(ភ្នំពេញ)៖ កាលពីពេលថ្មីៗនេះមានការចាប់អារម្មណ៍ជាខ្លាំង បន្ទាប់ពីមានការបែកធ្លាយវីដេអូមួយ ចេញពីការប្រកួតកម្មវិធី Miss Universe ដែលមានអ្នកគាំទ្ររបស់កម្មវិធីក្នុងស្រុកបានលើកឡើងថា បវរកញ្ញាតំណាងប្រទេសអាមេរិកបាននិយាយពាក់ព័ន្ធនឹងបវរកញ្ញាកម្ពុជា កញ្ញា រឿន ណាត ថា មិនអាចនិយាយភាសាអង់គ្លេសបាននោះទេ។ យ៉ាងណាមិញឆ្លើយតបទៅនឹងការយល់ច្រឡំរបស់ទស្សនិកជន កញ្ញា រឿន ណាត បានចេញមុខបកស្រាយ ព្រមទាំងសំណូមពរឲ្យអ្នកគាំទ្ររបស់នាង កុំឲ្យមានការយល់ច្រឡំទៅលើបេក្ខនារីទាំងនោះ ពោលគឺពួកគេមានទំនាក់ទំនងល្អជាមួយគ្នារហូតមក។
បើតាមការឲ្យដឹងពីម្ចាស់គណនីហ្វេសប៊ុកមួយ ឈ្មោះថា Romyr Libo-on បានសរសេរជាភាសាអង់គ្លេស ដែលបកប្រែជាភាសាខ្មែរមានន័យថា «សូមផ្ញើដល់អ្នកគាំទ្រកម្មវិធី Miss Universe ជាទីស្រឡាញ់ ពួកយើងបានផ្ដល់ក្ដីស្រឡាញ់ឲ្យគ្នាទៅវិញទៅមក ហើយពួកយើងមិនចង់ឲ្យមានការយល់ច្រឡំ ក៏ដូចជាមានការបំផ្លាញនូវទំនាក់ទំនងអនុស្សាវរីយ៍ល្អៗរបស់ពួកគេនោះទេ ហើយនេះក៏ជាការចងចាំដ៏ល្អរបស់ពួកគេផងដែរ»។
យ៉ាងណាមិញ នៅពេលថតរូបទុកជាអនុស្សាវរីយ៍ គេសម្គាល់ឃើញថា បវរកញ្ញាឯក រឿន ណាត ពិតជាបានទទួលការស្វាគមន៍ ទំនាក់ទំនងយ៉ាងល្អជាមួយនឹងបវរកញ្ញា Miss Universe តំបន់ដទៃទៀត ដោយបានបង្ហាញកាយវិការឱប ផ្ដល់ការសាមគ្គីគ្នាយ៉ាងល្អ។
សូមបញ្ជាក់ថា កញ្ញា រឿន ណាត និងបេក្ខនារីតំណាងប្រទេសផ្សេងទៀត បច្ចុប្បន្នកំពុងស្ថិតនៅប្រទេសថៃ ដើម្បីចូលរួមបង្ហាញសមត្ថភាពក្នុងកម្មវធី Miss Universe ២០១៨៕
