(ភ្នំពេញ)៖ តារាសម្ដែងស្រី សាច់សខ្ចី ល្បីឈ្មោះ សម្រស់ស្រស់សោភា ទឹកមុខគួរឲ្យស្រឡាញ់ មានមន្តស្នេហ៍ មាន សូនីតា ដែលទស្សនិកជនភាគច្រើន បានស្គាល់ថាជា «រាជនីក្រមា» មួយដួងដែលមានភាពលេចធ្លោខ្លាំងជាមួយនឹងវិស័យសិល្បៈ ក៏នឹងកំពុងតែទទួលបានប្រជាប្រិយភាពជាបន្តបន្ទាប់។ ដោយឡែកទស្សនិកជនភាគច្រើនធ្លាប់តែឃើញតារាសម្តែង មាន សូនីតា បង្ហាញខ្លួនជាមួយសម្លៀកបំពាក់ ដែលច្នៃចេញពីក្រមាជាញឹកញាប់ លើកនេះពិតជាប្លែកដោយនាងបានតែងតួ ជានាយរោង ដែលជាតួសម្រាប់តំណាងឲ្យតួអង្គបុរស នៃរបាំព្រះរាជទ្រព្យខ្មែរ ដែលនាងចង់បង្ហាញពីទឹកចិត្តស្រលាញ់សិល្បៈវប្បធម៌ខ្មែរ ពិតជាស្រស់ស្អាត។
អមជាមួយនឹងរូបភាពជាច្រើនសន្លឹកបង្ហោះនៅលើបណ្តាញសង្គម រាជិនីក្រមា មាន សូនីតា ថែមទាំងបានព្រលយពាក្យថា «សូមអភ័យផង ដល់សាស្រ្តាចារ្យ រៀមច្បងសិល្បៈបុរាណទាំងអស់ផង បើសិនកាយវិការរឹងច្រងេងច្រងាង មិនត្រូវក្បាច់ ឬសម្លៀកបំពាក់ត្រង់ចំណុចណាមួយនោះ ព្រោះថា សូនីតា គ្មានន័យផ្សេង ក្រៅពីចិត្តស្រលាញ់ នឹងចង់បង្ហាញភាពស្រស់ស្អាតរបស់វប្បធម៌ខ្មែរតែប៉ុណ្ណោះ»។
ជាមួយគ្នានេះ «រាជនីក្រមា» រូបនេះ បានបង្ហើបឲ្យដឹងថា ការតែងខ្លួនជាតួអង្គសំខាន់ផ្នែកបុរស ក្នុងរបាំព្រះរាជទ្រព្យខ្មែរនេះ នាងនឹងមានចេញជាវីដេអូ ដែលនឹងចេញផ្សាយក្នុងពេលឆាប់ៗផងដែរ ។ ទស្សនិកជនជាច្រើនកំពុងតែទន្ទឹងរង់ចាំទស្សនាវីដេអូរបស់កញ្ញា មាន សូនីតា ថានឹងប្លែកក៏ដូចជាមានចំណុចពិសេសអ្វីខ្លះ នៅក្នុងវីដេអូនៃរបាំព្រះរាជទ្រព្យ ដែល មាន សូនីតា កំពុងនឹងចង់បង្ហាញពីភាពស្រស់ស្អាតរបស់វប្បធម៌ខ្មែរនោះ៕