(ភ្នំពេញ)៖ ក្រោយពីបានក្លាយជាម្ចាស់ជ័យលាភី និងបានទទួលពាន ព្រមទាំងទទួលបានរង្វាន់យ៉ាងច្រើន សន្ធឹកសន្ធាប់ហើយនោះ ស្រាប់តែថ្មីៗនេះ កុមារា ទេព ពិសិដ្ឋ បានធ្វើឲ្យមហាជន ធ្វើការកោតសរសើរយ៉ាងខ្លាំង ខណៈដែលរូបគេ បានចូលរួមធ្វើអំពើ សប្បុរសធម៌ភ្លាម ដោយបាននាំយករង្វាន់ជាភេសជ្ជៈ ទៅឧបត្ថម្ភឲ្យក្មេងៗ នៅសាលាដូងកោះដាច់ ធ្វើឲ្យមហាជន លាន់មាត់សរសើរមិនដាច់ពីមាត់។
ជាការពិតណាស់ ជាមួយនឹងរូបភាព ដែលបង្ហាញពីកាយវិការដ៏ទន់ភ្លន់ និងទឹកចិត្តអាណិត ស្រឡាញ់ដល់ក្មេងៗ ក្រីក្រនៅសាលាដូង ម្ចាស់ពានរូបនេះ ក៏បាននាំយករង្វាន់ជាភេសជ្ជៈ ជាច្រើន យកទៅឧបត្ថម្ភដល់ក្មេងៗ នៅសាលាដូងកោះដាច់ ព្រមទាំងបានធ្វើបកស្រាយបទចម្រៀង ដែលបង្កឲ្យបរិយាកាសកាន់តែរំភើបទៀតផង។
ជាមួយគ្នានេះ ដោយឃើញនូវទង្វើដ៏ល្អ ព្រមទាំងទឹកចិត្ត ពោរពេញទៅដោយក្ដីស្រឡាញ់របស់ម្ចាស់ពាន «The Voice Kids Cambodia» រដូវកាលទី២ ទេព ពិសិដ្ឋ បានធ្វើឲ្យអ្នកគាំទ្រ លាន់មាត់លើកសរសើរភ្លាមថា «ពិតជាក្មេងល្អ ទើបតែលើកពានថ្មីៗ ទេព ពិសិដ្ឋ ចេះធ្វើបែបនេះទៅហើយ សង្ឃឹមថា ទេព ពិសិដ្ឋ នឹងទទួលបានភាពល្បីល្បាញ នាពេលអនាគតជាមិនខាន»៕