(ភ្នំពេញ)៖ តារាចម្រៀងប្រុសល្បីឈ្មោះប្រចាំទ្រនំ ហង្សមាស លោក ណុប បាយ៉ារិទ្ធ កើតក្តីហ្មងសៅ ក្តៅចិត្ត ខណៈមាន មនុស្សឆ្លៀតឱកាសបានក្លែងបន្លំឈ្មោះរបស់លោក ទៅបង្កើតគណនីហ្វេសប៊ុក យកទៅផ្សព្វផ្សាយលក់ដីឡូត៍ លើបណ្តាញសង្គមហ្វេសប៊ុក ដែលបានទាញប្រយោជន៍ពីឈ្មោះរបស់លោកច្រើនខែឆ្នាំ ទោះបីជាតារាសចម្រៀងប្រុសរូបនេះ ប្រឹងប្រាប់ទៅម្ចាស់គណនីហ្វេសប៊ុកក្លែងក្លាយ ឲ្យបញ្ឈប់សកម្មភាពនោះក៏ដោយ។
យ៉ាងណាមិញ ដោយទ្រាំមិនបាននឹងទង្វើគឃ្លើនរបស់មនុស្សគ្មានឧត្តមគតិនោះ ដែលបានក្លែងឈ្មោះលោកយកទៅផ្សព្វផ្សាយលក់ដីឡូត៍បែបនេះ លោក ណុប បាយ៉ារិទ្ធ ក៏បានប្រកាសនៅលើគណនីហ្វេសប៊ុកផ្លូវការ ដែលលោកប្រើប្រាស់សព្វថ្ងៃ កាលពីព្រឹកមិញច្បាស់ៗថា «សូមបញ្ជាក់ថា អាខោននេះ មិនមែនជាអាខោនពិតរបស់ខ្ញុំទេ ហើយខ្ញុំក៏បានប្រាប់ទៅម្ចាស់អាខោនក្លែងក្លាយហ្នឹងដែរ ថាមេត្តាឈប់យកឈ្មោះខ្ញុំទៅពាក់ព័ន្ធនឹងការរកស៊ីរបស់គាត់ទៀត តែគាត់នៅតែមិនស្តាប់។ ដូច្នេះ សូមបងប្អូនកុំមានការយល់ច្រលំ ខ្ញុំអត់មានទំនាក់ទំនងអីនឹងអាខោនមួយនេះ ឬម្ចាស់មុខរបរនេះទេ មុនសម្រេចចិត្តធ្វើអ្វីមួយសូមធ្វើការពិចារណា»។
គួរបញ្ជាក់ថា គណនីហ្វេសប៊ុកដែលបានក្លែងបន្លំយកឈ្មោះលោក ណុប បាយ៉ារិទ្ធ ទៅផ្សព្វផ្សាយលក់ដីឡូត៍នោះ មានឈ្មោះថា «ណុប បាយ៉ារិទ្ធ» ខណៈដែលឈ្មោះហ្វេសប៊ុកពិតប្រាកដ ដែលតារាចម្រៀងប្រុសនៅផលិតកម្មហង្សមាសរូបនេះ ដែលកំពុងនឹងប្រើប្រាស់ផ្លូវការរាល់ថ្ងៃ មានឈ្មោះថា «Bayyareth Nop»៕