(ភ្នំពេញ)៖ អតីតម្ចាស់ពាន «Cambodian Idol» រដូវការទី១ លោក នី រតនា កាលពីថ្ងៃទី២៧ ខែមេសា ឆ្នាំ២០១៨ កន្លងទៅ បានភ្ជាប់ពាក្យជាមួយនារីដ៏ស្រស់ស្អាតម្នាក់ ឈ្មោះ កញ្ញា ហេង សុវណ្ណភក្ដិណា ជាកូនស្រីអ្នកជំនួញធំដុំមួយ អមដោយការចូលរួមពីភ្ញៀវកិត្តិយសយ៉ាងច្រើនកុះករ ព្រមទាំងពាក្យជូនពរជាច្រើន ដល់គូស្នេហ៍ទាំង២ នេះឲ្យស្រឡាញ់គ្នាជារៀងរហូត។
បន្ទាប់ពីភ្ជាប់ពាក្យរួច គេសង្កេតឃើញថា លោក នី រនា និងគូដណ្ដឹង តែងតែបង្ហាញភាពផ្អែមល្ហែមចំពោះគ្នាទៅវិញទៅមក និងមានដំណើរកម្សាន្តជាក្រុមគ្រួសារផងដែរ។ ជាក់ស្ដែងថ្មីៗនេះ តាមរយៈហ្វេសប៊ុកផ្លូវការរបស់លោកនី រតនា បានបង្ហោះនូវសារមួយឃ្លា ដោយភ្ជាប់រូបថតជាច្រើនសន្លឹក ដោយសរសេរថា «ពេលវេលាដ៏សំខាន់សម្រាប់ជីវិត នឹងមកដល់ក្នុងពេលឆាប់ៗនេះ។ នេះគឺជាកម្រងរូបភាព Pre-Wedding ខ្លះៗ របស់យើងខ្ញុំទាំងពីរនាក់»។
តាមរយៈការបង្ហោះរូប Pre-Wedding ជាច្រើនសន្លឹក រួមជាមួយការជ្រើសរើសម៉ូដសំលៀកបំពាក់បុរាណខ្មែរយ៉ាងស្រស់ស្អាត និងការជ្រើសរើសទីតាំងថតនៅទីក្រុងបាងកក ប្រទេសថៃ ផងនោះ កាន់តែធ្វើឲ្យគូស្នេហ៍មួយគូនេះ ស្រស់សង្ហា ក្នុងនោះ អ្នកទាំងពីរក៏មិនភ្លេចទៅផ្ដិតយករូបភាព Pre-Wedding នៅលើទឹកដីអង្គរ នៃខេត្តសៀមរាប ដែលមានទេសភាពស្រស់ត្រកាល សាកសម សម្រាប់គូស្នេហ៍ ផ្ដិតយករូបភាព ត្រៀមនាថ្ងៃសិរីមង្គលរបស់ខ្លួន។
យ៉ាងណាមិញ លោក នី រតនា ក៏មិនទាន់បានបញ្ជាក់ថា ថ្ងៃមង្គលការរបស់លោកនឹងរៀបចំនៅថ្ងៃណាឲ្យប្រាកដនៅឡើយទេ តែលោកនឹងដឹកដៃគូស្នេហ៍ចូលរោងការនាដើមឆ្នាំ២០១៩ ខាងមុខនេះ៕
