពីយប់មិញនេះ។
ជាការពិត បវរកញ្ញា រឿន ណាត បានបង្ហាញខ្លួនយ៉ាងមានទំនុកចិត្ត ប្រកបដោយភាពជឿជាក់ជាមួយនឹងស្នាមញញឹមផុសចេញពីបេះដូង ធ្វើឲ្យកញ្ញា រឿន ណាត កាន់តែលេចធ្លោ។ ជាមួយគ្នានេះ រឿន ណាត បានបង្ហាញខ្លួនចំនួន ៣ដង ជាមួយនឹងឈុតសម្លៀកបំពាក់ផ្សេងៗគ្នា ដោយក្នុងឈុតដំបូង គឺការណែនាំខ្លួន និងឈ្មោះប្រទេសកម្ពុជា ឈុតទី២ គឺឈុតហែលទឹកយ៉ាងសិចស៊ី និងឈុតទី៣ នោះគឺជាឈុតរាត្រីសមោសរផងដែរ។
យ៉ាងណាមិញ ជាមួយនឹងការបង្ហាញខ្លួន និងបោះជំហានដើរប្រកបដោយភាពជឿជាក់ ព្រមទាំងស្វាហាប់ក្នុងទឹកមុខពោរពេញដោយញញឹមស្រស់ស្រាយ កាន់តែធ្វើឲ្យអ្នកគាំទ្រកម្ពុជារំភើបចិត្ត និងកោតសរសើរដល់បវកញ្ញាកម្ពុជា កញ្ញា រឿន ណាត យ៉ាងខ្លាំង។
គួរបញ្ជាក់ថា កាលពីយប់មិញនេះ គឺជាវគ្គប្រកួតបឋម សម្រាប់បេក្ខនារីតំណាងប្រទេសជុំវិញពិភពលោកបង្ហាញខ្លួន ខណៈដែលរាត្រីគ្រងមកុដក្នុងកម្មវិធី Miss Universe 2018 គឺធ្វើឡើងនៅថ្ងៃទី១៧ ខែធ្នូនេះហើយ៕